زمان اوى ( مش اوى يعنى ) تقريبا من 10 سنين ولا حاجه كان معترك الثانويه العامه بتاعتى
واحد من وسط جيل ما بعد التحسين
كنت اسمع وانا فى اعدادى على مجاميع بال 105% واقول ياه لو جبتها
ودخلت المعترك
ذاكرت مش انا لوحدى اكيد
ناس كتير ذاكرت وتعبت
المجهود والتعب اختلف من شخص لاخر
والنتيجه برضه اختلفت من شخص لاخر
كنت ساعتها انا وزمايلى شايفين ان الثانويه العامه حياه او موت
هيا اللى هتحدد مستقبل الواحد وهل هيكون المستقبل مشرق ولا مؤلم
طبعا بعقليتى دلوقتى انا شايف المنظومه بطريقه مختلفه
ولكن هقلك على حاجه مش هنساها
4 امثله شفتها فى حياتى
طالب جاب مجموع كبير دخل بيه هندسه القاهره
طالب اخر جاب مجموع كبير برضه ودخل بيه طب القصر العينى
طالب تانى جاب مجموع نص نص ودخل بيها تجاره القاهره
وطالب تانى جاب مجموع قليل ودخل كليه تربيه رياضيه
الطالب الاول اللى دخل هندسه ومتساليش ازاى لغايه دلوقتى موجود فى احد اقسام الكليه كطالب او افتكر انه اتخرج السنه اللى فاتت يعنى دخل هندسه وقعد فيها 8 او 9 سنين لانه اهمل وعاش عيشه الجامعه
الطالب التانى دخل كليه الطب وعاش حياته ونجح كل السنين مره بماده ومره بمادتين وفى النهايه تقديره التراكمى جيد وهوا حاليا استلم نيابته فى الصعيد بعيد عن اهله وفى مكان عشوائى
الطالب التالت اللى دخل كليه تجاره قابلته من فتره وانا رايح الشغل وقالى انه شغال فى البنك الاهلى اللى فى المعادى
الطالب الرابع اللى دخل كليه تربيه رياضيه فهو الان مدرب لاحد الفرق الخليجيه فى كره الماء
4 كانوا زملاء فى فصل واحد معايا
كل واحد فيهم كان ليه طموح فى الثانويه العامه
بعضهم توقف طموحه بعد النتيجه اللى وصلها وبعدها مات الطموح جواه
البعض التانى زرع طموح جديد فى قلبه لان هى دى الحياه
لازم نحط هدف لنفسنا ولما الهدف يخلص سواء بالسلب او الايجاب لازم نحط هدف جديد لينا
الثانويه العامه المرحله الاولى كان هدف وخلص
دلوقتى هدفنا هوا الحصول على اكبر مجموع فى المرحله التانيه مهما كان نتيجه المرحله الاولى
صفحه وراحت المفروض نبذل اقصى جهد فى المرحله الجديده والتحدى الجديد
وبعد المرحله التانيه الحياه مانتهتش بالعكس هتبدأى مرحله جديده باهداف اكتر
النجاح هدف من الاهداف
والتفوق ايضا هدف من الاهداف
اما الطموح فاستمراريته هوا اهم الاهداف