مصر , مسرحياتك

يا مسرحياتك يا مصر

أحلى حاجة فى بلدنا انها بلد مسلية جدا

عمرك ماتحس فيها بملل خالص

فى بلاد كدة اخبارها واحدة واحداثها واحدة

إنما احنا مش كدة خالص

احنا فى مصر بلد الفنون واصل التسلية كلها

مصر فى تسليتها بتعتمد على أبو الفنون شخصيا


المسرح

ومش بتقدم اى نوع من المسرحيات

لأ دى بتقدم المسرحيات الهزلية العبثية بالتحديد


عشان التسلية تبقى للركب


إزاي تحس بملل وانت عندك كل المسليات دي يا جدع؟

عندك مسرحية الأنفلوانزا الخنزيرية مثلا

ودي مسرحية على ثلاث فصول

الفصل الأول : إعدام الخنازير

الفصل الثاني : الحج والعمرة



الفصل الثالث : يا مدرسة الهنا تغورى انتى واعيش أنا

ومسرحية الأنفلوانزا الطائرة


ومسرحية الكورة الحديدية

ومسرحية القمامة النظيفة

ومسرحية المياه المبلولة المقطوعة

ومسرحية النظافة على أصولها الحديثة

ومسرحية نقاب وميكروجيب



ومسرحية النار فى الاسعار

ومسرحية الفن الحلزوني

ومسرحية الفتاوى المجانية

ومسرحية المواصلات والمرور الكوميدية

ومسرحية الإعلانات الإلحاحية



ومسرحية الصحافة الرداحة والمقالات الفضاحة

ومسرحية صراع الأفيال

لبطليها احمد شوكير ومرتضى مذهول

ومسرحية الآثار الحواوسية

ومسرحية دماء فارس الشرق على أعتاب اليونيسكو

ومسرحية البطالة العمومية

ومسرحية الجهل المستديم

ومسرحية الفقر النمائي

ومسرحية الضرائب االعقارية البطرسية

ومسرحية الجمعيات الخيرية الشحاتية

ومسرحية الخصخصة المحمودة

ومسرحية مواطن بلا ماهية او هوية

والقنبلة الكبيرة بقا

مسرحية التوريث المباركية

*****

أكيد محدش حيستجري يقول ع البلد نص كلمة

ومحدش حيقدر ينكر بعد كدة ان بلدنا مسلية فعلا


معاك انك ممكن تتشل وانت بتتفرج

او يجيلك حول مزمن

او ارتشاح فى ماسورة الشريان التاجي

او تفقد القدرة على التفكير من اساسه

بس الاهم من ده كله اننا بنتسلى

وبنشوف فن هادف

مصر بتتقدم بينا يا جماعة وبمسرحياتنا

تصفيق حاااااااااااااد للبلد بقا



وأوعى حد يحدف طماطم

عشان الخُضرى متراقب



وصدق اللى قال



ومـا مصـر الا مســرح كبيــر

---

dh lsvpdhj; lwv

بصراحة مش عارفة أرد أقولك إيه
كل اللى هاقوله
شر البلية ما يضحك
وإحنا بقى الشعب الوحيد اللى لما يتوجع اوى يضحك ما يبكيش وبيبقى عارف ان الضحك ده بكاء بس بيضحك وبيضحك اوى كمان
يقول هيــــــــــــــــــه بكرة تفرج وتتعدل
ودى بقى سواء كان ميزة واللا عيب الصفة دى أنا بحبها فينا.

موضوع جميل ومؤلم
تقبل مرورى

الموضوع ده فكره عالى
وسياسته جامدة
بس لما نحب نتغير
والبلد تبقى زى ما نحب
لابد أن نعمل بقوله تعالى :
إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ [الرعد : 11]
أو زى ما أحد السلف قال :
أقم دولة الله فى قلبك *** يقيمها االله لك على أرضك