ودى اخرة التيفاويه لما لعبوا مع الحكومه ..!! - الصفحة 3

**Sir.7amato** · 2010-12-17, 05:55 AM

اقتباس:

وعلى فكرة ممكن كلام حماتو يكون صحيح ويكون فيه هاكرز بيدخل بعضويات حد او عضويتك مسروقة

هو إنت يعنى مبتتكلمش إلا لما تتزنق
يا أخى كنت قول كده من الأول
خد عندك يا عيون الحب دى حاجه أهى تطلعنا كلنا زى الشعره م الضفيره

اقتباس:

sir.7amato : صدق هشام الجخ والنبى لما قال يعنى لما ابقى ماشى فى حالى اتشد اشتباه

أنا كنت بحب هشام الجخ أوى أوى
بس دلوقتى تسمحلى أقولك يا هشام بكرهههك بكرهههههههك
وسمعونى أغنيه حرمت احبك احبك متحبنيش وأبعد بشعرك وسيبني اعيش

كملى كملى أما نشوف أخرتها إيه مع عيون بيه /

**حبيبـة ابـوها** · 2010-12-17, 02:24 PM

جلسة المحاكمه
وقد حضرها جميع اعضاء تيفا الكرام من مديرين؛ مشرفين عموم ؛شخصيات هامه؛؛
لمشرفين اقسام؛ مشرفين سابقين؛ مميزين؛ اعضاء شرف؛ اعضاء؛؛

يدخل ساعى المحكمه ينادى على القضيه
قضية رقم 502 المتهم فيها
WebCraker>> Sir.7amato وعاشق وفجر الاسلام وملكة بحجابى
بسبب زعزعة الامن والاستقرار الوطنى ( حلوة زعزعة دى )

ويتقدم عيون الحب : أنا عيون الحب المحامى عن المتهمين

القاضى يسأل المتهمين :
ويبدأ بزعيم الليله دى كلها WebCraker : إنت صاحب منتدى تيفا؟

WebCraker: أيوة يا سعادة البيه

القاضى : إيه اللى حصل عندك فى منتداك دا ؟

WebCraker : والله يا بيه أنا ماليا ذنب كان يوم أزرق يوم ما عملت المنتدى دا اللى عمل فيا كدا يا باشا أنا راجل سايبهم براحتهم يكتبوا اللى عايزينه بما إننا فى بلد ديموقراطى يا بيه

القاضى : يعنى مش تبع أى نشاط سياسى ولا تنظيم إرهابى حتى

WebCraker : والله يا بيه ولا ليا فى الكلام دا واسأل عليا أهل المنتدى والله يا بيه

(التيفاويه كلهم أه والله فعلا يا باشا دا راجل فى حاله ملوش فى الكلام دا )

القاضى يضرب بالشاكوش سكوووووووت مش عايز أسمع صوت اللى هسمعه بيتكلم هطلعه برا

القاضى :وإنت يا Sir.7amato

Sir.7amato : أنا إيه يا باشا ؟

القاضى : مش إنت اللى عاملى موضوع عن مبارك وقصيدة جحا ؟

Sir.7amato : والله يا باشا بخصوص موضوع مبارك دا موضوع لقيته على الفيس بوك وناس مركبه عليه كلام فعجبنى يا باشا حطيته مكانش قصدى بيه حاجه ولا حد محرضنى إنى أحطه والله يا بيه ,, أما بخصوص قصيدة جحا دا مش كلامى يا باشا دا بتاع هشام الجخ مليش دعوة بيها والله كل اللى عملته copy &paste أكتر من كدا مفيش
وياريتنى ما حطيته لو أعرف إنه هيودينى فى شربة مياه كدا

القاضى : إممممممم خلاص يا متهم

Sir.7amato : ربنا يخليك لمصر ويكتر من أمثالك يا بيه

القاضى : وإنت بئه يا عاشق الايمان حطتلى موضوعات تتمسخر ع المصراويه ,, مش أهل بلدك دول مش عيب عليك تعمل كدا ؟؟

عاشق الايمان : عيب يا بيه غلطة وندمان عليها ومش هعمل كدا تانى ومصر دى أمى ونيلها جوا دمى والله يا باشا ,, وأنا معنتش هعمل كدا تانى

القاضى :ماشى يا متهم؛؛
وإنتى بئه يا ست فجر الاسلام حطالى موضوعات تهاجمى فيها الريس وابنه وخلى عندك صوت

فجر الاسلام : يا باشا أظن إننا بلد ديموقراطى ومفيش حاجه تمنع من ان أى مواطن يقول رأيه يا باشا.. بس أنا مش تبع حد والله تبع نفسى وبس ومليش أى ميول سياسيه ولا أعرف أى حاجه عن أى حد موضوعين اتحطوا لحظة طيش وخلاص يا باشا

القاضى :ديموقراطى أه ,,وهو كذلك يا متهمه..
وإنت يا عمر عايز تنسى إنك مصرى ,,

Omar85 : لا يا باشا حد ينسى بلده اللى اتولد فيها واتربى فيها وعاش وسط أهله وناسه فيها دى مصر دى أم الدنيا يا باشا ,, وقصيدة اتكتبت لحظة زعل وغضب والله يا باشا محدش خلانى أكتبها ولا حاجه

القاضى : وإنتى ياست ملكه بحجابى

ملكة بحجابى : أقسم بالله يا باشا دا كلمات أحمد فؤاد نجم ما هى كلماتى ونشرتهم ع المنتدى نوع من الهزار يعنى مقصديش حاجه يا باشا

القاضى : بعد سماع المتهمين الدفاع يتفضل

عيون الحب : حضراتى السادة أعضاء هيئة المحكمة الموقرة اعتقد ان بعد سماع اقوال المتهمين لا يوجد ما يدل على انهم تابعين لأى أحزاب سياسيه أو إرهابيه أو أى شئ بل إنهم مواطنين مصريين مخلصين لهذا البلد المصون ,, وإذا رجعنا للدستور وحقوق الإنسان نجد أن القانون قد كفل للجميع حريه الرأى والتعبير وكما قال المتهمون نحن فى بلد ديموقراطى ولا أعتقد ان ما فعلوه فى منتدانا الموقر يعتبر تحريض من أى جهة غير مشروعه ولتسمح لى هيئة عدالتكم بأن اطرح عليها شهود من المنتدى وهم أعضاء قدامى بالمنتدى وعلى درايه بالأعضاء وعاصروا تلك الأحداث بالمنتدى ...

(بعد مشاورة القاضى والاتنين اللى معاه ) اتفضل

الشاهد الاول Mandozzz

الحقيقه أنا فى المنتدى ما يقرب من 4 سنين منذ إنشائه تقريبا ولم ألاحظ على أى عضو من المتهمين أى تصرف يوحى بالإرهاب أو التطرف أو ما غير ذلك

الشاهد التانى Mafiawy
الحقيقه أنا فى الإداره مع ويب كراكر و سير حماتو وعارفهم كويس هم وباقى الأعضاء ومشفتش منهم أى حاجه تدل على عدم وطنيتهم أو إنتمائهم لبلدنا العزيز مصر

القاضى :: ماشى ماشى خلاص كفايه كدا,, هل لديك أى إثباتات أخرى يا عيون الحب

عيون الحب : ياسيدى القاضى إذا أرادت المحكمه مزيد من الشهود فأعضاء تيفا كلهم يشهدوا..

القاضى : خلاص مفيش داعى لدينا ما يكفى من الإثباتات والتحريات,, هل لديك أشياء أخرى؟؟

عيون الحب : لا يا سيدى القاضى ؛ وعلى هذا وبعد سماع أقوال الشهود أرجو أن تكون الأمور قد اتضحت لهيئة عدالة المحكمة ونرجو منكم الإفراج عن المتهمين بدون أى ضماناات أو كفاله

القاضى : الحكم بعد المداوله

**********************
ياترى بئه كلام عيون الحب والشهود وكلام المتهمين اقنع القاضى
والتحريات اللى عنده تكفى علشان يحكم ليهم بالبراءه ...؟؟!!

الجزء الجاااى هيكون الحكم,, وهيكون ااخررررر جزء ان شاءلله

**ملكة الرحمه** · 2010-12-17, 04:03 PM

اقتباس:

ياترى بئه كلام عيون الحب والشهود وكلام المتهمين اقنع القاضى
والتحريات اللى عنده تكفى علشان يحكم ليهم بالبراءه ...؟؟!!

اتمنى ذلك
بجد هما اعضاء طيبين وحلوين وهاديين
وميستاهلوش الى حصلهم دا
ومش حمل النوم على البرش
وكفايه الى شافوه

**MaNsHo0o0** · 2010-12-17, 05:34 PM

اقتباس:

الجزء الجاااى هيكون الحكم,, وهيكون ااخررررر جزء ان شاءلله

ليه كده بس ما تسجنيهم شهر كده ولاحاجه ونعمل استنئاف بقى وبتاع مستعجله ليه بس

واحد شمتان p:

**Muhamed** · 2010-12-17, 05:37 PM

لا اصلى اصلى

المتهمين بيفكرونى بعلاء مقلد يوم قضيه جدو لما قال يا جماعه انا محولجى بمضى من غير مشوف

على العموم انا عملت بالعشره اللى بينا ومرضتش افند القضيه فندايه فندايه

يمكن لانى متوقع اللى هيحصل " لانك اكيد اكيد فى مصر"

يعنى لا مرافعه ولا بتاع هتفرق الحكم صادر قبل الجلسه مثل كل شئ بيحصل فى البلد دائما بيكون تم اتخاذ القرار قبل حدوث الحدث نفسه

على العموم فى الانتظار "حبيبه بابا" واوعى ظنى يخيب واكتشف اننا فى تركيا

**عاشق الايمان** · 2010-12-17, 07:46 PM

سياده القتضي

وانا بالنيابه عن نفسي قررت الدفاع عن نفسي

بعيدا عن الحلفاء المدافعين عنا

دا ناوين يجيبولنا اعدام يا بيه

هقول الحقيقة يابيه

هو انا كنت ماشي في امانة الله لقيت

كراكر نايم علي السور بتاع البلكونة بلاش اصوره متجيش طبعا
ولقيته برضه نايم في عربيه ومطلع رجله من الشباك وهو نايم

وفي يوم تاني لقيت حماتو عامل فيها عسكري مرور وبيضحك علي السواقين وبياخد فلوس بلاش اصوره يعني

ومره برضه وانا ماشي لقيت فجر معلقه الاطباق والمواعين علي الحبال بلاش يعني اصورهاا

اما ملكه بحجابي بقي لقيتها طبخه بالصدفه البحته ومن وسط الطبيخ فرخه مشويه حط رجل علي رجل بلاش اصورها يعني

يعني مواقف مينفعشي تتساب يابيه

فام كل واحد حط موضوع يرد بيه علي فضايح البلد وعلي عمو حبيبي الريس

والله بحبك ياريس

شوفت بقي قد ايه انا برئي

مظلوم ياناس

وشكرا سياده القاضي

مستني المؤبد بقي

**Sir.7amato** · 2010-12-17, 07:53 PM

اقتباس:

الجزء الجاااى هيكون الحكم,, وهيكون ااخررررر جزء ان شاءلله

هههههههه
شكلك زهقتى يا حبيبة من جو الإقسام والمحاكم والكلام ده
حتى آخرررررررر بتاعتك تدل على انك بتقولى يارتنى مكنت دخلتهم السجن

بس بجد مجهود جامد وسناريو محبوك
وأهو الواحد مبسوط طلع عندنا سناريستايه قد الدنيا
منتظر الحكم عشان بصراحه اتخنقت من جو السجن عاوز اطلع بقى اشوف الناس
آكل من أكل أمى وأنام على سريرى وأصحى براحتى - دانا حاسس انى هنام 3 تيام متواصلين
عشان يعوضو الارف الى شوفناه فى الحجز

**حبيبـة ابـوها** · 2010-12-17, 09:19 PM

اقتباس:

المشاركة الأصلية كتبت بواسطة MaNsHo0o0

ليه كده بس ما تسجنيهم شهر كده ولاحاجه ونعمل استنئاف بقى وبتاع مستعجله ليه بس

واحد شمتان p:

الحقيقه معدش عندى استعداد اطول فيها لانى حسيت القصه والاحداث ممله مفيهاش تشويق

اقتباس:

المشاركة الأصلية كتبت بواسطة mandozzz

على العموم فى الانتظار "حبيبه بابا" واوعى ظنى يخيب واكتشف اننا فى تركيا

لا فى مصر مش فى تركيا خالص

اقتباس:

المشاركة الأصلية كتبت بواسطة عاشق الايمان

سياده القتضي ( القاضى )

وانا بالنيابه عن نفسي قررت الدفاع عن نفسي

بعيدا عن الحلفاء المدافعين عنا

دا ناوين يجيبولنا اعدام يا بيه

هقول الحقيقة يابيه

هو انا كنت ماشي في امانة الله لقيت

كراكر نايم علي السور بتاع البلكونة بلاش اصوره متجيش طبعا
ولقيته برضه نايم في عربيه ومطلع رجله من الشباك وهو نايم

وفي يوم تاني لقيت حماتو عامل فيها عسكري مرور وبيضحك علي السواقين وبياخد فلوس بلاش اصوره يعني

ومره برضه وانا ماشي لقيت فجر معلقه الاطباق والمواعين علي الحبال بلاش يعني اصورهاا

اما ملكه بحجابي بقي لقيتها طبخه بالصدفه البحته ومن وسط الطبيخ فرخه مشويه حط رجل علي رجل بلاش اصورها يعني

يعني مواقف مينفعشي تتساب يابيه

فام كل واحد حط موضوع يرد بيه علي فضايح البلد وعلي عمو حبيبي الريس

والله بحبك ياريس

شوفت بقي قد ايه انا برئي

مظلوم ياناس

وشكرا سياده القاضي

مستني المؤبد بقي

no comment

اقتباس:

المشاركة الأصلية كتبت بواسطة Sir.7amato

هههههههه
شكلك زهقتى يا حبيبة من جو الإقسام والمحاكم والكلام ده
حتى آخرررررررر بتاعتك تدل على انك بتقولى يارتنى مكنت دخلتهم السجن

لا والله زهئت من القصه نفسها حاسه ان ملهاش لازمه

بس بجد مجهود جامد وسناريو محبوك
وأهو الواحد مبسوط طلع عندنا سناريستايه قد الدنيا

اشكرك على المجامله يا حماتو

منتظر الحكم عشان بصراحه اتخنقت من جو السجن عاوز اطلع بقى اشوف الناس
آكل من أكل أمى وأنام على سريرى وأصحى براحتى - دانا حاسس انى هنام 3 تيام متواصلين
عشان يعوضو الارف الى شوفناه فى الحجز

متقلقش هنرجعك بيتك سليم مفيش فيك خدش حتى وتتهنى بأكل البركه والدتك وسريرك ونام براحتك بئه

**ملكة بحجابى** · 2010-12-18, 10:32 AM

ايه ده بقى انا مسجونة بقالي اسبوع وانا ماعرفش

طيب هنطلع براءة ولا ايه النظام ياجدعان

انا عندي امتحانات لازم اخرج عشان الجق اذاكر ولا اعمل لي ورقتين حتى ينفعوني

مش كفاية بقيت رد سجون وهبقى فاشلة في التعليم كمان

**حبيبـة ابـوها** · 2010-12-19, 11:25 AM

محكمة

بعد الاستماع الي الشهود والدفاع

حكمت المحكمة حضوريا

علي المتهم الاول

WebCraker

بسجن المتهم 10 سنوات مع الاعمال الشاقة نظرا لانة المسئول الاول عن المنتدي وما يحتويها من موضوعات

المتهم الثاني

Sir.7amato

السجن لمدة 3 سنوات لانة المسؤل الثاني والمسئول الاول في حالة غياب السيد كراكر

المتهم الثالث
ملكة بحجابي

الافراج عن المتهمة بضمان حصولها علي الشهادة الجامعية

المتهم الرابع
فجر الاسلام

الافراج عن المتهمة بضمان محل اقامتها

المتهم الخامس

عاشق الايمان

تم تحويل المتهم الي الدكتور النفساني للتأكد من السلامة العقلية له واعادة محاكمته مرة اخري

شكرا لحضراتكم

انتظروني في الحلقة القادمة بعد عرض الاحكام علي السيد رئيس الجمهورية

**ابن مصر** · 2010-12-19, 11:58 AM

الحكم باين وواضح من قبل ما يتكلم

الدواب بيبان من وشه قصدي من عنوانه

كفاااارة يارداله

السدن للددعان

هو حرف الديم راح فين ؟؟

**عبدالرحمن م** · 2010-12-19, 02:06 PM

يا للهول

10 سنين بس ؟ ... يلا بقى ربنا يسهل فى الباقى

أنا جاى أهدى النفوس

**Muhamed** · 2010-12-19, 07:24 PM

يبقى انت اكيد اكيد فى مصر

بحب اطمنكم يا جماعه الحكم هيتم استئنافه وان شاء الله اعدام للجميع

**ابن مصر** · 2010-12-19, 07:26 PM

دليل براءة حماتو

#!

**Pure Heart** · 2010-12-20, 03:21 PM

المتهم الثاني

Sir.7amato

السجن لمدة 3 سنوات لانة المسؤل الثاني والمسئول الاول في حالة غياب السيد كراكر

الحكم دة فية ظلم لكراكر حماتو 3 سنين بس لية وكراكر 10 طيب خلى حماتو 5
وبعدين فى تحيز للبنات اشمعنا البنات يعنى طلعوا

جميل ياحبيبة بابا ومجهود رائع

**Muhamed** · 2010-12-20, 06:18 PM

اقتباس:

دليل براءة حماتو

https://www.youtube.com/watch?v=gi3kx...layer_embedded#!

لما تبقى نازل مصر ابقى قلى علشان الزفه هتستناك فى المطار علشان تطلع من بره بره على حبايبك علطول

**حبيبـة ابـوها** · 2010-12-20, 08:15 PM

اقتباس:

المشاركة الأصلية كتبت بواسطة حبيبـة ابـوها

المتهم الخامس

عاشق الايمان

تم تحويل المتهم الي الدكتور النفساني للتأكد من السلامة العقلية له واعادة محاكمته مرة اخري

رحم الله امرئ عرف قدر نفسه

دا انت بتحبهم اوى واحد واخد 10 والتانى 3 بس الحكم غير عادل على فكرة
امال لو بتعزهم زيادة عن اللزوم هتعمل ايه فيهم ,,, والحدئ يفهم

اقتباس:

المشاركة الأصلية كتبت بواسطة Pure Heart

المتهم الثاني

Sir.7amato

السجن لمدة 3 سنوات لانة المسؤل الثاني والمسئول الاول في حالة غياب السيد كراكر

الحكم دة فية ظلم لكراكر حماتو 3 سنين بس لية وكراكر 10 طيب خلى حماتو 5
وبعدين فى تحيز للبنات اشمعنا البنات يعنى طلعوا

جميل ياحبيبة بابا ومجهود رائع

والله دا اللى قلتو بس محدش سمع كلامى
بشكرك على زوئك يا جميل

**ابن مصر** · 2010-12-21, 02:48 PM

اقتباس:

المشاركة الأصلية كتبت بواسطة mandozzz

لما تبقى نازل مصر ابقى قلى علشان الزفه هتستناك فى المطار علشان تطلع من بره بره على حبايبك علطول

في من دا معاكم ؟؟

Download40725

**عاشق الايمان** · 2010-12-22, 10:47 AM

اقتباس:

المشاركة الأصلية كتبت بواسطة حبيبـة ابـوها

رحم الله امرئ عرف قدر نفسه

دا انت بتحبهم اوى واحد واخد 10 والتانى 3 بس الحكم غير عادل على فكرة
امال لو بتعزهم زيادة عن اللزوم هتعمل ايه فيهم ,,, والحدئ يفهم

**WebCraker** · 2010-12-25, 10:53 AM

10 سنين بس ..

اومال فين المحامى ؟

انا هدافع عن نفسى ..
سيدى القاضى حضرات الجماعة البنى ادمين .. ان المتهم الماثل امامكم لأنه برىء براءة الذئب من دم يوسف انظروا إليه هل هذا وجه بنى ادم يتحدى النظام والحاجات دى ولا بيفهم في الدنيا دى بالزمة دا واد غلبان مبيعرفش اى حاجه يادوب عرف يعمل منتدى ياسيادة القاضى

أيضااااااااااا ياسيدى القاضى .. أليس العقد شريعة المتعاقدين ؟
انظر سيدى القاضى

هنا فى قوانين المنتدى
https://tefanet.protector.pw/vb/showthread.php?t=7889
هتلاقى تحت فى القوانين الادارية
قوانين إدارية :-
» المنتدى غير مسئول عن أى مواضيع او مشاركات يقوم بكتابتها الاعضاء فالمنتدى للعلم ونشر الفائدة والمنتدى يستطيع فقط تعديل هذه المشاركات او حذفها

واخد بالك انت ياعم الحاج المستشار
يعنى انا فى السليم وماليش دعوة بأى حاجه

وليس ياسيدى القاضى عشان انا المدير بتاع المحروق ده يبقى انا زعيم عصابة وآخد 10 سنين واتضرب فى الخلاط ظلم واقتدار فهناك تشكيلات حزبية معارضة تقوم بإشعال الفتنة وتسعى لقلب نظام الحكم مختفية يديرها مهندسين داخل المنتدى لا أعلم عنها شىء لكن سأبحث واتقصى فى الأمر
(واخد بالك ياعم البشمهندس) اهدى علينا كدا عشان مقلبهاش كهربا عليكم