مطلوب مساعدة فى تقسيم هارد

احيكم بتحية الاسلام
السلام عليكم ورحمة الله وبركاته
مش عارف طلبى دا هيكون مناسب فى هذا المكان ولا لاء
وبرضه مش عارف اذا كان طلبى هيتجاوب عليه ولا لاء وخصوصا ان اخر موضوع كان من سنه 2010

اشتريت لابتوب جديد وعاوز اقسم الهارد بتاعه ماعنديش الا بارتشن السى بس
ارجو الافاده

جزاكم الله خيرا

---

l'g,f lshu]m tn jrsdl ihv]

وعليك السلام أخى الكريم ورحمة الله وبركاته

ياريت تقولى أولاً انت شغال على أى ويندوز وايه الحجم الكلى للهارد-ديسك
كذلك هاتلى صورة من بارتيشن السى بتقول فاضى\مستهلك عليه مساحة قد ايه ؟

وأخيراً عاوز تعمل كام بارتيشن جديد ؟

فى حالة انك شغال على ويندوز 7 أو فيستا دى طريقة التقسيم

توكلنا على الله

---------------------------------------

كليك لمين على أيقونة "computer" واضغط Manage من القائمة
افتح Storage
افتح Disk Management

دلوقتى فيه خطوتين هيتعملوا .....
الخطوة الأولى هنعمل shrink لبارتيشن السى بمعنى نقتطع جزء من مساحته
والخطوة الثانية نعمل extend للمساحة المقتطعة ونحولها لبارتيشن جديد

---------------------------------------
خطوة shrink

النافذة عندك بيكون شكلها كده


اضغط كليك لمين على بارتيشن الـC واضغط shrink من القائمة

هتظهرك نافذة زى دى بتسألك عاوز تقتطع مساحة قد ايه من الC


المساحة اللى هتلاقيها مكتوبة عندك قدام الخانة التالتة، دى المفروض انها اكتر مساحة ممكن تُقتطع من الـC ومش ينفع تقتطع اكتر منها لكن ينفع تقلل
- طبعاً المفروض ما تقتطعش كل المساحة الفاضية على الC لأن ده هيخلى البارتيشن مليان على الآخر ومش هينفع تسطب برامج بعد كده فاللى هتعلمه انك تكتب فى الخانة التالتة مساحة البارتيشن الجديد وتتأكد إنها أقل من الرقم الأصلى اللى كان مكتوب بحوالى 5000 ميجا

بعد ما كتبت مساحة البارتيشن الجديد وكله تمام اضغط shrink وانتظر شوية ..

الخطوة الثانية ........... "extend"

بعد إنهاء الخطوة الأولى النافذة عندك بيكون فيها جزء لونه أسود ومكتوب عليه Unallocated جنب بارتيشن الـC عندك



هتغط كليك لمين على البارتيشن الأسود وتضغط extend

هتظهرلك نافذة زى دى اضغط نيكست



هتظهرلك النافذة دى اضغط نيكست وبعدين finish



كده المفروض فيه عندك بارتيشن جديد وممكن تستعمله مش مطلوب خطوات إضافية، لكن يُفضل انك تكمل الخطوات عشان تديله حرف\اسم

من نافذة computer management دوّر عالبارتيشن الجديد اللى عملناه



هتلاقى عندك البارتيشن الجديد اضغط كليك لمين عليه واختار Change drive letter and path

من النافذة اللى هتظهر اضغط change



اختار حرف D واضغط أوك




بس كده ... لو عاوز تعمل كمان بارتيشن أعد الخطوات بحيث خطوة الـshrink تعملها على بارتيشن الـD والخطوة الأخيرة تدى البارتيشن الجديد حرف E

نوع الوندوز 8
حجم الهارد 1 تيرا
عدد البارتشن 5 بما فيهم الـ C
عاوز حجم البارتشن يكون 225 جيجا
معادا الـ C حجمه 100 جيجا

الحاجه الثانيه انا جربت الخطوات اللى حضرتك منزلها
اشتغلت معايا على وندوز 8 ولاكن اخر خطوه بيقولى عاوزه NTFS ولا exFAT
حضرتك رائيك ايه ؟

خليه يبقى ntfs ..
ومبروك اللابتوب

فيه مشكله قبلتنى وانا بقسم الهارد بارتشن السى مش نافع يقل عن 400 جيجا

تانى مشكله دخلت على بروبيرتز من بارتشن السى ثم على Optimize
ثم اختارت بارتشن السى واتكيت على Analyze
قبل ما اعمل الحركه دى السى كان مكتوب ادامه 10% fragmented
بعد ما عملتها بقى مكتوب 5%

انا كدا عملت حاجه خطء ولا عادى ؟
ومعلش استأذن حضرتك عاوز اخلى السى 100 جيجا بس هل يوجد حل
ام انه لا يقل عن ذالك
جزاك الله خيرا

المشكلة إن بيبقى فيه حاجات متخزنة فى نهاية بارتيشن الـC فويندوز مابيقدرش يقلل حجم البارتيشن للنقطة اللى متخزن عليها الملفات دى
الحل إنك تستخدم برنامج خارجى اسمه Partition Wizard عشان تقلل البارتيشن لـ100 جيحا يا إما تقلله لـ400 وتعمل جنبه بارتيشن 600 وتبقى تقسيمة تقضى الحاجة من غير تعب

الـDefragmentation دى المفروض تتعمل كل فترة عادى مافيهاش مشاكل ...

معلش يا عبدالرحمن استأذنك تجبلى البرنامج partition wizard
جزاك الله خيرا

مجانى يا ريس من هنا Download56960

تسلم ايدك يا عبدالرحمن
معلش بالله عليك طريقة تقسيم الهارد بالبرنامج

الطريقة شبه اللى عملناها قبل كده فى إنك بتقتطع جزء من البارتيشن اللى حجمه زايد عن اللزوم وبعدين بتضيف المساحة دى لبارتيشن موجود .. أو إنك تستخدم المساحة اللى اقتطعتها تعمل منها بارتيشن جديد تماماً
على حسب التقسيمة اللى عندك دلوقتى خد القرار المناسب بحيث هتقتطع من ايه وهتضيف لايه عشان تخلى السى 100 جيجا والأربع بارتيشنات التانية 225 جيجا ...

--------------------------

طريقة الإقتطاع بتضغط على البارتيشن اللى حجمه زايد (وليكن فى المثال بارتيشن الـC) وتضغط على Resize



من هنا بتحرك المؤشر اللى عالشمال لناحية اللمين بالماوس، لحد ماتوصل للحجم اللى انت عاوزه يبقى حجم بارتيشن الـC بعد الإقتطاع (وليس الحجم المقتطع من C) ... وبعدين اضغط أوك



هيظهر عندك دلوقتى مساحة فاضية ومكتوب قدامها Unallocated



من هنا بقى المفروض تحدد يا إما المساحة الفاضية دى هتعمل بيها بارتيشن جديد تماماً ... يا إما هتضيفها لبارتيشن موجود أساساً

-----------------------

الحالة الأولى: عمل بارتيشن جديد من المساحة الفارغة

1-بتضغط على المساحة الفاضية
2- اضغط Create
3- اكتب اسم وحرف البارتيشن الجديد
4- اضغط ok



----------------------------------------

الحالة الثانية: إضافة المساحة الفارغة لبارتيشن قائم

1- اضغط عالبارتيشن المطلوب نقل المساحة إليه
2- اضغط Extend partition
3- اختار مصدر المساحة الإضافية (دور فى القايمة عالمساحة المكتوب قدامها Unallocated
4- حرك المؤشر لأقصى اللمين
5- اضغط ok




لحد دلوقتى كل التغييرات اللى انت عملتها مابتتنفذش

عشان تبدأ التنفيذ والتعديل عالبارتيشنات فعلاً بتضغط Apply
لو حاسس إن فيه مشاكل وعاوز تلغى اضغط Discard