كتاكيتى الحلوين
كتكوتاتى الحلوات
ازيكوا كلكوا عاملين ايه ..؟
انا النهاردة جاى اكلمكوا فى موضوع بعانى منه اوى فى الفترة الاخيرة اللى هو ... اللى هو .... يانهار ابيض ... اه افتكرت معلش 
اللى هو الشخص الزنان 
واللى مش فاهم يعنى ايه زنان؟.. نقوله يعنى الرغاى
واللى مش فاهم يعنى ايه رغاى ؟ .. نقوله يعنى ما بيسكتش على حيله
اما بقى اللى مش فاهم يعنى ايه مابيسكتش على حيله ؟.. فادا بقى اقوله انا لومنك هقفل الموضوع .. والكمبيوتر كله .. وهاروح انام وبلاهة قراية ..
المهم نرجع لموضوعنا
فى الفترة الاخيره اضرطني الظروف اسافر سوهاج لظروف عمل ( مع ان كنت هاروح قنا بس ودوني سوهاج المهم ), ..
ركبت القطار وقلت عيش ياواد الرحله واتمتع ونام براحتك بقي 
ولأنى من اشد المعجبين بالنوم اثناء السفر وخصوصا داخل القطار .. لذا بمجرد ركوبى له وبعد مرور نص ساعة على اقصى تقدير اكون قد غادرت عالم الاحياء وذهبت فى سبات عميق .. مع نوم لذيذ .. 
ولكن فى الفترة الاخيرة .. ولحظى السئ .. اصبح يظهر لى ما يسمى بالشخص الزنان " واللى مش عارف يعنى ايه زنان ؟ .. نقوله يعنى رغاى "
" واللى مش عارف يعنى ايه رغاى ؟.. نقوله يعنى مابيسكتش على حيله "
" واللى مش عارف يعنى ايه مابيسكتش على حيله ؟.. انتوا عارفين الباقى بقى "
المهم انا هاحكيلكوا اخر موقف حصل معايا .. مع الزنانين و الرغايين واللى مابيسكتوش على حيلهم
( بعد ان خرجت من البيت قاصدا محطة السكة الحديد .. توجهت الى شباك حجز التذاكر .. واذا بالمفاجأة الكبرى ... يا نهار ابيض كل دول ناس مسافرة ... المهم وقفت فى الطابور منتظرا اجلى .. احم احم .. اقصدى دورى .. وطبعا لا يخلوا الامر من زقة هنا ومن زقة هنا .. وبعد اذنك يا حضرة الطابور ...
وبعد مايقرب من 15 سنة اشغال شاقة وصلت لشباك التذاكر والحمد لله... ولاقيت حد بيخبط على كتفى من ورا .. ببص لاقيته واحد كده منجهة بدلة ..ايه وشياكة ايه ... وحلاوة ايه ... بيقولى
" هوحضرتك هاتحجز لفين؟ "
جاوبته بقرف وانا مش طايق نفسى
" هاحجز لسوهاج .. ليه ؟ فيه مانع ؟ "
رد عليا بأدب احرجنى
" لا ابدا .. بس هو حضرتك هاتحجز فى قطر رقم كام ؟"
قولتله
" فى قطر رقم كذا "
وبصيت للراجل بتاع الشباك ولسة هاكلمه لاقيت اللى بيخبط على ظهرى تانى .. بصيت كده لاقيته بيقولى
" وهو القطر ده لسة فيه تذاكر للحجز ؟"
رديت وانا بجز على سنانى
" وانا اش عرفنى مانا لسة هاشوف اهو .."
ولفيت وشى الناحية التانية .. وقولت للراجل اللى بيحجز
" بعد اذنك عايز تذكرة سوهاج فى القطر " والحمد لله لاقيت تذكرة ... ولسة هالف واخرج عشان الحق القطر لاقيت اخينا اياه بيقولى
" ها .... لاقيت ؟ "
" ايوة الحمد لله "
" طب ممكن معلش .. ده بعد اذنك .. واذن الحضرات .. اذا ماكنش فيها تقل عليك ـــ"
" ها .. خلص "
" ممكن تحجزلى معاك تذكرة .. اصل القطر هايطلع دلوقتى .. وحضرتك شايف الطابور أد ايه ؟ .. ده غير ان والدتى تعبــــ..... "
" يا عم هات انت هاتحكيلى قصة حياتك ... هات وخلصنى "
وبالفعل حجزت له تذكرة
المهم ادتهاله وجريت الحق القطر اللى كان فاضله 5 دقايق ويقوم من المحطة
والحمد لله وصلت للكرسى بسلام وحطيت الشنطة فى مكانها وقعدت ورستأت نفسى ... ولسة هاغطس فى النوم
" السلام عليكوا "
" مفجأة مش كده "
فتحت عينى لاقيته هو بأبتسامة بلهاء فاتح بقه
فارديت عليه
" وعليكم السلام "وقفلت عينى عشان امارس هوايتى المفضلة خلال السفر وخصوصا بعد الحرب الطاحنة اللى كانت قدام شباك التذاكر
" هو حضرتك كنت واقف من بدرى فى الطابور "
" ايوة ياعنى من حوالى ساعة كده "
احنا وصلنا لحد فين ...... اممممممممم
اه لما قولتله
" ايوة ياعنى من حوالى ساعة كده "
لاقيته بيقولى فى امتنان
" الف شكر على التذكرة ... انا مش عارف اقول لحضرتك ايه ؟ انت نجدتنى .. اصــ... "
قاطعته وقولتله
" يا عم لا شكر على واجب .. انا ماعملتش حاجة "
" لا بجد شكرا "
" يا سيدى العفو "
لاقيته قعد جنبى وحط الشنطة فوق الكرسى بتاعه وقالى
" شوفت الصدف السعيدة ... الكرسى بتاعى جنب الكرسى بتاعك ... اكيد انت سعيد زيى .. صح ؟ مش كده ؟ "يادى النهار المدوحس .. الراجل الرغاى ده هو اللى هايأنسنى طول السكة .. استر يا رب
" اه اكيد ... انا فى منتهى السعادة "
سكت شوية .. فغمضت عنيا فى استرخاء .. شوية ولاقيته بيخبط على كتفى .. فتحت عينى .. فقالى بمنتهى البرود وبراءة الاطفال فى عينيه
" هو انت نمت ..؟ "
رديت عليه ببرود اكتر منه
![يا عم انت ....مش قولنا انزل من على ودنى ..!! 36_11_9[1].gif](https://www.asmilies.com/smiliespic/3dsmilies/36_11_9[1].gif)
" متهيألى "
" ليه هو انت صاحى الساعة كام ؟ "
" يعنى يمكن الساعة 8 الصبح "
" اممممممممممم ... ليه هو انت كان وراك شغل ولا حاجة ... هو حضرتك بتشتغل ايه ؟.."
فهمت ساعتها انه ناويلى وانه من النوع اللى عايز يتسلى طول السكة على حساب نومى
فارديت عليه
" للأسف مش بشتغل "
مع ان كنت رايح شغل بس قلت اريح دماغي
" يبقى لسة بتدرس ... فعلا انت شكلك لسة صغير ...انت تعرف انا لما كنت بدرس ماكنش حد مصدق ان انا لسة بدرس , اصل انا شكلى اكبر من سنى .. مش كده ولا ايه؟.. ويا ترى انت بتدرس ايه ؟"
" انا الحمد لله خلصت دراسة .. بس لسة مالقيتش شغل "
" وليه كده .. ده الاهرام بتاع الجمعة بيبقى فيه وظايف كتيرة .. وانت شكلك كده من النوع اللى بيقرا كتير ... يعنى اكيد بتقرا الجرنان .. اه صحيح انت خريج ايه ؟ "
قولتله وانا بدأت افقد اعصابى
" حقوق جامعة المنصوره "
" وتقديرك ايه ؟ "
مقبول 
" ايوة .. ايوة .. عشان كده انت مش لاقى شغل ... وليه كده .. هو انت ماكنتش بتذاكر ولا ايه ؟ ... انت عارف لو كنت جايب تقدير كويس .. اكيد كنت هاتلاقى شغل بسرعة .. بس تعمل ايه فى الشباب ... اكيد كنت تعرف بنات فى الجامعة ... قول ... اعترف .... الانكار مش هاينفع ."
قولتله بسخرية وتهكم
" والله ماقتلته يا حضرة الظابط "
ويا ريتنى ماكنت قولتها ... انا قولتها من هنا وهو هاتك يا ضحك وشقلبظات وفرج علينا القطر كله وهو بيقولى
" شكلك ابن نكتة .. ههههههههه ... ده القاعدة هاتحلو ...ههههههههه "
وانا باصصله بذهول ونفسى انام ... وبعد نص ساعة من الضحك المتواصل عدى الراجل بتاع البوفيه فقالى
" تشرب حاجة ... قول ماتتكسفش .. اصل انت اللى هاتحاسب لنفسك .... هههههههههههه .... انا كمان ابن نكتة .... هههههههههههه ..."![يا عم انت ....مش قولنا انزل من على ودنى ..!! 36_1_19[1].gif](https://www.asmilies.com/smiliespic/3dsmilies/36_1_19[1].gif)
" لا شكرا .. مش عايز "
وانتهزت فرصة انه بيكلم الراجل بتاع البوفيه وعملت نفسى نايم
ولما خلص كلام مع الراجل ولف لاقانى عامل نفسى نايم سكت شوية .. وقولت الحمد لله انه طلع عنده دم
وبالفعل بدأت ادخل فى النوم .![يا عم انت ....مش قولنا انزل من على ودنى ..!! 36_1_50[1].gif](https://www.asmilies.com/smiliespic/3dsmilies/36_1_50[1].gif)
.. وعروسة البحور جاية عليا فاتحة درعاتها و.......
" انت يا عم .... انت نمت ولا ايه ؟... يا راجل فوق كده خلينا نتكلم مع بعض شوية "
يادى اليوم اللى مش معدى
" خير ... فيه حاجة ... القطر اتقلب ولا ايه ؟ "
" انت يا عم ![يا عم انت ....مش قولنا انزل من على ودنى ..!! 36_13_2[1].gif](https://www.asmilies.com/smiliespic/3dsmilies/36_13_2[1].gif)
ما قولتليش اسمك ايه ؟ "
" اسمى ... ( حسبى الله ونعم الوكيل ) .. اسمى محمد "
" انا بقى اسمى ممدوح ... محامى ( طلع زمل كويس اني مقلتلوش ) ... وكنت مسافر مصر عشان قضية ... تخيل ان انا مالحقتش القضية عشان القطر اتأخر بيا فى السكة ... بس ربنا سترها واتصلت بواحد صاحبى حضر الجلسة مكانى ... اصلها كانت قضية معقربة اوى ... والحمد لله زميلى ده خادلى فيها تأجيل ... بينى وبينك كده احسن ... اصل انا ماكنتش مجهز مرافعة كويسة ... اصل الواد ابنى طول الليل عمال يعيط عنده مغص .. ورحنا جبناله الدكتور .. اصل انا المكتب بتاعى جنب الشقة على طول ... وعشان كده مش بعرف افلفص من مراتى ......... الخ"
كل ده وانا عمال اهزله فى راسى .. وراسم على وجهى كل علامات التوسل عشان يعتقنى ويخلينى انام ( كانت تذكرة مهببة اللى جبتهاله )
وفضلنا على كده وانا النوم هاينط من عينى وهو عمالى دودودودودودودو
وهاتك يا رغى لحد مااكل دماغى
ووصلنا والحمد لله سوهاج بعدما اصبت بالعته الماغولى والتهابات فى الاذن الداخلية واحولال فى العين اليمين
ونزلنا من القطر ولاقيته بيسلم عليا ويقولى
" فرصة سعيدة جدا يا استاذ محمد .... اتمنى نتقابل تانى .... اه صحيح هى نمرة تليفونك كاااااام ؟"
.
.
![يا عم انت ....مش قولنا انزل من على ودنى ..!! 36_1_2[1].gif](https://www.asmilies.com/smiliespic/3dsmilies/36_1_2[1].gif)
.
.
طبعا اغمى عليا
تجنبوا هذه الصفه 
تحياتي
محمد علي
dh ul hkj >>>>la r,gkh hk.g lk ugn ,]kn >>!!
يا عم انت ....مش قولنا انزل من على ودنى ..!!
العرض العادي
