بيان الوزارة .. فى مفهوم الاستقالة .. ورقصنى يا جدع

مكتب وزير الثقافة
ـــــــــــــــــــــــــــــــ



كان وزير ثقافة انتيكا جالسا فى مكتبه يقرأ الجريدة حين استوقفه خبر غريب .. ( استقالة وزير المواصلات اليابانى )
فاستدعى مدير مكتبه على الفور:

- حسين .. تعالى .. قريت الخبر ده ؟

- قريته يا فندم .. وماله ؟

- هى ايه الاستقالة دى ؟؟

- والله يا فندم علمى علمك ..

- يبقى تدور لنا عليها عشان لو حاجة حلوة نعملها .. اشمعنى اليابانيين يعنى .. عندك فكرة فيه وزير هنا فى انتيكا عمل الاستقالة دى قبل كده ؟؟

- لا يا فندم .. دى اول مرة اسمع عنها

- طيب اتصل باليابان كده واستفسر , واعرف القصة بالتفصيل .

* * * * * * * *


بعد يومين
ـــــــــــــــــ



حسين يدخل على الوزير متهللا :

- لسة قافل مع اليابان دلوقتى

- ها ... وقالولك ايه ؟؟

- هما قالوا كلام كتير اوى .. بس انا مافهمتش اى حاجة .. مانت عارف سعادتك انهم بيتكلموا يابانى .

- امال جاى مبسوط ليه كده يا حيوان ؟

- مانا يا فندم عندى رأى ..

- قول !

- انا برجح ان الاستقالة دى تكون مثلا ترقية للوزير ...

- ترقية ؟ .. والله كلام معقول !
يبقى نقدم طلب لرئيس الوزراء من بكرة.

- بس دى حاجة جديدة ويمكن ما يوافقش.

- لا ماعتقدش .. احنا لسة واقفين معاه وقفة جدعان فى الانتخابات, مش معقول هايستخسر فيا حتة استقالة , من بكرة تقدم الطلب , باقولك ايه ... اوعى حد من الوزراء اللى فى المجلس ياخد خبر .. لحسن حد يسبقنا ..عايز اكون اول وزير يبقى معاه استقالة .

* * * * * * * * *


رئاسة وزراء جمهورية انتيكا
ــــــــــــــــــــــــــــــــــــــــــــــــــ



رئيس الوزراء يتناول دواء الضغط ويحدث كبير الياوران:
- وبعدين بقى فى حركة هوينا دى.. مش يتلموا شوية بدل ماسود عيشتهم

- ماهى سودا اساسا يا فندم

- بتقول حاجة ؟؟

- قصدى هما متحامين فى جمعية حقوق الانسان

يبتلع دواء السكر ويردف:
- حقوق ايه بس .. هما مش بياكلوا فول كل يوم وعايشين ؟ ..اعملهم ايه تانى ؟

- ماهم بيطالبوا بحاجة تانية غير الفول !

يتناول منظم ضربات القلب ويتابع :
- خلاص .. نزلوا لهم الطعمية خليهم يعيشوا عيشة الملوك .. بس بالسعر السياحى .. آه .. احنا مش هاندعم كل حاجة .. اجيب منين ؟

-لا يا فندم هما بيطالبوا بحاجة غريبة كده اسمها .. اسمها .. ( يخرج ورقة صغيرة يقرأ ما بها ) اسمها ديموقراطية !

يستنشق موسع الشعب الهوائية ويهتف :
- مين ؟؟ ديمو ..ايه ... الله يخرب بيت الدش اللى بوظ اخلاق الشعب .. طيب شوفولهم الهبابة دى وهاتولهم منها شوية .. بدل ما كل شوية يقولوا هوينا هوينا ... بس برضه بالسعر السياحى .. احنا هاندعم الكماليات كمان ؟.. اجيب منين ؟

- حاضر يا فندم .. فيه كمان طلب غريب قوى من وزير الثقافة ..

يتناول مذيب الجلطة صارخا :
- خير .. عايز ايه هو كمان ؟؟ .. لو عايز دعم قوله مافيش .. مافيش .. اجيب منين ؟

- لا ده عايز حاجة غريبة اوى عايز اسـ .. اسـ ..

- السلامو عليكوا .. انت هاتغنى ؟ .. ماتخلص !

- استقالة !

- ده يوم ايه المهبب ده !.. ديموقراطية واسقالة .. انا اصطبحت بوش مين بس .. انا قولت البلد دى ماينفعلهاش دش .. تطلع ايه الاستقالة دى ؟؟؟

- والله يا فندم مش عارف .. انما نسأل يا فندم .. نسأل .

- تسأل بسرعة يا زفت

- حاضر يا فندم .. أى اوامر تانية ؟

يجلس على الكرسى المتحرك ويجيب :
- شغل الدش على قناة ميلوتى وغور فى داهية .

---

fdhk hg,.hvm >> tn lti,l hghsjrhgm ,vrwkn dh []u

وزارة الداخلية

ــــــــــــــــــــــــ



مساعد الوزير يهتف فى اذن الوزير:
- مقدم طلب للريس عشان يوافق له على استقالة , ومين عارف الاستقالة دى بتعمل ايه .. مش يمكن تخليه يمسك الداخلية كمان ؟

- يانهار ابوه اسود .. لا ده بعده , الأمن هايفضل مستتب طول مانا فى موقعى .. تسألنا على الاستقالة دى فى اسرع وقت .. اتصل ببلاد بره اسألهم عنها ... معاك رنــــات ؟؟

- لا سعادتك .. انا فى السماح .

- طيب خد موبايلى

- احم .. ماهو مسروق يافندم ولسة مالاقيناهوش !

- والحل ؟؟؟؟

- فيه حل واحد .. اتغدى بيه قبل ما يتعشى بيك , وقدم انت كمان على استقالة.

- والله فكـــــرة !!

* * * * * * * * * * *


رئاسة وزراء الجمهورية
ــــــــــــــــــــــــــــــــــــــــــــ



رئيس الوزراء يتمايل طربا على انغام الاغنية ويردد معها ( بوص عليا بوص ... انا دانا .. انا دندن ...فتح عينك ..تا.....) حين يدخل عليه كبير الياوران فيبادره :
- سألت لنا على الاستقالة ؟

- ماحدش فاهم حاجة خالص يا ريس .. مافيش حد فى الدول العربية أو الافريقية يعرف عنها حاجة .. حتى فى كل القواميس السياسية العربية مالهاش اثر !!

- امال جابها منين ابن القروبة ده ؟

- انا سمعت طشاش كده ان فى بلاد بره الرئيس بيوافق بس على الاستقالة للوزير لما يكون عمل حاجة كبيرة اوى .

- كبيرة ايه .. دول بهايم .. هو حد منهم بيعمل حاجة من نفسه .. كله بتوجيهاتى , .. طب والعمل يا زفت ؟

- انا رأيى سعادتك ان كده ولا كده احنا نرفض الطلب , والباب اللى يجيلك منه الريح سده واستريح, اصلها لو طلعت كويسة مش بعيد تلاقى كل الوزراء مقدمين على استقالة !

- على رأيك .. وهى يعنى من كتر الاستقالات ... انا اجيب منين بس ؟؟

* * * * * * * * * *


وزارة الثقافة
ــــــــــــــــــــــــ



هتف حسين مدير المكتب:
- الوفد الاجنبى وصل يا فندم

- خليهم يدخلوا فورا.

استقبل الوزير اعضاء الوفد واخذ يستعرض معهم انجازات الوزارة خلال عشرين عاما قضاها فى موقعه.

- بس ليه كده يا معالى الوزير .. انتوا ليه مش مهتمين بالثقافة ؟

- ماحنا عشان كده هاناخد خطوة جبارة على طريق التنمية الثقافية .

- ايه يا ترى ؟؟

- هاقولك رغم انه سر .. انا .. مقدم على استقالة .

- استقالة !! .. ومين هايمسك الوزارة من بعدك ؟

- انا برضه .. يعنى لما اكون وزير حاف امسكها ولما اخد الاستقالة اسيبها ؟!
- ايوة ماهى الاستقالة كده !

- يا سلام .. ومابقاش وزير ؟

- لأ !!

- ايه ده ؟؟ يعنى العز والهايلمان والمرسيدس والستات وكشك الحراسة وكارنيه نادى الشمس .. كل ده هايروح ...!!!.

- ايوة وتبقى مواطن عادى جدا .

- لا يا عم يفتح الله , حسين .. حسييييييييييين......

- ايوة يا فندم ؟

- شوفت شورتك المهببة .. هايسحبوا منى الوزارة !

- ليه يا فندم ؟ .. هو انت كنت ركنتها فى الممنوع ؟

- انت بتهزر يا حيوان ؟.. بكرة الصبح تروح تسحب الطلب المهبب ده .

- ما ينفعش ..لازم سيادتك اللى تروح تسحبه بنفسك

- اروح .. طبعا اروح .. قال يسحبوا الوزارة قال ؟!!

* * * * * * * * * * * *


رئاسة وزراء الجمهورية
ــــــــــــــــــــــــــــــــــــــــــــ



رئيس الوزراء يحدث وزير الثقافة :
- يعنى انت مقدم لى على استقالة؟

- يا فندم دى غلطة مطبعية .. انا قصدى اصطباحة مش استقالة .

- ايوة كده ياخى قل لنا حاجة نفهمها .. فين الاصطباحة دى ؟

يخرج سيجارة ملغمة ويناولها له:
- صباح العطر يا ريس

- صباح التنفس .. ده صنف عالى اوى .. ابقى سيب منه بره عشان الكل يتكيف

يدخل وزير الداخلية :
- صباح الخير يا فندم .. انا عايز استقالة .

- تعالى تعالى .. شد واحبس واتكيف

- يا سلاااااااااام .. دى حاجة فوق المزاج

- عجبتك ؟

- دى حاجة فلة .. هى دى الاستقالة ؟

- ايوة يا سيدى .. مبسوط .. ياللا ياض منك ليه كل واحد على وزارته .. مش اصطبحتوا , شوفوا شغلكوا .

الوزيرين فى نفس الوقت :
- اوامرك ... مساء الخيييييييييييييييييييييييييييييييير .

* * * * * * * * * * * * *


تمت

ههههههههههههههههههه ,,,,, جامد جامد الموضو ع ده !!!!

ههههههههههههه
ايه ياعم ده

عايزين اصطباحة

ههههههه
لا بجد تموت من الضحك

من افضل المواضيع اللى اتحطت فى المنتدى ككل


بس من الاخر كده احجبوا الموضوع


لان صاحب الموضوع وصاخب المحل هيتشدوا فى البوكس اللى خرج من مباحث امن الدوله علشان بتنشروا اوشاعات مغرضه وتتريقوا على الناس اللى مقضيه صبح وليل خدمه فينا

الناس دى ياخوانا خدامينا


حد يقول كده على خدمينه

ههههههههههههههه
موضوع جامد

جميل جميل جميل موضوعك يا محمد بجد

واما عن الضحك فأنا هموووت من الضحك هههههههههههه

شكرا يا محمد لموضوعك وفعلا من افضل المواضيع

ايه الكلام الجامد اوي ده

لالالا انا مقدرش علي كده


بجد احرجتوني

مرسي جدا علي الكلام الجميل اوي ده