يوميات فى عالم الكمبيوتر (احكى قصه مشكلتك وكيف اتحلت وما هيا العبره)

الفكره دى جتلى وانا قاعد بعمل اسكان على المخروب اللى عندى علشان نصيحه شقيقى الاكبر هنا فى المنتدى اللى قالى جهازك عليه فيرس


ففكرت وقلت ليه الاعضاء اللى ليهم خبره مع الكمبيوتر والانترنت يعملوا موضوع يحكوا فيه تجاربهم الشخصيه مع المشاكل والفيروسات اللى واجهتهم قبل كده


علشان تبقى خير مثل للعضو المبتدئ فى عالم الكمبيوتر والانترنت


طبعا انا يوميات كبيره وكتيره


بس برضه عايز مشاركه من الاعضاء زوى الخبره

يعنى يكتبوا المشكله اللى قابلتهم وكيف حدثت


وكيف شعرو بها

وكيف اصلحوها لو اصلحت

وياريت اللى هيتكلم يحط شرحه فى اطار قصه علشان العضو ميملش من الشرح او يزهق منه


المهم


هبدأ انا باول قصه ليا


وكانت فى بدايه عهدى بالكمبيوتر وطبعا كلنا كنا مبتدئين وانا بعترف انا لسه مبتدا فى هزا البحر الملئ بالمعلومات


المهم كان الجهاز قاعد عندى سنه تقريبا من ساعه مجبته وكان استخدامى ليه مكفى على لعبه السويليتير

لغايه مواحد صاحبى الله يكرمه جابلى لعبه age of empire

وقعدت بالاسابيع العب بيها

وكانت اللعبه عندى ليها اسطوانه وكمان زنزلتها على الجهاز


المهم

جه يوم وانا بلعبها لقيتها وقفت


استعجبت للامر

قفلت الجهاز علطول وشغلته تانى

وجيت اشغلها برضه وقفت علطول

المهم رحت قافل الجهاز فتره كده


وبعدين اعدت التشغيل

اللعبه اشتغلت

وقعدت العب فتره طويله حبتين

وفاجاه اللعبه وقفت تانى

(خلى بالكم معنى ان اللعبه وقفت ان الجهاز هنك مدلم لا يستجيب لامر

control+alt+del)


كده انا شرحت المشكله


كيف عرفت بقه بالسبب


كان فى الفتره دى مكنتش بقعد على الكمبيوتر لانى مكنش فيه غير اللعبه

دى وكانت على مانا افتكرت ان العيب فيها وانها السبب فى التهنيج


فجربت وقلت طب اشغلها من الاسطوانه واشوف


وبالفعل اشتغلت مره


بس قفلتها بسرعه لانى كنت بجربها بس


جه فى المره اللى بعدها


جيت ادخل الاسطوانه دخلتها معوجه

يعنى مش لابسه فى السى دى روم كويس


كان النتيجه ان السى دى روم قفلت

وهبه


تك تك تك


الاسطوانه ادشتش ميت حته جوه السى دى روم


طبعا صوت شويه

منا كنت جديد بقه وقلت الجهاز خرب


المهم بعد فتره

وديت الجهاز يتصين مع المهندس اللى كان معى والدى لما جابه


على اساس انه هيصلح السى دى روم


جه المهندس بعد فتره

وهوا مرجع الكيسه بعد ما صلح السى دى روم

وقالى هوا الجهاز كان بيهنك معاك


قلت اه عرفت ازاى


قلى كويس ان الاسطوانه اتكسرت علشان افتح الكيسه واشوف


اتارى المروحه واقفه


وبالتالى حراره البروسيسور عاليه


وكان نتيجه التهنيكه اللى مكنتش عارفلها سبب


لان البروسيسور المحترم ليه لميت معين للحراه لو عدها يفصل من نفسه علشان ميتحرقش


فدى النقطه اللى عايز اوصل فيها معاكم


لو لاقيتو الجهاز بتاعكم بيهنك كل شويه

خش على bois واتاكد من درجه حراره البورده


المفروض تبقى اخرها 50 ولا حاجه


ان شاء الله فكرونى فى مره تانيه احكى لما كبرت شويه وفتحت الكيسه وكانت المروحه شغاله قدامى والحراره كان 89


والسلام ختام

---

d,ldhj tn uhgl hg;lfd,jv (hp;n rwi la;gj; ,;dt hjpgj ,lh idh hgufvi)

الله عليك يا ماندوز وعلى الموضوع الى فوق الفزيع وتحت المريب

لا لا ولا تاخد فى بالك

المهم انك عارف انى ليه مغامرات فى الموضوع ده

اطرف حاجة حصلتلى يمكن من حوالى 4 ايام

فى جهاز فى السيبر البوردة بتاعته من نوع غير معرف دوليا ولا محليا

وال SETUP بتاعها ربنا ما يوريك

المهم فى يوم من الايام

بفتح الجهاز لقيته الويندوز ساقط

ومش كنت عامل حسابى وساحب نسخة جوست

قلت يا دى اليوم الى مش هيعدى

لان الجهاز ده مشكلة انك تعرف السيدى رروم ماستر عليه

المهم فضلت احاول ييجى ساعة الى ربع فى الموضوع ده

ومفيش فايدة

المهم فضلت قاعد امام الجهاز انا ابصله وهو يبصلى

لحد ما جاتلى فكرة هى فكرة بسيطة بس مش عارف تنفع مع كل الاجهزة ولا لا

المهم انا عملت الاتى

1 - خليت الجامبر بتاع السيدى روم ماستر
2- خليت الجامبر بتاع الهارد سلاف
3 فىى البوردة فى 2 بورت لكابل الداتا
فى البورت الاول حطيت الكابل بتاع السيدى رووم
وفى البورت التانى حطيت الكابل يتاع الهارد

وخلاص دا اخر حل عندى لان البوردة مش فيها امكانية تحديد ال1ST BOOT DEVICE

وفتحت الجهاز وفجاة

السيدى روم اتعرف ماستر

ونزلت الويندوز

وهى دى مغامرة انهارده

ولى عودة باذن الله فى مغامرات اخرى

تقبل تحياتى

قصص حلوة اوى ...

خدو هذه القصة بقى ... قصة بعنوان

3 جنود نورتون ومكافى وافج فى مواجهة 3 جواسيس (فيروسات يعنى)

خدو منى هذه القصة التى يهتز لها الفؤاد وترتعد لها الفرائص هذه قصة ثلاثة فيروسات كانوا بيحبوا بعض وكانو مزنوقين على موقع ومن ساعة ما الكامتن هريدى ميدى ما رفعهم وهما ما نزلوش عند حد لسه وزى مانتو عارفين بقى الفيروسات تحب تتجمع على مواقع السريلات والكراكات والذى منه
المهم كان فيه 3 فيروسات نايمين على موقع سريلات وكان مزاجهم وحش اوى
ليه ؟؟
اصلهم نايمين على الموقع من زمان ومستنيين واحد بؤلظ مش مصطب انتفيروس ولا حاجات من دى يدخل يقوموا ينزلوا عنده يهيصوا شوية اصل الموقع معلهوش حاجه حلوة زى مانتوا عارفين
يادوب شوية ملفات وحاجات من دى المهم دول كانوا عاوزين ينقلوا على جهاز إيجار جديد وينزلوا يعملوا شوبنج ويستجموا ويعملوا كام عملية ارهابية كدا على اى جهاز ابن حلال
عشان يترقوا وغير كدا يبعتوا معونات لاخواتهم على الموقع

المهم جه واحد ابن حلال ولا داعى لذكر اسماء بيدور على سريال وناسى انه مش مصطب نورتون ولا افج ولا مكافى ولا اى انتفيروس يوحد ربُنا
المهم دخل يجيب سريال برنامج هوب قام التلت فيروسات ناطين عنده على الجهاز

يجيب فيهم يمين يجيب فيهم شمال مش عاوزين يمشوا
طيب ياجماعة امشوا بالزوق مش راضيين برضوا

طيب انا هروح لعمو نورتون انتيفيروس قام قايله وندهله جه يتصطب وبعد ما اتصطب عمو نورتون مش عرف يعمل حاجه
طيب تعالى انت يا مكافى ... اوعى وشك الوحش جه طلع مكافى زى ما المثل بيقول
(جبتك ياعبد المعين تعين لقيتك يا عبد المعين عايز تنعان )
طيب وسع وسع .. افج جااااااااااااااااااااااى عمو جه ياولاد عمو جه ياولاد !!
فيه ايه يا باشمهندس كراكر ؟؟
لأ يا سعات الكوماندا ده فيروسين كدا ع الطاير عاوزك تخش تطيرهم من ع الهارد انا عاوز دمار شامل بقولك ايه
احنا مش اقل من امريكا والناس دى مش عاوزين احراج ياعمنا ياللا طلع الار بى جى وMP4 والدبابات والشبح وكل الـTNT اللى عندك انا عاوز الكيسة بتاعتى تطلع نار بس خد بالك اوعى الهارد يروح منك ولا المزر ولا الرامة لازم كله يبقى فى الكلكش انا عاوز كل البنية التحتية للكيسة بتاعتى تطلع م الحرب دى سليمة

المهم عمكو افج دخل الحرب ومفيش خمس دقايق اه والله خمس دقايق ولقيته طالع عنيه وارمه ومتبهدل وهدومه متقطعه شوفتوا انتوا اى فيلم عربى البطل يكون كوميدى وياخد علقه وتلاقى عين سليمة وعين حوليها دواير حمرا وزرقا اهوا لقيته طالع كدا بس طمنى وقالى بوص يا كراكر : احنا خسرنا معركة بس ما خسرناش الحرب ولنا معارك اخرى
ههههههه حلوة اوى القصه دى اكمل ولا ايه؟
المهم قمت شايل العدة والاسلحة والتلت جنود نورتون ومكافى وافج مرجعهم الشنطة اصدى الدرايف
وقمت كاتب اسم التلت فيروسات فى ورقة عشان اشتكيهم للدوس
وقلت بقى دى آخر محاولة او عليا وعلى اعدائى بقى هفرمط وانزل ويندوز جديد لانج
ملحوظة :
الفرمطة هى إعادة بناء الجيش والبنية التحتية للويندوز وكل البرامج حيث يقوم الباشمهندس دوس من خلال امكانياته وسلطاته الفعالة على الهارد من مسح كل البيانات على درايف الويندوز بما فى ذلك اى فيروسات

المهم بعد ما كتبت اساميهم فى ورقة رحت جبت سى دى بوت واسطه ودخلت للقائد دوس اديتله اسماء الفيروسات التلاته
قام اخدهم وعمل سيرش وجابهم ورزعهم علقة وأعدمهم واحد تلو الآخر ادم عينى وكانو بيخروا دم كمان (مش بقولكم واصل)
وفتح الويندوز من تانى زى الفل

ودى كانت نهاية تلت فيروسات بيحبوا بعض

بخخخخخخخ

مش عارف

بس واحد ابن حلال صاحبى قالى ان اى فيرس فى العالم بيبقى عامل زى الاهبل لما يقابل قائد الجيوش العظمى مستر دوس

شكرا يا حبيبى على المعلومه القيمه


واحكى انا بقه عن قصتى مع سفينه الفضاء الشهيره Andromeda



وممنوع المتابعه الا للكبار فقط علشان فى مشاهد مؤلمه فى اخره



المهم


طبعا كلكم يسمع عن اسطوانات المجالات زى لغه العصر وعالم الكمبيوتر وما الى زلك

وبينزل كتير البرامج التجريبيه اللى عليه لو الا لعاب كمان


المهم

فى بعض المجلات........ اللى الاسطوانه تلاقى فى اولها تحزير يقلك ان المجله غير مسؤله


المهم


كان برضه الكلام ده فى بدايه عهدى مع الكمبرور


وكنت اهبل زى اى حد مبتدئ


وجه يوم منيل لما واحد صاحبى ادانى اسطوانه لمججله...... اسمها على ما افتكر عالم الانترنت

وكان فيها شويه برامج من النوع الجميل


قلت تمام اوى

ونزلت الاسطوانه


وكله فى التمام وكل الامور تسير جيدا


بعديها بيوم بحاله


دخلت ال c


لقيتلكم ملف word اسمه Andromeda


طبعا انا فاكر الاسم ده لان كان فى مسلسل متابعه فى الوقت ده كان ليه نفس الاسم


ومن عبطى فتحته


وياريتنى ما فتحته


لاقيت رساله بسيطه جدا


وصوغننه جدا جدا


بتقول

If you think yourself aman try to stop me



وعلشان الفضايح مش هترجم واللى فهم فهم واللى مفهمش احسن


طبعا قعدت كام ثانيه كده افهم

والفيرس ابن الذينه ما صدق وراح مطلعلى شاشه زرقا


انا على الاخر الزمن تطلعلى شاشه زرقا


المهم لقيت شاشه زرق وفيها شويه كلام ملحقتش افهمه لان الجهاز عمل ريستارت لوحده


قلت لما نشوف


اللى هيحصل


محصلش حاجه خالص


بالمعنى الحرفى للكلمه

الجهاز فتح


ومفيش حاجه حصلت


الهارد متعرفش


قلت اللهم اغزيك يا شيطان

قفلت الجهاز كده كام ساعه

وجيت اشغله


برضه


ولا حياه لمن تنادى


طبعا صوت واتصلت بكل المهندسين اللى اعرفهم


فى البدايه طممنونى وقالوا ان عادى تعريف الهارد طار


وفى حاجه ممكن ترجعه


استبشرت خير



اول واحد خده كان مهندس معرفه والدى


رجعهولى وكان ناقص يرمي فى وشى


لان بعد محاولات مضنيه اتعرف معاه فى مره

دخل على الدوس


وقال يفرمته


وكان حاطه سليف مع الهارد بتاعه


المهم دخل على الدوس

وادى امر الفرومات المتين

وعدى الفورمات على خير


شغل تانى كده


لقا الكارثه


الباشا بتاعى طار تعريفه قبل ما الراجل يكمل دخول على الدوس


وما ترتب عليه انه فرمت هرده هوا بما يحيويه من شغل


طبعا فيا كزا واحد خد الهارد بعد كده لكن لا حياه لمن تنادى


وها هوا الهارد يرقد فى درج كتبى مع اخوانه الهاردات الخربانه

(على فكره ان عندى 4 هاردات خربانه كله ليه قصه هبقى احكيها كلها ان شاء الله)


المهم


تطلعوا من القصه دى بحاجه مهمه


انكم متنزلوش اسطوانات المجلات بالزات الى بتكون منزله برامجها من على النت قبل ما تكشفوا عليه كويس وبعدين تستخدموها

بدا ما يطلع عندكم Andromeda جديد

والى اللقاء فى حلقه اخرى من حلقات يوميات ماندوزز مع الكمبيوتر

زى مانتوا عارفين ان هاردات الويسترن الـ 80 من فترة كدا طلعت عماله تتحرق لوحدها واخدت سمعة مش ولابد كدا
لأنها كانت بتتحرق لوحدها وبدون اى حاجه انا عن نفسى اللى هقوله ده حصل مرة معايا ومرة تانيه مع واحد تانى وانا عن نفسى اتحرق فى إيدى هارد
والله الهارد راكب فى الكيسه وكله تمام .. وبصطب ويندوز سبحان الله انتوا عارفين طبعا والويندوز بيتصطب بيعمل كام ريستارت كدا
المهم اول ريستارت عملها وما قالش تانى
شوفتوا الى حصل ... الهارد مات البقاء لله بقى
بس الحمد لله كان فى الضمان

عوده مه يوميات جديده مع ماندوززز الحافله

واليوم حكايتى مع ال blackworm



كما قال عمنا كراكر كثيرا احزروا من مواقع الكراك


لكن للاسف


اوقات بنحتاج كراك معين


وبنخاطر


المهم كان فى كراك لبرنامج مش فاكر اسمه

المهم


دورت فى جوجل وفى محركات البحث عن مواقع الكراك اللى فيها الكراك المطلوب


ولقيته فى 3 مواقع


المهم انا فى الاول استغربت من مده تحميل المواقع


صحيح معلومه للزمن لما الموقع يحمل عندك كتير يعنى جهازك بينزل حاجات كتيره منه واحتمال تلاقى ملف exe كمان نزلك


المهم


دخلت ونزلت الكراك وشغلته وكله تمام



لا مش كله تمام


الجهاز بقى بطئ لدرجه رهيبه


وحسيت ان فى مليون عمليه بتتعمل



رحت تلقائيا دوست ct+alt+del


لاقيت بعيد عندكم صف طويل عريض لكلمه unknown


واسمين كده غراب



قلت بس الاسمين دول هما الفيرس والباقى دده شغل الفيرس



طبعا اول خطوه تعملها لو لاقيت فيرس او حسيت بوجوده


تخش على msconfig


وتعرف اسمه


لانهم كلهم بيحطوا نفسهم فى قائمه ال start


صحيح علشان تقوا انفسكم حاولوا تكونوا مشغلين الجهاز بنسختين ويندوز علشان لما واحد ينضرب تعرف تنضف بالتانى


والا هيكون عليك اللجوء زى ما عمو كراكر قال للكوماندا (الدوس)



المهم خت الاسمين الغراب


ودخلت على النسخه التانيه


وعملت سيرش عليهم


وجبتهم من قفاهم وعلى الشفت ديليت


طبعا برضه نصيحه مهمه لما حاجه من دى تحصل



خش نضف ملف ال restore وال temp بتاع الويندوز الخربان


المهم مسحته يا عم الحج وكله الاسطه


دخلت على الويندوز اللى اتضرب


وكله تمام وكله فى اللزيز

عملت ريستارت



لقيت المستكاوى رجع تانى


قلت ازاى بقه منا نضفت


قلت يا واد يبقى مصدر الفيرس انا مشلتوش


المهم كررت نفس الحركه


ودخلت على الويندوز التنى ونضفت بس قعدت بقه


فتحت ملف ال system وشلت كل انواع الهيدن علشان اشوف كل الملفات


(على فكره فى ويندوزات المليتيم و98 الفيرس يضرب الsystem اما فى 2000 و xp فبيضرب ال system32)



المهم قعدت قدام ملف ال system بالكام الف ملف بتوعه وقعدت اتفرج يمكن الاقى اسم مميز ولا حاجه اشيله


خلى بالكم الطريقه دى خطر جدا


لانكم لو شيلتوا ملف ومطلعش هوا الفيرس مع السلامه للويندوز


وحظى بقه ان الفيرس ده كان غبى حبتين


هوا اه كان عامل نفسه هيدن زى ملفات الويندوز يعنى حتى مش هيظهر لو فتحت الهيدن العادى


لكن غباءه كان فى حاجتين

1- اسمه كان مميز backworn

2- الشكل اللى خده وكان ملف وورد

لانه لو كان ملف .dll كان مع السلامه ومكنتش هجيبه



المهم شفت انا الملف ده مسكته من قفاه وتعاله يا ابن ال.....


وشفت دليلت معتبر



المهم بعد اكمال عمليت التنضيف



عملت الريستارت


وانا حاطط ايدى على قلبى


و



و



و



و



الويندوز اشتغل تمام


والفيرس الى مزبله التاريخ

هههههههههههههههه

صراع شديد اوى يا ماندوز

عقبال المرة الجاية ونشوف

صراع جديد انا بقى حكايتى حكاية
ومش هاقدر احكى زكرياتى المؤلمة

خلينا فى السليم

فى يوم...... فى شهر ........ فى سنه




دى مش الاغنيه



دا يعنى تاريخ حدوث المشكله


المهم



كان الجهاز سليم وكل حاجه فى التمام



واحد صاحبى اتصل عايزنى اروحله بالهارد


المهم فكيت الهارد بعد معاناه لان كبلات الداتا كانت زانقه الدنيا



المهم رجعت من عند صاحبى عادى



وركبت الهارد



وبعمل start



هبه لقيت

تيتتتتتتتتتتتتتتتتتتت



صفاره


خلى بالكم فى صفاره متقطعه


وفى صفارره متصله (تقريبا واحده رامه والتانيه بروسيسور)



طبعا قفلت الجهاز


وانا حمار ومش بفهم حاجه فى الجهاز بقه


قلت طب لما اشوف الصوت جى منين


دورت ودورت جوه الكيسه



لغايه ملقيت سماعه موجوده فى قعر الكيسه والصوت بيطلع منها


ولقيت واصلها كام سلك


المهم شغل الهندسه بتاعى اشتغل


قلت اكيد دى alarm وان الاسلاك دى واصله بالحاجات اللى اalarm يطلع لما يحصل فيها مشكله


ومشيت ورا الاسلاكلقيتهم بعيد عنكم دخلوا فى البورده


وانا مهما كنت عبيط ومش بفهم حاجه فى الكيسه


قلت خلاص



بلا هندسه بلا بتاع


التجربه خير وسيله


مخى قالى ان الصفاره دى ممكن تكون بسبب انى منا بخرج الهارد حركت حاجه او لخلتها من مكانها


فرحت فاكك الكروت والرامه ومركبهم تانى


طبعا هتقولى وعرفت منين ان الرامه المشكله


لانى ببساطه منا بشيلها لاقيتها متللخه فعلا



والحمد لله الجهاز اشتغل تانى وبقيت كل مره اخرج الهارد اخلى بالى لاحرك الرامه ولا حاجه

يلا جهازك مزاجه عالى بيصفرلك
مذكرات هارد amirelarab
أنا حصلتلى مشكلة ...........هى
كان زمان أخوك امير عنده ويندوز xp.و.me..
فى يوم من اليام الويندوز xpسقط
جيت اعمله يستحيل اجيبه يمين وشمال برده مستحيل فرمت c..d..مفيش فايده أجرب عند حد تانى مفيش فايده
وغيرت اسطوانة الويندوز مفيش فايدة أعمله من الدوس برده مفيش فايدة
مع انه كان بيقبل ويندوزme...98 .. قولت ماشى أمرى لله
رضينا بالغلب والغلب مش راضى بينا
بعد فترة لقيت الجهاز معتشى فيه أللى بارتيشن واحد من سبعة حيث هذا الهارد كان 120جيجا اتحول ل10جيجا بس فى..c.. خرجت من شعورى خدته ورحت لمصطفى باشا (تيفا نت ) أقلى عايز يتقسم من جديد
والحمد لله اتقسم ورجع زى مكان وقبل ويندوز ...xp.. أخيرا
أرجو أن أكون قد أفدتكم بشىء مع تمنياتى بالعمل الدائم لكل جهاز كمبيوتر بدون أى مشاكل

يااااااااااااااااه قصة رائعة ...
مفيدة جدا ... وجميلة جدا وتامر كمان وحسنى ومحمد وحسن وعبده والسيد واحمد وعادل وكل افراد العائلة بهدى ليهم احلى تحياتى وكل الشكر والامتنان للبرنامج الجميل .. والسلام عليكم ورحمة الله وبركاته
كان معكم محمد ابراهيم من قناة تيفا الفضائية الجوية البحرية الارضية السقفية ..