وتستمر المهزلة .. هل اصبحت مصر فعلا فوضى

ضابط كلية آداب يتحول إلى مجرم يضرب الطلاب



النهارضه وانا داخل من بوابة الكلية عادي جدا لقيت منظر غريب جدا ..

واحد صاحبي اسمه محمد داخل كليته كلية آداب ومعهوش حاجه غير اسكتش 20 ورقة ..
عادي مش كده !
جا العامل بتاع الكلية قاله وريني الكارنيه ..
والضابط قاله عايز افتشك !!
قاله افندم ؟
قاله افتشك ..
قاله معيش حاجه تفتشها !!
قاله عايز افتش الكشكول اللي في ايديك ده !!!!!!!!
-محدش يستغرب والله العظيم قاله كده !-
قاله ده كشكول 20 ورقة هتفتش فيه ايه ؟؟! ده غير ان مش حقك في القانون انك تفتش اي حد داخل الكلية .. انت وظيفتك انك تتأكد ان اللي داخل ده طالب في الكلية ولما يعمل حاجه في ادارة للكلية ..
قام "محمد عاطف" -الضابط - قايله .. ولااااااااا ياابن الكلب ..انا افتشك زي ما انا عايز .. افتشك حته حته ياروح امك .. افتشك ذاتي لو حبيت !!!!!!الكلام ده والله العظيم حصل يا جماعه قدام حوالي 50 طالب واقفين عالبوابه !!
وياريتها وقفت على كده ..
الطالب قاله يافندم مش من حقك انك تشتمني انا طالب محترم هنا .. انا طالب جامعي ..
هو قالها من هنا وقام الضابط ضاربه على وشه بالقلم وكسرله النضاره !!
وقدام الطلبة !!
تخيلوا !!
توصل السفالة والانحطاط للدرجادي !!
بجد دي بلطجة واستخدام السلطة استخدام اجرامي ..
في وقت لاحق الطالب محمد دخل من بوابه تانيه والطلبة اول ما شافوه صحابه والناس العاديه جريوا عليه وقالوله اوعى تسكت عن حقك وراحوا وقفوا عند بوابة آداب وقعدوا يشرحوا للطلبة اللي حصل وطلبه كتير اتعاطفوا معاهم وطلعوا لعميد الكلية يشتكوله من اللي حصل



الطلاب متجمهرين امام البوابة والطالب اللي اتضرب بيحكيلهم عاللي حصل



طلاب الاتحاد .. ذراع الأمن الطويلة .. واقفين قدام الطلبة مستنيين أوامر الأمن .. نضرب ياباشا

اول ما طلعوا لقوا العميد قافل الدور بتاعه كله ..
وعلى طول الضباط لقيناهم طالعين ودخلوا عند العميد مش عارف قالوله ايه ..
المهم صدرلنا وكيل الكلية "الدكتور حسن" وقعد من الطالب محمد اللي اتضرب واتنين صحابه واتنين بنات متضامنين معاهم واتعرضوا لمضايقات قبل كده عالبوابه ..
الدكتور قدم اعتذار رسمي باسم إدارة الجامعة للطالب .. وقاله أنا ماضمنش ان حاجه زي كد ما تحصلش تاني .. دول تبع الداخلية واحنا تبع التعليم - في اشارة منه لسلطة الداخليه عليهم - .. والغريب جدا جدا جدا بقى انه قاله انت ليه ما فتحتش الكشكول ؟؟

فالطالب محمد قاله مش من حقه يا فندم.. أنا طالب جامعي ولي كرامتي .. يعني ايه يفتشني ذاتي ويضربني على وشي !!



محمد رابعه اجتماع اللي اتضرب .. بيتكلم مع وكيل كلية آداب قبل ما يدخلوا يتكلموا
-لاحظ بتاع الأمن مادد راسه ازاي مش عايز يفوت كلمة! -



الطلاب ملمومين بيسمعوا واحد من صحاب محمد بيحكي اللي حصل

قام الوكيل للغرابه يعني رادد عليه قايله معلش يابني انا كمان باتفتش في حتت تانيه مش قانوني ومش باقول حاجه !!
يعني من الآخر الطلاب دخلوا لوكيل الكلية زي مادخلوا زي ما طلعوا .. والراجل اثبتلهم ان الموضوع مش بإيديه وان الكلمة العليا في الجامعة للأمن !!



صحاب محمد وآخرين متضامنين معاه معتصمين عند العميد مش راضيين يمشوا لحد ما محمد يطلع من عند الوكيل

واحنا نازلين بقى ماشيين لقينا بلطجية الكلية اللي الأمن بيحطهم كل سنه فيما يعرف بالاتحاد عشان يبقوا موجودين دايما جنبه لقيناهم واقفين تحت مستنيينا بالشوم !!!
احنا في الوكالة !!!
احنا طلبة دي كلية !!
ايه اللي بيحصل ده يا رئيس الجامعة ؟؟
خلاص ماعادلكش كلمة عالجامعة ..
سلمتها للأمن !!
طب وبعدين !!
آخرتها إيه !!
مين هياخد حق الطالب محمد ؟؟
القلم اللي الضابط ضربهوله على وشه مين هياخدهوله !!
بجد ايه اللي بيحصل ده !!
بس عارفين !!
انا واثق كويس قوي ان الضباط اللي بيضربونا ويضايقونا عالبوابات دول هيفكروا 100 مره بعد اللي حصل ده ..
هيعرفوا كويس قوي ان الطلبة مش بيسكتوا على حقهم ..
وان اي حاجه ممكن يعملها ممكن تقلب الكلية عليه ..
محدش يسكت يا جماعه ..
اصله لو سكتنا بكره يفتش البنات ذاتي ..
وعملوها في جامعة الفيوم ..
فضلوا يضايقوا في الطلبة والطلبة ساكتين لحد ما وصلت انهم بقوا بيفتشوا البنات ذاتي ..مش هيفرق معاهم حاجه دول ..
دول وحوش .. مش بني آدمين زينا !!
واسأل أي واحد دخل كلية الشرطة ..
الأخلاق دي بيسيبوها على باب كلية الشرطة وهمه داخلين ..
مش بعيد بكره يفتش اختك وهي داخله الكلية تفتيش ذاتي ..
احنا ثابتين على موقفنا .. ومش لوحدنا في جرايد جت غطت اللي حصل ومواقع انترنت وصحاب محمد هيتكلموا عالنت ويفضحوا اللي حصل .. وده الخبر على موقع اللجنة القومية لسجناء الرأي وحقوق الإنسان عاملين تقرير وده على موقع أمل الأمة عاملين تغطية للخبر وده على مدونة واحد من صحاب محمد حاطط فيديو للاحداث

من الآخر ..
احنا ناس عندنا كرامة ..
ومش هنتنازل عن حقنا أبدا ..
ومش هنسكت غير لما الضابط يتحاسب عاللي عمله ..
ويحصله اللي حصل للضابط اسلام نبيه اللي عذب عماد الكبير وأخد تلات سنين مع الشغل والنفاد ..
لازم المرادي منسكتش ..
و هدفنا نشوف محمد عاطف ده ورا القضبان في المحكمة ..

هذا الموضوع منقولا عن موقع جامعة اونلاين
بجد يهم كل انسان عربى قبل مايكون انه يهم كل مواطن مصرى

---

,jsjlv hgli.gm >> ig hwfpj lwv tugh t,qn

ايه البلطجة دي

وصل الانحطاط الأخلاقي للدرجة دي

؟؟؟

لا حول ولا قوة إلا بالله العلى العظيم

ايه السفالة وقلة الأدب دى .. ياجماعة كويس جدا انه مسكتش على حقه ولازم ما يسكتش والموضوع ده يوصل للإتنين الوزرا

بس برضوا المفروض عميد ووكيل الكلية يكون ليهم دور رئيسى وفعال فى المحافظة على مكانة الطالب الاجتماعية وحمايته

وحماية حريته التى كفلها له القانون ولازم يكون فيه تعريف لطريقة وحدود التعامل بين الأمن والطلبة وكل واحد يبقى عارف حقوقه وواجباته وحدوده .

شكرا

ايه القرف والبلطجه والعبط ده

ده موضوع مهم جداااااااااااااااا وفعلا ضابط الأمن بتاع الجامعات و الكليات عليهم رخمه مش شوفتها في حد

احنا برده في جامعه حلوان قاعدوا فترة كانوا بتوع الأمن لازم يقلعوا البنات المنتقبين النقاب علي بوابه الجامعة
ويشوفوا وشها والا كده الا مش هتتدخل الجامعة واثناء الفترة ديه كانوا بتوع الأمن داخل الحرم اللي يلقيها لبسه نقاب يقوموا مقلعنها النقاب وهما رجاله طب حتي يستعيونوا بسيدة تقوم برؤية المنتقبين مش رجالة وكمان طردوا وحده من المدينه الجامعية عشان منقابة ومعها كتب ديانية ومنعوا ساعاته اسكان المنتقبين داخل المدن الجامعية

فعلا هما مفترين علي الأخر

بس صح ان الواحد يكون ايجابي ومش سلبي لان ممكن يكون انا او اخويا واختي وابني وبنتي في الموقف ده

هي ليه الدنيا مش بقي فيها أمان
وليه الناس بتحب تأذي بعضها ليه مش بنحب بعض ونخاف علي بعض

ربنا يهدي ويهدي المسلمين اجمعين

والموقف ده يخلينا
نقول

لا للسلبية ونعم لأيجابية

المشاركة الأصلية كتبت بواسطة WebCraker

لا حول ولا قوة إلا بالله العلى العظيم

ايه السفالة وقلة الأدب دى .. ياجماعة كويس جدا انه مسكتش على حقه ولازم ما يسكتش والموضوع ده يوصل للإتنين الوزرا

بس برضوا المفروض عميد ووكيل الكلية يكون ليهم دور رئيسى وفعال فى المحافظة على مكانة الطالب الاجتماعية وحمايته

وحماية حريته التى كفلها له القانون ولازم يكون فيه تعريف لطريقة وحدود التعامل بين الأمن والطلبة وكل واحد يبقى عارف حقوقه وواجباته وحدوده .

شكرا

انا معاك في كل دا

دي مش طريقة معامله ، كمان من مين ؟

الامن ؟؟؟!!!

الي لازم يكونوا قدوه ، و يحموا الطلاب ؟ مش اسمهم امن برضة ؟؟!!

ايه ده ... لا حول ولا قوه الا بالله

والله يا عم الواحد ماعارف يقول ايه

بس دي مش ناس دول ........... ولا بلاش

بجد حاجه تخنق وتضايق في دوله فيها ديموقراطيه ههههههههههه

ربنا يصبرنا علي الايام الي جايه

مش عارفين بعد طريقه التفتيش دي هيعملوا فينا ايه بعد كده

مشكورين على الردود والمشاركات

اللهم أجرني في مصيبتي ، واخلف لي خيرا منها

هل يستمر مسلسل الاهانات ؟الى متى ؟ ام ستكون هناك وقفه؟ارجو ابلاغنا بما ستؤول اليه الامور

على فكره يا جماعه التعامل مع المواقف ى سهل جدا

ايه المشكله لما الموضوع ده بالمبديا بتاعته يتم ارساله لمراسل المصرى اليوم او الجزيره

الاعلام هوا السلاح الذى يستطيع لى ذراع الامن
اغلب الظن ان الموضوع لما هيظهر فى الميديا الظابط هيتعاقب اويحصله حاجه

على فكره عقاب الظابط مش حاجه خفيفه

اى نقطه سوده فى ملف ضيعت عليه الرتبه الكبيره


على الاقل هيتعمله ايذا نفسى ومهنى يعادل ضربه لطال الجامعى

وممكن تتعمل مظاهره وتتصور فيديو وتتبعت مع الملف بتاع لموضوع للجرائد او القنوات المناسبه ( بس بلاش الحره ) علىفكره مكن البيت بيتك يذيعها

المهم نقطه كمان

احنا برده في جامعه حلوان قاعدوا فترة كانوا بتوع الأمن لازم يقلعوا البنات المنتقبين النقاب علي بوابه الجامعة
ويشوفوا وشها والا كده الا مش هتتدخل الجامعة واثناء الفترة ديه كانوا بتوع الأمن داخل الحرم اللي يلقيها لبسه نقاب يقوموا مقلعنها النقاب وهما رجاله طب حتي يستعيونوا بسيدة تقوم برؤية المنتقبين مش رجالة وكمان طردوا وحده من المدينه الجامعية عشان منقابة ومعها كتب ديانية ومنعوا ساعاته اسكان المنتقبين داخل المدن الجامعية

اختلف معاكى يا توتاا فى النقطه دى

النقاب م منعه لان ببسطه فى الفتره بتاعت الموقف ده حصلت كذا قضيه بسبب النقاب وان فى رجاله بتلبسه وانتى فاهمه الباقى وكان فى كذا قضيه من سنه او 2 حول الموضوع ده

بوده خلاهم يمنعوا المتنقبات من السكن فى المدن الجامعيه لان دى مدينه بنات

بالاضافه لهاجز امنى ان المنقبات فى تجمع زى كده ممكن يعملوا جلسات دينيه سياسيه وتكون المدينه الجامعيه منبر للمظاهرات وده طبعا خط احم عند الامن

بخصوص موقف الفتاه المنقبه فانا رافضه مثلك وشايف ان الصح ان بنت اللى كانت تعمل كده

وما زال يستمر مسلسل الاهانات وسوف يستمر ايه الجديد !!!!

الامن ده اصلا واقف زي قلته والله يعني بشوف كارنيه اةة

بس ولا كأنه شاف حاجه طلع اي حاجه يعديك
وبتشوف بقي في الجامعه ناس ( ما ادراك )