في رعاية الله وأمنه ياتيفا

**Eng.Shapon** · 2010-05-31, 12:27 AM

السلام عليكم ورحمة الله وبركاتة

ازيكم جميعا / اعضاء - مشرفين - اداره - محظورين - موقوفين

يؤسفني طبعا اخباركم بأني سأسافر الجمعة القادمة ان شاء الله الي طرابلس (مسقط رأسي)
وطبعا تواجدي هيكون شبه معدوم .فأتمني من الاداره ان تتخذ الازم
ومنح الاشراف للقسم الاسلامي لمن يستحقة .

اما عن باقي المنتدي فبجد هيوحشني كل ركن فيه
هيوحشني كل عضو شرفني في موضوعاتي .

فأي حد كان شايل مني او زعلان مني - انا عارف انهم كتير

- ياريت يعرفني
عشان اجهز الحيطة

انا بعتذر لأي حد اسأت ليه او جرحته ، غصب عني مش مقصود الاسائة طبعا
ومبروك لكل عضو جلس علي كرسي الاشراف
واتمني كل مشرف فرعي يجتهد ويبقي مشرف عام

ومبروك لرجالتنا بتوع اولي ثنوي وعبال الثانوية كلها
وماينسوناش بس في العزومة

وصية بس من مشرف سابق
العبوا مع بعض ياولاد ماحدش يتخانق في منتدي المشرفين
مش عايزين الصوت يعلي

احسن هرش مية عليكم وكل واحد يلعب قدام بيته هههه

وياريت ماتنسوش ان في واحد اسمة شابون كان بينكم ومعاكم
ويتمني دعاكم

في رعاية الله وأمنه ياتيفا

td vuhdm hggi ,Hlki dhjdth

**عيون الحب** · 2010-05-31, 12:35 AM

هتوحشنا والله ياشابون
المنتدي هيبقي مضلم من غيرك
وربنا يوفقك وتوصل بالسلامة

**مصطفى شاكر** · 2010-05-31, 07:55 AM

ربنا يتقبل منكـْ
ادعيلنا هناكـْ
ذنبكـْ مغفور
<<<< واحد فاهم غلط . . .

فى رعاية الله يا أخي ، باذن الله تطمئناعليك من هناكـْ

**ابن مصر** · 2010-05-31, 10:44 AM

انت ياض ، أنا سألت عمي القذافي قالي انه خلى حماتو يوصل نت من طرابلس لغاية بنغازي

مرورا بسرت

مستهبلش فيها وهتدخل يعني هتدخل

وبعدين احنا نتمنالك كل خير رغم اني مش زعلان منك خالص بس هعمل فيك ايه

هتسافر قبل ما ازعل منك

يلا بقى مش مشكلة

اهم حاجة تاخد بالك من نفسك وابقى خلي بالك من الخيمة اللي على شط طرابلس الكورنيش نمره خمسه

كل ما تشوفها افتكرني

وان صادف الحظ ومشوفتهاش ابقى افتكرني برضه

أتمنالك حياة زوجية سعيدة ،، يووووووه حياة عملية سعيدة وسلملي على باسم اخوك اللي في المهجر

ونتمنالكم جميعا التوفيق والفلاح

تحيتي ياجميل ومتنساش تعطيني رقمك اذا كان المحمول وصل ليبيا وان موصلش ابقى رن عليا من

التليفون الارضي ان كانوا عمروا الصحرا وركبوها

وان مكنش قضيها جوابات مع اني عارف ان الطليان ضربوا مصلحة البريد وعمر المختار ملحقش يبنيها من جديد

وسلامنى للقذافي وقوله عيب كده لازم تجيب فرقكم تلعب مع مصر والقرار اللي اخدته اول امبارح

عمك احمد زعلان عشانه اوي

بالتوفيق ياجميل

**فجر الاسلام** · 2010-05-31, 05:18 PM

ايه الاخبار الوحشة نازلة علينا النهاردة
باتدى بضرب اسطول الحرية
وانتهى ان شابون بيودعنا

متقلش كدا يا شابون هو مش فى نت فى ليبيا ولا ايه انت هتهاجر ولا ايه من المنتدى
دى ليبيا جمبنا هنا على اول الشارع

ابقى ادخل منه عالمنتدى كدا كل فترة بلاش تهاجر المنتدى نوهائى

مين بئة هيشيل المنتدى الاسلامى معايا

عالعموم بتمنالك التوفيق فى الجماهيرية الليبية فى ظل الرئيس القذافى طويل العمر يطول عمره ويزهزه عصره وينصره على من يعاديه هااااهيييى

وياريت اى فرصة تجيلك فى ليبيا تدخل نت متنساش تنورنا فى تيفا

**مـــــلآك** · 2010-05-31, 08:37 PM

ربنا يوفقك ويعينك شابون ويوصلك بالسلامة
وبجد والله انت هتوحشنا
ومع انى اصلا يعتبر متعملتش معاك بس
بجد اتاثرت بالموضوع جدااا
ولازم طبعا تدخل من كل فترة للتانية عشان تطمنا عليك
خالص تحياتى ليك

اختك/نور الرحمن

**حبيبـة ابـوها** · 2010-05-31, 09:14 PM

بتمنالك كل التوفيق فى حياتك ان شاءالله
وربنا يكرمك ان شاءالله ونسمع عنك كل خير ان شاءالله
انت وكل اخواتنا التيفاويه يااااااااااااارب
with my best wishes 4 u

**عاشق الايمان** · 2010-06-02, 09:47 AM

استني ياشابون اعي تمشي الا لما اجي اسلم عليك

اقتباس:

المشاركة الأصلية كتبت بواسطة eng.shapon

وانا هكون اول مشترك عشان اخلع من الغدا

طبعا محافظة الرجاله (دقهلية)
مركز الرجاله دكرنس

بلد الجرايم كفر عبد المؤمن هههه

جنب المضيفة بالمللي

محلات المدار سابقا
بتهيألي كده كفايا

ولا تحبوا اوصف السلم بتاعنا والصاله واوضتي بالمره

انا تهوت ياشابون في العنوان بتاعك

انت قولت جمب المضيفه دخلت هناك لقيت زريبه

فقولت يمكن يكون العنوان صح

سألت عليك هناك

محدش رد عليااا

ممكن وصف دقيق جداااا للعنوان الصح

ولا اقولك

عموما توصل بالسلامه ياشابون

وبالتوفيق ان شاء الله

**Eng.Shapon** · 2010-06-03, 12:25 AM

اقتباس:

هتوحشنا والله ياشابون
المنتدي هيبقي مضلم من غيرك
وربنا يوفقك وتوصل بالسلامة

ربنا يخليك ياعيون
انت اكتر والله
الله يسلمك ياريس

اقتباس:

ربنا يتقبل منكـْ
ادعيلنا هناكـْ
ذنبكـْ مغفور

هو انا رايح علي الجيش ولا ايه
برده واحد فاهم غلط ههه
اشكرك اخ مصطفي ، وان شاء الله هحاول ادخل واطمنكم

الكينج كونج احمد باشا

اقتباس:

أتمنالك حياة زوجية سعيدة ،، يووووووه حياة عملية سعيدة وسلملي على باسم اخوك اللي في المهجر
ونتمنالكم جميعا التوفيق والفلاح

ويوووه ليه ؟ انت كده اتكيت علي الوجيعه

نفسي اعرف توفيق مين اللي في الاخر دا لأ وكمان توفيق طلع فلاح / بليز ترجمة مستر احمد
الله يسلمك يااحمد بالتوفيق للجميع

اقتباس:

تحيتي ياجميل ومتنساش تعطيني رقمك اذا كان المحمول وصل ليبيا وان موصلش ابقى رن عليا من التليفون الارضي ان كانوا عمروا الصحرا وركبوها

هو انت متأكد انك بتتكلم علي ليبيا ولا عزبة الحبشي ؟؟
ارجوا الاتصال في وقت لاحق

اقتباس:

متقلش كدا يا شابون هو مش فى نت فى ليبيا ولا ايه انت هتهاجر ولا ايه من المنتدى
دى ليبيا جمبنا هنا على اول الشارع
ابقى ادخل منه عالمنتدى كدا كل فترة بلاش تهاجر المنتدى نوهائى
مين بئة هيشيل المنتدى الاسلامى معايا

لأ فيه نت وكل حاجه بس الوقت
مافيش وقت
وطبعا هيبقي فيه التزامات كتير وكده وربنا يسهل
وعلي رأيك ليبيا جنبنا فركة كعب
اشكرك فجر وربنا يوفقك يارب

اقتباس:

ربنا يوفقك ويعينك شابون ويوصلك بالسلامة
وبجد والله انت هتوحشنا
ومع انى اصلا يعتبر متعملتش معاك بس
بجد اتاثرت بالموضوع جدااا
ولازم طبعا تدخل من كل فترة للتانية عشان تطمنا عليك
خالص تحياتى ليك

ربنا يخليك يانور صاحبة واجب زي بنت عمتك

انتي فعلا ماتعملتيش معايا بس ان شاء الله هتسمعي من كل خير
بس ياريت ماتسمعيش من فجر - اصل في طار قديم ههههه

اقتباس:

بتمنالك كل التوفيق فى حياتك ان شاءالله
وربنا يكرمك ان شاءالله ونسمع عنك كل خير ان شاءالله
انت وكل اخواتنا التيفاويه يااااااااااااارب

ربنا يكرمك يارب
وانا كمان والله اتمني لكل واحد الخير والتوفيق
اشكرك حبيبة / وربنا يوفق الجميع

اقتباس:

انا تهوت ياشابون في العنوان بتاعك

انت قولت جمب المضيفه دخلت هناك لقيت زريبه
فقولت يمكن يكون العنوان صح
سألت عليك هناك
محدش رد عليااا

ممكن وصف دقيق جداااا للعنوان الصح

زريبة !! يااااي ايه دا لالا بصراحة ريحة المنتدي اتقلبت
ايه دا ياسعاده المشرف
احنا لسه منضفين المنتدي وبخين معطر تيجي انت تبوظ كل دا

هاتوه احظروه ثم اوقفوا ومن ثم اقتلوه
خلاص ياعم عفونا عنك

ياباشا عنواني اشهر من ماركت ابوزيد هههه
تنور في اي وقت ياباشا بيتك