أول حاجه احب انوه عن ان الشخصيه دي مختلفة تماما عن شخصية القيادي المعروفه (علشان محدش يزعل مني).
والاختلاف ده بيتمثل في الكلام الي هيجي بعد كده, اكيد كلنا صادفنا النوعيه دي من الناس ، النوعيه دي بتحب تقدم النصح والتوجيه والارشاد للناس (يشكروا والله) بس المشكله انهم مش بيقفوا لحد كده انما دايما بتلاقيهم بيدافعوا عن معتقداتهم بشكل وحشي وممكن يوصل للخناق لو ممشيتش ورا كلامه. بمعنى اصح الشخص الحبظلم هتلاقي تصرفاته بتقول يا اما هتعمل زي ما انا عايزك تعمل بالظبط يا اما مش هتعمل خالص 
.
صفات حبظلم (القيادي بالعافيه) العامة
حب سماع مشاكل الغير وابداء النصح 
القيادي شخص محب لسماع مشاكل الغير ، يعني على سبيل المثال لو اخدت رأيه في حاجه هوه احسن الناس الي ممكن تدلك على اقصر الطرق واحسنها بس ساعات خياله بيشطح لبعيد وبيقول كلام صعب تنفيذه ونصايح ممكن تعملك مشاكل وده بسبب انه مش بيبقى عنده علم بالمشكله ككل. يعني لو عندك واحد قيادي (حبظلم) صاحبك قوي وعايزه يستكنيص منك ويحبك اسأله في اي حاجه حتى لو عارف اجابتها ايه وحلها ايه. ساعتها هيسترسل في الكلام معاك وهتلاقيه متابع المشكله معاك اول بأول علشان يطمن انه حلهالك.
حب اقتحام الاحاديث 
القيادي مرهف السمع جدا وشخصيه ممكن ودانه تركز في كذا موضوع مع اكتر من شخص ، اول ما الموضوع يدخل في استفسارات او علامات تعجب هتلاقيه دخل في الوقت المناسب ، وممكن قبل الوقت المناسب كمان ، يعني لو واقف مع حد وبتتناقشو في موضوع عادي جدا انك تلاقي واحد تطفل على الحوار بتاعكم وبدأ يدي نصايح وارشادات ، ولأ انت الصح انك تعملها كده ، من الاخر واحد بتاع كله يفهم في كل حاجه واي حاجه وصعب جدا تقنعه ان مينفعش يبقى في واحد بيفهم في كل حاجه.
القيادي (حبظلم) محب للأشراف 
القيادي يعشق الادوار القياديه الي ملهاش صاحب ، يعني لو في اي مركز قيادي فاضي ممكن تلاقيه نط عليه وتقمصه في الغالب محدش بيقوله يعمل الدور ده انما القيادي استحاله يفوت الفرصه دي. على سبيل المثال لو انتو طالعين في رحله ملهاش قائد او مشرف ممكن جدا تلاقي واحد حبظلم طلعلكم ومن نفسه بدأ يدي اوامر وارشادات للناس كلها بدايه من سواق الاتوبيس (خلي بالكم لأنه ممكن ينصح السواق بطريق معين ومختصر يتوهكو في الصحرا وتعيشو فيلم الطائره المفقوده بس محدش هينقذكم)
سرقة الادوار القياديه (الحبظلميه) 
القيادي دايما بيحب يفرض سيطرته على المكان الي هوه فيه حتى لو اخد دور حد تاني يعني لو انت شخصيه ضعيفة شويتين وليك سلطه قياديه على ناس تانيه ممكن تلاقي القيادي (الحبظلم) تدخل في ادوارك وانت زي القله (على اساس انك مش عارف تمشي الناس) يعني ممكن الناس الي شغاله معاك تلاقيهم بدأو ياخدو الاوامر منه بدالك وبكده تلاقيه ركب فوقيك وبقى يقول الاوامر والتعليمات للناس الي معاك وطبعا في الحاله دي مش هيبقى ليك اي لزمه (اما راجل دزمة صحيح) أولا: حاول دايما تكون على علاقة كويسه مع الاشخاص القياديين وخصوصا في مجالات المصالح المشتركه لأن اي اهتزاز في العلاقة دي هيحطك في دماغه وهيعتبرك جلياط وناكر للجميل.
ثانيا: لو انت في رحله ولقيت واحد تقمص شخصية المشرف وبدأ يقول في التعليمات نفضله مادام محدش رشحه يبقى التنفيض احسن الوسائل معاه ولو قالك اصل انا الحق عليا قوله محدش طلب منك حاجه.
ثالثا: لو ليك دور قيادي في اي مكان خلي بالك من الحبظلميين علشان هتلاقيهم بيحاولو يدولك توجيهات ازاي تدير الفريق بتاعك ، حاول تدافع عن دورك بشراسه لأن لو سبته يدي اي حد معاك تعليمات يبقى انت كده بقيت فازة او ابريق فوق الرف يا معلم.
رابعا: في الاحاديث الشخصيه التعامل مع القيادي (حبظلم) سهل جدا ، نفس الطريقة المتبعه مع الشخص الحشري ، غير الموضوع علشان ميعرفش يمسك طرف الحديث منك. خامسا: الشخص القيادي (حبظلم) ساعات النصائح بتاعته بيبقى فيها فايده ، ممكن تستشيره في الامور الي انت محتار فيها بس خلي بالك مش بالضروره ان اراءه دايما صح. الحبظلم الي زيه: لو اتنين قياديين في نفس المكان هتلاقيهم مش بيطيقو بعض (ريسين على المركب بتغرق) لأن القيادي مش بيحب حد يقدم له النصح (على اعتبار انه دايما على حق) وكمان مبيحبش ان اي حد ميسمعش كلامه فا طبعا اتنين قياديين في نفس المكان الاحسن تاخد بعضك وتمشي علشان هيبقى في معركه ودم.
القيادي (حبظلم) ممكن تلاقيه في مجالات العمل التاليه
ادارة الافراد: 
القيادي احسن الاماكن الي ممكن يشتغل فيها هيه ادارة الافراد (ممكن نقول مقاول انفار برضه) لأنه هيستغل السلطه الي عنده في التحكم في الناس.
pf/gl hgrdh]d fhguhtdm fhguhtdi djugl
حبظلم القيادي بالعافية
العرض العادي
