خير الكلام ما قل ودل..!!

**osmany779** · 2008-11-18, 11:04 PM

خير الكلام ما قل ودل..!!

1- كل ما أمسك كارت دعوة لفرح او خطوبة ابدا ما تلاقيش مكتوب إسم العروسة وديما بيعبروا عنه بأحد الحروف الانجليزية،ولما سألت ليه قالولى (عيييييييييب)، مع إنى عارف إن إسم المرأة مش عورة .

2- سوزان تميم تزوجت من هشام طلعت مصطفي وإنتهت فى القرافة و دينا إتجوزت من رجل الأعمال حسام ابو الفتوح وإنتهت بفضيحة ، وذكرى تزوجت برجل الاعمال أيمن السويدي وإنتهت بمذبحة ، وإلهام شاهين تزوجت برجل الاعمال عزت قدورة وإنتهت بالتهديد بميه النار ... هو ليه بأه الفنانات ديما بيتجوزوا رجال أعمال؟!!

3- إعمل جولة حلوة فى القاهرة وإكتشف أسماء الشوارع والحواري الغريبة ، فمثلا عندك منطقة ( بطن البقرة) وشارع ( حوش الغجر) وشارع ( السكر والليمون) وشارع ( الوزة والبطة) ، وفى الجيزة عندك شارع ( الزعبلاوي ) و(حنتوش) و( قرني) ...هى يا جدعان أسماء الشوارع فى مصر بتتسمى على اساس ايه ؟!!

4- من حب الشعب المصري للحكومة أطلقوا على زوجاتهم عند الكلام عنهن مع الاغراب اسم ( الحكومة ) .

5- بشرى لكل السميعة ، أخيرا حال الغناء حينصلح فقد أعلنت الفنانة سمية الخشاب انها بصدد إنتاج أول ألبوم غنائي لها والعاقبة عندكم فى المسرات .

6- عند ضريح الإمام الشافعي يوجد صندوق يلقى فيه بعض الناس مش بس الفلوس دول كمان بيلقوا ورق مكتوب فيه طلبات من الامام الشافعي ، ومن ضمن تلك الجوابات ورقه القاها موظف كاتب فيها إسمه ورقم موبيله وبيقول فيها هاتلى حقى من الحرامية اللى سرقوني يا إمام ...بجد حال الناس بأه يبكي !

7- أهم 3 طوابير يمر بهم الإنسان فى حياته طابور الصباح وطابور العيش وطابور صرف الراتب ومع الاعتذار للطوابير الأخرى .

8- لو سمعت فى التليفزيون جملة ( التغيير من الداخل) يبأه قصدهم جلدة الحنفية ، ولو سمعت ( عجلة التنمية ) يبأه اديها زقة .

9- بمناسبة إحتفال فرنسا بذكرى الحملة الفرنسية على مصر ، أرسلت مصر وفدا رسميا للمشاركة فى هذا الاحتفال ، لأول مرة دولة كانت محتلة تحتفل بذكرى احتلالها ، صحيح العشرة متهنش غير على ولاد الحرام .

10- مؤلف أغنية (أه من عنياه ) لأصالة يظهر لم يدرس فى الحضانة إن ( من ) حرف جر .