اه يا زمن..ـ

**عاشق الايمان** · 2010-06-03, 08:48 PM

اه يا زمن..ـ

احيانا بيظهر فجأة في حياتك حد من زمان.. من زمان ماشفتهوش .. من زمان ماسمعتش عنه.. يظهر في ورده في كتاب قديم.. يظهر في صورة من سنين.. يظهر في كلمه تتقال او رسالة تتقري.. يظهر بشخصه في الطريق.. او وانت ماشي تلمحه.. شكله اختلف.. صوته اختلف حتى يمكن خط ايده برضه اختلف.. بس هو.. انت عارف انه هو..

اه يا زمن..!! ـ

فجأة و بدون مقدمات بتلاقي نفسك دخلت في شريط ذكريات.. ذكريات فرح و ذكريات حزن و وجع.. صور و فلاشات بتنور و تطفي قدام عينيك.. و تحاول تغمض علشان ماتشوفش حاجه .. تلاقيها محفوره جوه عقلك.. كل اللي عمله بظهوره انه شال من عليها التراب!!ـ

تلاقي نفسك فجأة تبتسم و يمكن تضحك و تداري لايقولوا اتجن.. و فجأة برضه عنيك تدمع وانت مش داري بس دي تخبيها ليه ..دي امر عادي و كل واحد عنده هم يبكيه.. محدش بيسال بتبكي ليه .. الكل بس بيستغرب لما الضحك يعم.. خير اللهم اجعله خير .. بتضحك ليه.. ساعتها ماتعرفش تقول ايه.. افتكرت حاجه ضحكتني.. ذكرى فرحتني.. ايام ماكان القلب رايق و الحياه ايام فرح و كل شيء ماهوش مهم!!؟

تحس فجأة انك كبرت.. ان الزمن فات بالسنين.. كل حاجه مابقتش هي.. الكلام بمعاني تانيه.. حتى نظرات العينين!! كل حاجه اتغيرت مش بس فيك.. دا فيكم انتوا الاتنين!!ـ

و تبقى نفسك تحضن فيه ايامك اللي فاتت و كل الذكريات و تحاول تتكلم و تتكلم.. بس ابدا مش طالع كلام.. مانت عارف.. لو اتكلمت هاترجع تلوم نفسك او تلومه.. و يمكن تلوم الايام.. اللي بعدتكم و اللي في يوم تاني جمعتكم..ـ

بس ابدا ماينفعش ملام!!ـ

hi dh .lk>>J