كيف تملكين قلب زوجك؟؟

**عليااااااا** · 2009-01-08, 05:42 PM

أختى..............حبيبتى الغالية

مش عيب أبدا أو حرام إن الواحدة تحب زوجها........ بالعكس ده ربنا سبحانه وتعالى أمرنا بده ورسوله الكريم صلى الله عليه وسلم وضح ده وفسره
قال رسول الله :-(( لو كنت آمرا أحدا أن يسجد لأحد لأمرت المرأة أن تسجد لزوجها))
وقال أيضا :- " ما كان الرفق في شئ إلا زانه وما كان العنف في شئ إلا شانه" ويقول صلى الله عليه وسلم: "إن الله رفيق يحب الرفق ويعطي عليه ما لا يعطي على العنف". صدق صلى الله عليه وسلم.

والرسول الكريم هنا بيوضح لنا كلمة السر اللى نقدر بها نفتح كل الأبواب وهى (((( الرفق))))

الرجال........ مع احترامى الشديد جداا فمنهم سيد الخلق ومنهم أبى وإخوتى.... مش مشكلة ولا معضلة صعبة
الإنســـان عموما التعامل معاه مش بيكون صعب أوى لو عرفنا ايه الشئ اللى بيحبه وندخله من أى طريق

بمعنى ايه.....اعرفى شخصية زوجك؟؟؟ بيحب ايه... بيكره ايه؟ ايه اللى بيسعده وايه اللى ممكن يدايقه؟....كلامه كتير .. قليل ؟ ميوله ... أحلامه... طموحاته؟؟ كدا يعنى
ومش عيب ولا يقلل من شخصيتك إنك تغيرى من نفسك علشانه ........بالعكس ده يملكك قلبه أسرع...

طيب بعد ما صدعتكم بالمقدمة دى تعالو نشوف شوية نصائح جمعتها للبنات سواء المرتبطات منهم أو الآنسات.. لأنها معلومات ونصائح عجبتنى جداااااااااا وانا جمعتها من أكتر من مكان سواء النت أو التيليفزيون أو الكتب أو اجابات والدى ووالدتى.

**** أهم حاجة وأكتر حاجة شدتنى موضوع حسن المعاملة والرفق فى التعامل:-
عامليه كويس.... اضحكى فى وشه.. حتى لو فى حاجة مدايقاكى أو تعبانة حاولى تبتسمى, الابتسامة ليها مفعول السحر خاصة لو راجع البيت هلكان من الشغل أو وهو خارج... اضحكى وضميه وودعيه بدعوة حلوة وقوليله خللى بالك منك ومننا لأننا مالناش بعد ربنا غيرك.

**** حسسيه بأهميته طوووووول الوقت وامدحيه واعمليله كل اللى يطلبه( ما دام فى رضا الخالق طبعا)) حتى من قبل ما يطلبه, حسسيه انه ملك... متوج .... مالك أمرك. وصدقينى ده مش ضعف منك

**** اهتمى بنفسك وبمظهرك قدامه.... حتى لو بتعملى شغل البيت........ ارفعى شعرك بطريقة كويسة يعنى بلاش القمطة........البسى كويس
ده هيريحه هو نفسيااا ... مش يبقى هالك نفسه فى الشغل علشان يجيب فلوس ويعيشك فى مستوى كويس وانتى والاولاد مش لابسين كويس
والبيت مش نضيف هيقول طب ايه الفايدة.

**** حسسيه انك منه فلما بيدايق أو بيفرح انتى كمان بتتدايقى أو تفرحى.... حاسه بيه طوول الوقت ..فاهماه
بس برده خدى بالك... ما تخنقيهوش باهمتامك.. يعنى لو محتاج مساحة لوحده........... سيبيه
اقعدى جمبه وما تتكلميش بس خليه يشوف قلقك عليه ......خديه ما بين واسكتى وما تعلقيش على نرفزته او سكوته وكتمانه.

**** لو حصل وجرحك أو حصل ما بينكم خلاف لا قدر الله اوعى اوعى اوعى الموضوووع يتعداكم انتوا الاتنين حتى للاولاد.... ييعنى بلاش الجيران والأهل يدخلوا ولا حتى الأصحاب ......لانه بعد شويه هيروق ويهدى والموضوع يتحل بس هو مش هينسالك انك حتى لما جرحك........ صنتيه

**** لو لا قدر الله كان فى مشكلة فى البيت أو الشغل ... اوعى تقوليهاله وهو راجع من الشغل علطوول كدا.. ولا لما ييجى ياكل او هو وداخل ينام........اتجنبى الأوقات دى وبعدين هزرى شوية ومهدى للمشكلة بهدوء مع تقديم امكانية الحل بإذن الله يعنى ما تعقديهاش.

**** أهل جوزك... وحطى تحت دى مليون خط
اوعى تعملى معاهم مشاكل حتى لو هما صعبين شوية يكرموا لعيونه يا ستى........ هو هيحس انك مستحملاهم لانك بتحبيه وصدقينى ده هيفرق معاه اوى.... بالعكس انتى لو فى حاجة فى النفوس لا قدر الله ما بينه وبين حد من أهله... سبقى انتى بالخير وحاولى تصلحى... اعزميهم ووفقى وكدا حتى لو اتزرزر وقالك انتى مالك هيبقى من جواه فخور بيكى
بس فى حدود الشرع طبعااااااااااااااااااااااااا

**** ساعديه على الطاعة... وحببيه فى الإيمان ... لو كان يعنى شوية فاهمانى طبعا.. وان كان ربنا كارمه فاساليه عن أمور فى الدين حتى لو كنتى عارفاها ... افتحى دايما موضوعات للحوار واتكلمى معاه فى كل حاجة
شوفى الحاجات اللى بتهمه واقرى عنها واعرفيها وناقشيه فيها
(( بهدوء طبعا يعنى اوعى نبرة صوتك ترتفع عنه حتى لو كان غلطان , لفى الموضوع بشطارتك وعرفيه غلط فى ايه علشان ما تحسسيهوش انك أخدتى بالك))

طبعا دى مش كل النصايح بس اهو اللى قدرت عليه
أتمنى انها تساعد فى حاجة
بس النصيحة الأهم واللى بتلخض كل ده

أحبيـــــــــــــه كما تتمنى أن يحبك
وما تنسيش يا قمر إنه بوابتك للجنه
قال صلى الله عليه وسلم
((إذا صلت المرأة خمسها , وأحصنت فرجها, وأطاعت بعلها, دخلت من أى أبواب الجنة شاءت )) صدق رسول الله صلى الله عليه وسلم

أتمنى الموضوع يعجبكم ومستنية تعليقاتكم ونصايحكم

من أحبتكم فى الله

;dt jlg;dk rgf .,[;??