معلومات هامه لمصممى اليفت

اول حاجة
الشغل لازم يكون بنظام الوان السي ام واي كي

CMYK
c سماوي
m ارجواني
Y اصفر
k اسود

وده بيتم اختياره من الشاشة بتاعة التصميم الجديد
Ctrl+N

وناخد بالنا برضه ان التصميم الجديد
المقاسات تكون بالسمتيمتر بدل البكسل
CM PIXEL
والريزوليوشن يكون
72 بيكسل / انش مش / سم

------------
كدة خلصت المرحلة الاولى واللي هي ظبط مقاسات ونظام الوان التصميم
تاني حاجة لازم نعرفها

ان اسم المحل لازم يكون من اول التصميم لاخره
ولازم نسيب مسافة على الاقل عشرة سمتيمتر قبل الاسم وبعده
ولازم الاسم يبقى مشدود برضه بارتفاع اليافطة ونسيب مسافة عشرة سمتيمتر تقريبا مش لازم مسطرة يعني من فوق ومن تحت

الفونتات اللي بنستخدمها دايما في المجال ده هي

Al - Mateen
Al - Hadeeth

والخط الكوفي والثلث في بعض الاحيان
الخط الاولاني ده اسمه المتين او زي ما بيقول الخطاطين خط النسخ الحديث
والخط التاني اسمه خط فري --- يعني فري هاند

دي خطوط تقليدية بيحبها كل الزباين التقليدين
وخاصة خط النسخ الحديث

---------
الوان الخلفية
كل الزباين ما عدا الشباب بيحبوا الالوان الفاتحة في الخلفية زي السماوي مع الابيض
او الابيض الصافي
او الاصفر مع الابيض
او الاصفر الخفيف

--------
الوان الكتابة
معظم الزباين بيحبو تلات الوان في الكتابة
احمر بخط خارجي اسود او خط ابيض مع ضل اسود تقيل
ازرق بخط خارجي ابيض مع ضل اسود
اصفر بخط خارجي اسود او بضل اسود وخلاص

معظم الزباين بتحب ان الخط يكون بيلمع
ازاي تلمع الخط؟؟
من شاشة
layer style
اختار بيفل
ومنها في القسم التاني تحت كدة هتلاقي حتة مكتوب فيها الزاولية والارتفاع
Angle Altitude
وهتلاقي رسمة دايرة فيها شرطة
ببساطة غير قيمة
Altitude
من 30 ل 70 والعب في الحجم والعمق
Size Depth بتوع البيفيل براحتك

------------

الزباين بيكرهو الالوان الباهته
وليهم حق صراحة
علشان الالوان الباهته بطلع وحشة في الطباعة
بص بنفسك على اللون الاحمر الفاقع في الكمبيوتر
هتلاقي نفسك بتكرهه فطريا ههههه
انما بصله في اي يافطة فودافون
هتلافيه زي الفل ----- ملحوظة يفط فودافون مش مطبوع
دي فينيل مفرغ وفيه حتة فينيل مطبوع عليها اللوجو بتاع فودافون
والاحمر اللي فيه الناس منخدعة فيه هههههههه
المعظم بيفتكروه احمر فاقع
انما هو احمر عليه عشرة في المية اسود وعشرة في المية سماوي

--------------

خامات طباعة اليفط المشهورة في مصر

بانر اشهر حاجة وارخص خامة للطباعة
فيلكس اغلى خامة وانضف خامة في الطباعة
فينيل ابيض عبارة عن ورق لاصق
فينيل شفاف ورق لاصق بس شفاف

الفرق بين الخامات
في الطباعة من الاحسن للاسؤا
بانر
فيليكس
فينيل شفاف مش بيلمع
فينيل ابيض لامع
فينيل شفاف لامع

في الاستخدام
البانر بيستخدم في اليفط اللي اضائتها من بره ( يعني يافطة وقدامها اضاءة خارجية) اقل اليفظ تكلفة في الطباعة و التركيب

الفيليكس بيستخدم في اليفط اللي اضائتها من جوه ( يعني يافطة ووراها اضاءة داخلية) اغلى اليفط في التكلفة بس تستاهل علشان شكلها حلو اوي

الفينيل الابيض
ده بيستخدم عادة في عربيات الباعة المتجولين وفي قوايم الاسعار وفي اليفط اللي مش مطلوب انها تتكلف في التركيب

الفينيل الشفاف بنوعياته اللامع والمطفي
ده بيستخدم في لصق البوابات الزجاج
يعني ناس عندها محل وفيه باب ازاز
وعايزة تزين الباب بحاجة
بيزينوه بالفينيل الشفاف

------------

نتكلم عن تركيب الالوان

ببساطة كدة هنتكلم عن تركيب الالوان
وعلى فكرة مفيش لون في التصميم بنختاره بالماوس كدة من الالوان اللي بتكون موجودة في الباليته بتاعة الفوتوشوب
لااااا
احنا بنحط ارقام في الخانات بتاعة
C
M
Y
K
اللي في الباليته دي

كل لون من دول بيقبل القيم من 0 ل 100
ومعناها ايه القيم دي
القيم دي الطابعة بتقراها وبتشوف هتدلق حبر قد ايه في النقطة دي
يعني اما تقوله في كل الخانات 100 يعني كدة انك بتقول للطابعة ارمي اقصى كمية حبر من كل لون من الاربعة في الخانة دي
وهيطلع اللون اسود



نفترض ان احنا عايزين اللون الازرق الشائع
ببساطة بنحط 100 قدام خانة C وخانة M
عايزين احمر فاقع نحط 100 قدام خانة M و Y
عايزين اخضر نحط 100 قدام خانة Y و c
عايزين اخضر فذدقي ----> نلاحظ ان الاخضر الفذدقي اللون الاصفر فيه غالب على اللون السماوي
فنهحط مثلا 100 قدام y و 50 قدام C
مثلا عايزين لون بنفسجي
هنحط 100 قدام M و 50 قدام C

ولو عايزين نغمق اي لون
هنذود قيمة K
اللي هي اللون الاسود
بدل ما هي صفر
نخليها خمسين
كدة يبقى اللون غامق

لازم تجربوها
افتحو الفوتوشوب وجربو الباليته بنفسك وجربو الالوان
----------




حاجة تانية
التصميماااات الضخمة
زي مثلا تصميم تلاتة متر في عشرة
ده يا باشا لو صممته بالمقاسات العادية
هتلاقي نفسك بتتشل
ههههههههههههههه

فالاحسن انك تصممه بالمقاسات مقسومة على عشرة
يعني تلاتة متر في عشرة متر
يكون كدة
30 سم في 100 بدل 300 في 1000
بس هنخلي الروزليوشن
300 بدل 72 وطبعا بيكسل على انش

وبعد ما نخلص التصميم بتاعنا
هندخل على قايمة ايمدج
ومنها تنخار
Image Size
ونخلي الروزليوشن
289 بيكسل على سم

ونستنى على الكمبيوتر لحد ما يخلص تحويل
وانتهت المهمة بنجاااحا تام

منقول.....
جزيل الشكر للأخ : I.M.Ibrahim

---

lug,lhj ihli glwlln hgdtj

معلومات جميلة جدا ومفيدة

لكن عندى تعقيب صغير على

-------------------------------------------------------


ان اسم المحل لازم يكون من اول التصميم لاخره
ولازم نسيب مسافة على الاقل عشرة سمتيمتر قبل الاسم وبعده
ولازم الاسم يبقى مشدود برضه بارتفاع اليافطة ونسيب مسافة عشرة سمتيمتر تقريبا مش لازم مسطرة يعني من فوق ومن تحت


-------------------------------------------------------

اظن ان لما يكون النص على طبيعته بدون شد يبقى أفضل



وتقبل وجهة نظرى المتواضعة