منصب , النساء , الوزارة

النساء و منصب الوزارة

قالوا الرجال إن النسا مالهمش في الوزارات
ونهار ابونا مِسا لو حكّموا الستات
في وزارة التموين و الاقتصاد بالذات
حتضيع فلوس البلد في اللبس و البوتيكات

بالذمة ده اسمه كلام
يبقى وزيرنا مدام
واسم البعيد فتكات
يختي عليه لو مشي
يدخل مجالس إشي
لابس قميص شفتشي

من كلمة واحده يختشي..وينزل صويت وعياط
يا اهل العلام والادب

اقروا التاريخ اللي انكتب..فوق الطريق علامات

كليوباترا حكمت بلد
بالحيلة ويّا الجلد
من غير لا خد ولا هات
وكام من وزير كان قفا

جه في الطريق واختفى .. ولهف وراه ألوفات

قصر الكلام يتقال .. مين فيهم اللي يفيد
مش مسالة عضلات

وساعات كتير ستات بيكونوا رجالة

ورجال بطبع النسا
وطالعلهم شنبات


Eman Bakry

---

hgkshx , lkwf hg,.hvm

لو الكلام ده اتكتب من سنتين كنتى لقيتى الأعضاء داخلين يتخانقوا بالشباشب

أنا من رأيى ايه المشكلة لما الوزير يبقى واحدة ست ؟

شكرا ياعبد الرحمن ع مرورك
بس ليه من سنتين بالذات مش فاهمه قصدك

لا أصلهم ما شاء الله بيموتوا فى النقاشات اللى فيها "الراجل ضد الست"

مش مسألة سنتين بالضبط أنا أقصد من فترة يعنى

ايون ايون طيب هما فين مش شايفه حد يعني قالي شكرا حتى

المنتجع أقصد المنتدى نايم بقاله فترة

أزمة وهتعدى

انا من رايى ان مفيش فيها مشكلة ان الست تكون وزيرة او قاضى
طالما هى مؤهلة للمنصب دة وهاتكون قد المسؤلية
شكرا ملكة على الموضوع الجميل دة

انقل الموضوع من الادبى الى اى منتدى حوارى وهنلاقى الموضوع يحصله زى ما قال عبده بالملى

على العموم الستات لو مسكوا وزاره هيتنصب عليهم بسهوله

يعنى الوزراء الرجاله هما اللى بيسرقوا لو كانوا ستات هيتسرقوا

كمان كفايه فضيحه عائشه عبدالهادى الوزراء الرجاله يمكن عملوا نفس الفضيحه بس ذكائهم مخليهم ميعملوش كده مع سوزى وقدام الكاميرات

يختى احنا خدنا ايه من الرجالة غير حلاقة الدقن

وبعدين عادى لو كانت وزيرة وحدة فشلت طيب متشوفوا الوزراء الفاشلين الرجالة اد ايه

يعنى الوزراء الرجاله هما اللى بيسرقوا لو كانوا ستات هيتسرقوا

بس لو هيتسرقوا ممكن فى يوم يكتشفوا مين السارق
لكن لو هم اللى سرقوا زى ما الرجالة هيبقى حاميها حراميها

المنتجع أقصد المنتدى نايم بقاله فترة

لو عالمنتجع فاحنا بتوع المنتجعات ومام نايم يبقى عاوز خطة تسويقية جامدة بافكار جديدة تجذب اليها العملاء
لو المنتدى يبقى نرش ميه عالاعضء عشان يفوقوا