يوميات رمضانية ... الحلقة الاولى " مش هاتقدر تغمض عنيك "

اعزائى المشاهدين احييكم

وارحب بكم فى برنامجنا





برنامجنا اليوم متنوع ودمه تقيل .. لذا ننصح السادة المشاهدين بتوخى الحذر اثناء المشاهدة ... يمكن واحد فيكم يقع فى ضحكة كده والا كده يبقى يقولنا..وهنيالك يافاعل الخير والثواب ومن قدم شئ بيداه التقاه. .



رمضان شهر الصوم والعبادة ...ولكنه هنا على القنوات الفضائية شهر المسلسلات والفوازير

وكل فوازير وانتم طيبين....

قل.. رمضان فوازير.. ولا تقل ...رمضان كريم.

.والفوازير السنة دى برعاية منتديات تيفا


..(معانا القعدة حلوة.. وشخلل جيبك ..دى القعدة بفلوس )



اعلان...



(حبة بنات حلوة بترقص بلدى وبوصرة..ويغنوا ويقولوا)

...واه يابوى ..واه يابوى ......واه يابوى ..واه يابوى ...

واد ياصميدة رايح فين

..ماخبرش

القعدة حلوة ..والخدمة زين...زبادى خلاط...وقمر الدين

رايح على فين يا صميدة.

.ما خبرش...

معانا القعدة حلوة وشخلل جيبك دى القعدة بفلوس

منتديات تيفا
.معنا...الفرجة بقى لها طعم تانى..




منتديات تيفا
تتمنى لكم مشاهدة ممتعة مع جوايز فوازير رمضان

الجائزة الاولى..تذكرتين قطار.. القليوبية-بنها .. ذهاب من غير عودة..وستتكلف الحكومة برسوم العودة محمولا على الاكتاف

منتديات تيفا تتمنى لكم حظا سعيدا ..ونوما هادئا فى قطار القليوبية


الفزووووووووووووووووووورة
----------------------
فزورتنا النهاردة بتتكلم عن قائد عظيم..
قائد مهول ..والتاريخ بيقول ..
انه اول من مسك المحمول...
واول من اخترع الميسدكول...
وعمل رنات اما نعيمة نعمين.
. لوانت بيزى انا مشغول


فزورتنا النهارده اهداء من شاعرنا الطويل قوى..


قصدى الكبير قوى


صعيدى جدا ............



(الفزورة)



[]
قائد إسلامي عظيم
عاش في القرن العشرين
مش عمر بن الخطاب
ولا حتي صلاح الدين
لكن في صفاته وسمته
واخدهم من الاتنين
حررلنا بيت المقدس
مسجدنا في فلسطين
ومسح أحزانها بإيده
غزة ونابلس وجنين
فكرنا بأيام حلوه
رجع أمجاد حطين
رجعلها عزها تاني
كل بلاد الرافدين
وحكم بالشرع العادل
ورفعلنا راية الدين
علي فكره صناعه عربية
مش مستورد م الصين
راح نعمل فيلم عشانه
وهيخرجهولنا شاهين
حزروا فزروا يا جماعه
فكروا يللا يا حلوين
جوايزنا كتيره وغالية
القائد يطلع مين...

**************************************************

ادى اخرت اللى يتفرج على فوازير مافيهاش نيللى ولا شريهان ...
قال قائد اتولد فى القرن العشرين ورايح يهزم الاعداء بمحمول ...
طب حد يقوله ماينساش يشحن الكرت بتاعه قبل ما يروح يحارب الاعداء

ماتتعبوش نفسكم فى التفكير وماتستنوش آخر رمضان انا حا اخيب املكم ..قصدى حاأقولكم الحل على الهواء مباشرة

وحل الفزورة
مافيش قائد من اساسه عمل ده فى القرن العشرون..دى احلام او سموها هلاويس............

آآآآآآخ..اللهم انى صاااااائم

********************************************

طفيت التليفزيون


زمان كنا انا والعيال اصحابى ندور على الجيران فى ايدينا فوانيس صفيح مصنوعة بأدين ومهارة مصرى
جواها شمعة مصرية ..ونقول وحوى يا وحوى..

اياااااام .........نفسى حد من عيال اليومين دول يخبط عالباب ويقول.. ادونا العادة..وحوى يا وحوى.

ايه ده ..انا سامع خبط عالباب...معقول
معقول ... لسة فيه عيال ممكن تعمل كده

جريت افتح الباب ...

لقيت ادامى عيل صغير... ماسك فانوس زى بتاع البحارة ..ولابس لبس قرصان ..وحاطط شارة على عينه.. قال يعنى اعور.. وبيقولى... هابى هالويين مستر

نسيت اقولكم رمضان السنة دى موافق هالويين..اكيد اكتركم يسمع عنه(عيد الرعب عند الغربيين)بصيت للولة الصغير وجزيت على سنانى... وقولت
آآآآآآآآآآآآخ...اللهم انى صائم

************************************************
" اه من الصيام وامتحاناته "
-----------------

انت ياجميل يالى ماشى هناك...خد تعال لما أأقولك

( من قائل هذه العبارة؟ )

-هل هى الدنيا تناديك
- سلعة تجارية غير رائجة ملطوعة على الرف فى انتظار الزبون الدهل(حضرتك)
- ولا أم السيد( الخاطبة )عاوزة تزغلل عنيك بعروسة من عرايسها
-فتاة اعلانات فى اعلان تليفزيونى ساخن
-ام فيديو كليب جديد مكسر الدنيا

يادى امتحانات رمضان الصعبة..باقولكم ايه ...
اللهم انى صائم

**********************************************

صحيت من النوم .. لبست هدومى بسرعة.. نزلت بدرى ..الاتوبيس كان زحمة ومافيش مشاريع ولاميكروباص..قولت اخد تاكسى

ركبت جنب السواق... العربية ريحتها موش قد كده.. حاولت افتح الشباك ماكنش فيه اوكرة ..طلبت من السواق لو ممكن يفتح الشباك
والراجل فى الحقيقة رغم ان لسة الدنيا صبح الا ان شاكله كان واضح ان صايم طول الليل .. كلمة منه ..كلمة منى ركبت راسى ياالشباك يتفتح ياما انزل.. عن طيب خاطر وقف التاكسى وطلب 3جنيه...اتجننت انا ..ليه ده كل اللى ميشيه التاكسى 10متر ...وشدنا خناق لقيت مافيش فايدة رميت له جنيه وانا موش مسامح وجزيت على سنانى ......
آآآآآآخ..اللهم انى صاااااائم

********************************************
ده كان حالى وانا رايح الشغل فى مصر طيب لوكنت فى كندا ورايح الشغل ايه اللى كان ممكن يحصل

**********************************
برضه فى كندا انا باصحى من النوم البس هدومى..

ونزلت ركبت عربيتى ..ورحت الشغل..
ركنت العربية فى الشارع بعيد عن مكان شغلى بحوالى 3دقايق مشى..
وانا ماشى واحد راكب عجلة وقف جنبى وسألنى ...لو سمحت يامستر معاك ربع دولار فكة ..اصل زى ماانت شايف انا شحات وكنت عاوز اشرب قهوة
ابتسمت على مضض ..دعبست فى جيوبى مالقتش فكة.. تعمدت انى ابالغ فى دعبسة جيوبى علشان احسسه انى عندى النية انى اديله
وفى الاخر اعتذرت ان كل الفكة اللى معايا موجودة فى العربية

-سألنى وفين عربيتك يامستر؟
شاورتلوا عليها.....اللى هناااااااك دى... فى آخر الشارع
-رد بمنتهى البجاحة ..طيب انا حااسلفك العجلة تروح لحد عربيتك تجيب الفكة وانا مستنيك هنا..اوك؟
ماكنش عندى رد تانى غير....
آآآآآآخ...اللهم انى صاااااائم

********************************************
قلبت فى القنوات لقيت برنامج دينى محترم من البرامج الدينية بتاعة اليومين دول .

.وطبعا مقدم البرنامج كان شاب صغير من بتوع اليومين دول ...
وكان مستضيف شيخ برضه من بتوع اليومين دول
استاذ دكتور فتاوى قص ولزق..لزوم اليومين دول

وكان السؤال هل اذا حمل الانسان قربة فساء ينتقض وضوءه مع العلم ان القربة محكمة ولا يتسرب منها اى فساء ?
الفساء ياسادة هى روائح تخرج من المرء فى العادة غير مسموعة ولكنها غالبا مشمومة

الى هنا لا تعليق ......

....هل استطاعنا ان ننافس الغرب فصنعنا قربة واودعنا فيها مدخراتنا من اكل الطرشى والكرنب والقرنبيط
وحان نقلها الى مكان امن ونخشى اذا حملناها ان ينتقض وضؤنا

ايها السائل المحترم عفوا..........انى صائم ولا اقولك..
آآآآآخ...اللهم انى صائم

*********************************************

دخلت البنك علشان اودع شيك بمبلغ الف دولار..اودعت الشيك ..اعطانى الصراف وصل بأنه استلم عشرة تلاف دولار
عينى زغللت.......... ( آآآآآآخ..اللهم انى صاااااائم )

رجعت له الوصل وتصنعت التقوى. ..وقلت له واضح ان حضرتك غلطت ..انا عطيتك شيك بألف دولار..وانت اديتنى وصل باستلامك عشرة تلاف دولار

نظر الصراف لى بفرح وقال...هنا بنك الحسنات والحسنة بعشر امثالها ويضاعف الله لمن يشاء

خجلت من نفسى لحد امتى حيبقى موضوع الحسنات مرتبط بمناسبات منتظمة ..رمضان والعيد ومولد النبى ومعونة الشتاء..
.امتى نتعود نروح كل يوم بنك الحسنات للايداع فقط
ونحوش حسنات ونخاف عليها تروح زى مابنخاف على فلوسنا وبنميها ونكبرها

******************************************

سيداتى آنساتى سادتى..الأخوة والأخوات ...الأمة العربية جمعااااااء..
بعد التحية... والذى منه..


عزيزى القارئ ....قولى شعورك كان ايه وانت بتقرى الموضوع اللى انا كتبته فوق ده....


..قول وماتخافشى..
ياترى أشمئزيت ..إذا كنت حقا فعلت ..فلك الشكر لأنك قارئ تجيد حاسة الشم...اصل عقبال عندك ..اخوك بعد طول انتظار وشوق... اكل فسيخ وبصل


ياترى ابتسمت..لو كان ده فعلا حصل دعنى أنحنى لك..اعزازا وتقديرا
موش واضح انك اشمئزيت ولا حتى ابتسمت


يبقى اكيد ضحكت ...ايوه كده اضحك ماحدش واخد منها حاجة


ماضحكتش... يبقى اكيد قهقهت...ووقعت من الضحك على الكلام اللى انا كاتبه..كده تبقى زودتها حبتين يعنى انت بقيت بكاش بس برضه بحبك


عزيزى وحبيب قلبى أيها القارئ ..خلينى اجيبهالك على بلاطة ..
انا جيت هنا وكتبت الموضوع ده علشانك ..علشان اكون معاك ..انا وانت وبس..كلمتك وحكيت لك ..وانا واثق انى رسمت بسمة على شفايفك.. وأضأت فكرة فى عقلك


صديقى القارئ ارجو انى ماكونش طولت عليك..او كنت ضيف تقيل..ااقولك كل رمضان وانت طيب
قبل مااسيبك ليا عندك طلب واحد..اصل اخوك مزنوق ممكن تسلفنى عشرة جنيه لحد اخر الشهر

وإلى اللقـاء غدا

---

d,ldhj vlqhkdm >>> hgpgrm hgh,gn " la ihjr]v jylq ukd;

موضوع راااااااائع يامحمد دايما تغيب تغيب وتيجي بموضوع جامد كل سنه وانت طيب

بس للاسف مش معايا فكه خليك رمضان الجاي يمكن تلاقي

ومستنين باقي اليوميات

الموضوع جمييييييييل يا محمد
بس كان نفسي اضحك
فى انتظار باقى اليوميات

مشكوووووووووووووووووور على الموضوع الرائع ... بجد موضوع جميل

صحيت من النوم .. لبست هدومى بسرعة.. نزلت بدرى ..الاتوبيس كان زحمة ومافيش مشاريع ولاميكروباص..قولت اخد تاكسى

ركبت جنب السواق... العربية ريحتها موش قد كده.. حاولت افتح الشباك ماكنش فيه اوكرة ..طلبت من السواق لو ممكن يفتح الشباك
والراجل فى الحقيقة رغم ان لسة الدنيا صبح الا ان شاكله كان واضح ان صايم طول الليل .. كلمة منه ..كلمة منى ركبت راسى ياالشباك يتفتح ياما انزل.. عن طيب خاطر وقف التاكسى وطلب 3جنيه...اتجننت انا ..ليه ده كل اللى ميشيه التاكسى 10متر ...وشدنا خناق لقيت مافيش فايدة رميت له جنيه وانا موش مسامح وجزيت على سنانى ......
آآآآآآخ..اللهم انى صاااااائم

بنشوفها كتير دى

شكرا يا محمد وفى انتظار باقى اليوميات

جزاك الله خيرا يا محمد

يوميات رائعة فعلا

فى انتظار البقية

لا بجد مجهود جبار ماشاء الله عليك ربنا يوفقك وفى انتظار البقيه