السلام عليكم ورحمة الله وبركاته
ايه اخباركم يا قطاقيط واخبار الاجازة معاكم
ان شاء الله خير
يا سلام النهاردة انا شفت بطولة متتعوضش
بطولة ايه يا تري ؟؟؟
البطولة العربية الاولى لكرة السرعة
البطولة كان اول سنة ليها فى مصر وتم اختيار نادى 6 اكتوبر لو حد يعرفه لاقامة الافتتاحية فيها
اشرحلكم المنظر ع يومين
الجمعة والخميس
الخميس قبل البطولة بيوم كانت ساحة البطولة مفهاش مدرجات مجرد طوب متلون اصفر والساحة فاضية فيها شوية ترابيزات زرقه مصدية متبحترة
الجمعة بقي
الصبح الشغل ابتدى وكانوا شغالين ع سن ورمح وبدا العمل الدؤوب
عمالين يعلقوا اعلام وجزاهم الله خير حطوا كراسي بدل المكان اللى المفروض فيه مدرجات
لا وعملوا حركة جميلة اوى وشيك جدا جابوا ورق ابيض مطبوع عليه اسماء الناس المهمة اللى جاية ولزقوها ع الكراسي بسلوتيب
لمحة ظريفة بس انا شايفاها بقي بايخة
ده ع اساس ان محدش يتوه كل وزير يجري يدور ع اسمه ويقعد ع الكرسي المعفن اللى اتطوعوا وحطهوله
المهم يوم الجمعة كانت كل حاجة اتظبطت مع انى اعتب ع النادى فى انه اختار اصغر ساحة فى حتة مزنوقة كده رغم ان النادى وااااااسع بمعنى الكلمة
وبعدين الساحة دى معلقين فيها لوح الترحيب ع قماش وحد كاتب عليه شفتوا عمركوا فى مبارة كورة كده مثلا ؟؟؟ مستحيل طبعا
المهم الافتتاح بما انه فى النادى اذن ابناء النادى المبجلين هما اللى هيقوموا بالواجب
جابوا فرقة باليه بنات صغيرين
المنظر كان تحفة
المفروض اللبس بمبي فى ابيض المايوه يعنى
تلاقيلك واحدة لبسه لون بمبي فاتح واللى جنبها غامض والتالته فاقع
واحدة لابسة شراب ابيض واللى جنبها فشيه والتالته لابسه جزمة باليه والرابعة لابسه شراب لبنى(غاظتنى البت دى اوى)
واحدة عمله كحكة واللى جنبه مسيبه شعرها وفرحانة بيه والتالته رافعاه لفوق
من الاخر كوسة
ده كله ممكن نتغاضي عنه اذا كان الاداء رائع
خلى بالكم انا قلت _ممكن_
لان الاداء كان ما هو الا نتيجة مران اسبوع تقريبا شكله بيقول كده
البنات داخلين مش عارفين يعملوا ايه والمدربة عمالة تصرخ
وقال ايه كل بنت تمسك اسم الدولة وهيا داخلة ع لوح خشب ووراها الواد اللى ماسك العلم الكبير .. علم دولته يعنى هما كانوا 11 دولة
الحتة دى كانت مسخرة بجد
المفروض بيمشوا فى طريق طويل وبعدين كل واحدة تقف فى مكانها
البنات بقي طبعا كبيرهم 7 سنين واول مرة يقولولهم انهم هيعملوا الكلام ده النهاردة
اول بنت كانت داخلة دخلت حلو
تانى بنت دخلت تجرى والواد يجرى وراها
تالت بنت بقي كانت ماسكة لوحة الدولة بالمشقلب والناس عمالة تضحك
رابع بنت بقي الواد اللى وراها اللى ماسك العلم كان يا عينى منزلة ع عينيها والبت قامت خابطة فى المذيع قامت وقعت عيطت
واللى بعديها جت تدخل راحت راجعة جارية قال ايه خايفة
مسخرة قلتلكم
ده غير الدى جى اللى كان عمال مشغل اثناء الماتشات حماقي
ايه الهبل ده
كفاية كده النهاردة واذا لقيت رد ردين تلاته ابقي اكمل البطولة الفظيعة دى
وربنا يكرم مصر كده ع طول
سلام مؤقت ،،،
p;hdm f',gm hguvf hgh,gn g;vm hgsvum hggn ;hkj tn lwv