لوحده , تعاطفك , كفاية!

تعاطفك لوحده مش كفاية!

بسم الله والصلاة والسلام على رسول الله صلى الله عليه وسلم
أما بعد...،

مين فينا لما بيفتح التلفزيون يتفرج على الأخبار أو لما بيبص فى جريدة عشان يعرف أحوال الدنيا مابيحسش بالألم والوجع من اللى بيشوفه او بيقرأه ؟!

يعنى مرة نلاقى بلد إسلامية بتضرب ومرة نلاقى واحد عايز يحرق المصحف ومرة نلاقي واحد بيسب فى صحابة الرسول رضى الله عنهم وفى أمهات المؤمنين ومرة نلاقى قنوات إسلامية بتتقفل وحاجات كتير توجع القلب

بلاش الأخبار خالص!

طب مين فينا لما بينزل الشارع ويتفرج على أحوال المسلمين مابيحسش بالوجع من اللى بيشوفه في شوارعنا ؟!

تلاقى واحد بيتخانق وبيسب الدين وتلاقى واحدة لابسة على رأسها حاجة غريبة وفاكرة نفسها محجبة وتلاقى واحد سامع الأذان ومعدى من جنب المسجد وكأن الأذان ده مايخصهوش وتلاقى واحد ماسك فى ايده سيجارة وبيعاكس فى اللى رايحة واللى جاية.

انا مش القصد من كلامى ان الدنيا سودة وكل حاجة وحشة ...
لا بالعكس
انا كل قصدى ان كلنا عندنا نفس الأحساس

أحساس الألم من اللى بنشوفه فى شوارعنا وبيوتنا وأحساس التعاطف مع أحوال أمتنا الأسلامية.
بس وبعديييييييييييين

يعنى بعد التعاطف ده عملنا إيه؟؟؟؟؟

يعنى مثلا اللى ما بيصليش و شاف إخوانه الفلسطينيين وهم بيتقتلوا وبيتعذبوا ومش لاقيين الأكل أو حتى الدواء اللى شافهم واتخنق واتضايق وكان هيعيط من اللى شافه
عمل ايه؟؟؟؟
هل بدأ يصلى وعاهد ربنا أنه يلتزم بالصلاة فى وقتها؟

و الأخت اللى بتقعد ساعة تتزين وتحط فى وشها الوان الطيف قبل ما تنزل من بيتها وتقعد ساعة كمان تظبط فى الطرحة وتعملها إسبانش وتعمل حاجات غريبة
الأخت دى لما سمعت الراجل اللى بيسب امها السيدة عائشة لما سمعت كده وزعلت وحزنت وقلبها كان هيتقطع من اللى بتسمعه عملت إيه ؟؟؟؟
هل ياترى بدأت تلبس الحجاب اللى يرضى ربنا وبكده تكون بتنصر السيدة عائشة؟

وأخونا اللى بيعاكس وبيشرب سجاير بنى وخضرا و حمرا وكل الألوان الأخ ده لما شاف القس الأمريكى اللى كان عايز يحرق المصحف بعد لما اتضايق اتخنق وقعد يدعى على الراجل ده
عمل ايه؟؟؟؟
هل تاب ورجع لربناوبقى ليه ورد من المصحف يقرأه كل يوم؟

خلاصة كلامى إن كلنا بنحب الدين ونتعاطف مع اللى بيحصل لأمتنا
لكن ....
تعاطفك لوحده مش كفاية!!
مش هقولك أتبرع ولو بجنيه
انا بس هقولك خد خطوة ، أعمل حاجة .. أى حاجة واوعى تستقل حاجة أو تحتقرها!!
أنت ماسمعتش حديث رسول الله صلى الله عليه وسلم الللى قال فيه
( لا تحقرن من المعروف شيئا ولو أن تفرغ من دلوك في إناء المستسقي ولو أن تكلم أخاك ووجهك إليه منبسط )

يعنى أوعى تحتقر أى عمل مهما كان بسيط من وجهة نظرك يمكن العمل البسيط ده ربنا يتقبله منك ويكون سبب فى دخولك الجنة
وبرده أوعى تحتقر أى خطوة تقرب بيها من ربنا قال رسول الله صلى الله عليه وسلم في ما يرويه عن رب العزة :
(من تقرب إلي شبرا تقربت منه ذراعا ، ومن تقرب إلي ذراعا تقربت منه باعا ، ومن أتاني يمشي أتيته هرولة)
يعنى كل لما تقرب لربنا ربنا هيقربلك أكتر

المهم تعمل حاجة - أى حاجة-
دور على سنن مابتعملهاش وأتعلمها وأعملها
أنصح واحد صاحبك يصلى ويبطل سجاير
أفتح المصحف وأقرأ كلام ربنا
بوس إيد والدك ووالدك وعاهد ربنا انك تطيعهم وماتزعلهمش تانى
أشترى مطويات فيها الأذكار ووزعها
أكتب معانا فى احلي منتدى تيفا
المهم تعمل حاجة - اى حاجة-
لأن تعاطفك لوحده مش كفاية !

ويا أخى لو مش هتعمل حاجة.. يبقى بطل حاجة!
يعنى لو مش هتعمل أعمال صالحة توب وارجع لربنا وبطل الأعمال الفاسدة
وإياك تقول يعنى توبتى دى هى اللى هتصلح حال الأمة؟
لأنى هرد عليك بقول الله تعالى فى سورة الرعد
(إِنَّ اللّهَ لاَ يُغَيِّرُ مَا بِقَوۡمٍ حَتَّى يُغَيِّرُوا۟ مَا بِأَنۡفُسِهِمۡ )
يعنى لو كل واحد أتغير وبقى أحسن أكيد أن شاء الله حال الأمة هيبقى أحسن
المهم تتحرك وتخلى فى نيتك أنك بتصلح نفسك واللى حواليك عشان ربنا يصلح حال أمتنا وخلى فى دماغك دايما أن...
تعاطفك لوحده مش كفاية!

---

juh't; g,p]i la ;thdm!

تعاطفك لوحده مش كفاية ,,

انا قلت بس هدخل واحد بيلم قرشين للمسجد هنتبرع ولو بجنيه ونطلع

بتقولى بقى يامحمد اكتب معاكوا فى منتدى ايه ؟