طبعا كلامك صح سبيل المفروض اننا نرتقى بالموضوعات الهادفة اللى تخدمنا كأمة وتنمى ثقافتنا وآرائنا وطريقة معالجتنا للأمور
أنا مش ضد الموضوعات الترفيهية والله بس المشكلة فى الكم
بس برده بالنسبة للموضوعات العامة ومواضيع القسم الإسلامى والنقاش الخطأ فى كاتب الموضوع
المفروض إنه يقدم الموضوع بصورة تجذب القارئ وتجبره على إكمال قراءة الموضوع للآخر وده من خلال تقسيم أفكاره وتقديمها فى صورة شيقة
فإن كانت معلومة يرتبها وإن كانت قضية يناقشها بأسلوب حماسى يجذب القارئ وهكذا
يعنى مثلا إحنا بندخل الموضوع الترفيهى ليه لأنه فى تفاعل كبير مش بيبقى رأى وخلاص بيبقى مستمر ما بينا
أنا قبل كدا كنت اقترحت اقتراح علشان كمية الموضوعات كلها مش الترفيهية بس
يعنى كفاية موضوع كل يوم أو يومين للعضو ده هيدى فرصة لبقيه الأعضاء يقراوا الموضوع ويتفاعلوا معاه
كمان هيدينا فرصة نشوف أعضاء تانية ونقرا موضوعات كانت بتوه فى الزحمة
وهيدى فرصة للعضو نفسه إنه يشارك ويتفاعل مع موضوعات زمايله
وبالتالى كلنا هنستفيد وده اللى أنا لمسته فى أول فترة جيت فيها المنتدى بعد ما أميرة كلمتنى عنه
لأنى (( والكلام عن نفسى بس)) بألاقى موضوعات كتيرة ومش باعرف أرد عليها كلها لضيق الوقت فباضطر إنى أحاول أرد على موضوع واحد لكل عضو وممكن تبقى فى موضوعات قيمة وما اعرفش أرد عليها
هو تيفا منتدى كويس جدا وانا باستفيد منه كتير إحنا بس عايزينه الأفضل
تقبلوا رأيى وآسف على تأخرى فى المشاركة