الجنيه بخمسة دولار .... ونص

**mohamed ali** · 2007-01-08, 03:58 AM

منذ فترة ظهرت مشكلة كبيرة في العملة الصعبة خصوصا بعد انهيار الجنيه امام الدولار بالضربة القاضية ,فاجتمعت هيئة الحشاشين الحكومية لمناقشة القضية

- ايه اللي حصل للجنيه ده .. دي عمرها ما حصلت

- فعلا الجنيه دلوقتي بقي يساوي خمسة وتلاتين قرش بالكتير

- يا جماعة الجنيه محسود ومعمول له عمل علي رجل نملة شيللاه يا اسيادنا

- طب والحل يا جماعة

- لازم نبخر وزارة الماليه

قام عضو متشدد دينيا وقال:
- يا جماعة دي ناس مؤمنة , كاتبين علي ضهر الدولار " بالله نؤمن " أما احنا حاطين صور أصنام والعياذ بالله , البلد دي مش هاتشوف خير أبدا

- يا عم ابو لهب انت اهدا , دي مش أصنام وبعدين ماحنا حاطين من قدام علي كل العملات صور جوامع ومآذن وكلها تقوي وايمان.. شفت الجامع اللي علي العشرة جنية , حاجة تفرح والله

- لازم اولا نعمل كونصلتو للجنيه , الجنيه كش وصغر وبقي شبه النص جنيه والدولار كبير وورقته أكبر من كف الأيد

- يبقي نكبر حجم الجنيه عشان يبقي قد الدولار بالضبط , وساعتها يبقي ماحدش أحسن من حد

- كمان الجنيه لونه أصفر وهزيل زي ما يكون عنده السل , أما الدولار لونه أخضر مزهزه والخير باين عليه

- خلاص , يبقي نغير لون الجنيه ونخليه أخضر عشان الخير يعم وعندنا المطابع والحبر والورق , مافيش مشكلة.

قام رئيس الحشاشين وقال:
- حيث كده بقي ماتيجي نختصر و نطبع دولارات بدل الجنيهات , واهي أكسب .

- فكرة ممتازة يا فندم , ساعتها الدولار يكتر وما يلاقيش حد يشتريه وسعره ينزل الأرض .

- والجنيه يغلا ويبقي بخمسة دولار ونص

- وتيجي تصرف جنيهات من البنك الموظف مايرضاش , ويقول لك الجنيه دا عملة صعبة .. ممكن تصرف بالدولار .

- طيب والتضخم ؟؟

- التضخم دا هايبقي هناك في أمريكا ( ربنا يهدها ) تفضل تتضخم تتضخم لحد ما تفرقع ان شاء الله

- وممكن ساعتها نعمل صفقة مع بوش علي طريقة الأفلام العربي

- إزاي

- هو ييجي بشنطة البضاعة وواحد مننا يروح بشنطة الدولارات اياها , وفي محطة مترو محمد نجيب جنب شباك التذاكر
يتم تبادل الشنط ويروح علي بلده بالدولارات المضروبة .

- ونقوم فاقعينه مهموز و نبلغ عنه يقوم يتقفش في المطار ويتحبس ونخلص بقي منه ومن أذاه .

- والله فكرة

وتم الاتفاق علي أن تطبع الحكومة شوية دولارات تفك بيهم زنقتها وبعد أن طبعت كمية تجريبية جئنا بخبير عالمي في التزييف والتزوير ليبدي ملاحظاته علي الدولار المصري

" إن ما تحقق علي أرض مصر هو إنجاز غير مسبوق تاريخيا , والدولار المصنوع محليا متقن للغاية وممكن يغش أي هاو ولكن هناك عدة ملاحظات بسيطة يجب مراعاتها في الطبعة الثانية وذلك للوصول بالانتاج المصري من الدولار إلي الكمال

- أولاً : لا يوجد عملة قيمتها تسعة دولار .
- ثانياً : الدولار الأمريكي لا يحمل صورة روبي بالزي الفرعوني .

- ثالثاً : لا يوجد دولار مكتوب عليه " البنك المركزي المصري " .

غير هذا لايوجد فرق بين الدولار الأمريكي والدولار المصري وربنا يوفق بلدنا للخير دائما .

وبالفعل أخذت الحكومة برأي الخبير ويتم الآن تلافي الأخطاء الصغيرة السابق ذكرها , وحين يتم طبع الدولارات الجديدة ( وهذا بيني وبينكم ) يمكننا الإبلاغ عن الحكومة بتهمة إصدار عملات مزيفة , وبكده نرتاح من الحكومة لمدة عشرين سنة بالميت .

قولوا آمييييين

hg[kdi folsm ],ghv >>>> ,kw

**la princesse** · 2007-01-08, 07:55 AM

ههههههههههههههه
يعنى حتى فى التزييف والتزوير فاشلين بردو
مفيش فايدة
يا ساترررررررررر

**MERAMADA** · 2007-01-08, 09:15 AM

موضوع جامد جدا وفكرته رائعه
مفيش حاجه بيفهموا فيها خالص....!!

**mohamed ali** · 2007-01-08, 04:45 PM

اقتباس:

المشاركة الأصلية كتبت بواسطة la princesse

ههههههههههههههه
يعنى حتى فى التزييف والتزوير فاشلين بردو
مفيش فايدة
يا ساترررررررررر

نعمل ايه بس انا بدات اقلق علي المنتدي

ربنا يستر

**Muhamed** · 2007-01-08, 05:09 PM

الله اكبر

المصريين عرفوا يضربوا الدولار يا رجاله

مبروك لمصر

ومبروك مبروك مبروك

مبروك يا ناسنا واهلينا

يارب كتر افراحنا يارب كتر افراحنا

وعلى قد نيتنا ادينا

تسقيفه

تسقيفه يالى

تسيقفه للى فرحنا

وضربنا الدولار فى العيد

ان شاله يعيش ان شاله

كمان يا جماعه ال 3 ملاحظات دى بسيطه يعنى

مش مشكله

- أولاً : لا يوجد عملة قيمتها تسعة دولار .

هنحط جنب ال 9 صفر وبكده هتبقى 90 ودى عمله موجوده

- ثانياً : الدولار الأمريكي لا يحمل صورة روبي بالزي الفرعوني .

يا سيدى هنلبسها اللبس بتاع بريتنى سبيرس

- ثالثاً : لا يوجد دولار مكتوب عليه " البنك المركزي المصري " .

يا سيدى اهى دى غلطه مطبعيه وفعلا لازم نغيرها

وهنكتب

C.B.E