انا هبدأ بخاطرة لآية فى سورة يوسف مع انى سورة يوسف دى كلها خواطر عندى بس هبدأ بآية


فَصَبْرٌ جَمِيلٌ وَاللَّهُ الْمُسْتَعَانُ عَلَى مَا تَصِفُونَ

اد ايه الآية دى جميلة اوى وصف الصبر بالجميل والاغرب انها اتقالت فى مواقف اصعب ميمر عليها اى انسان
قالها سيدنا يعقوب مرتين عليه السلام
الاولى لما جائوا اولاده بدم كذب على قميص سيدنا يوسف عليه السلام وقالوله ان الذئب اكل سيدنا يوسف وهو عرف انهم بيكذبوا عشان نسيوا يخرقوا القميص
لو حد تانى مكان سيدنا يوسف
اى اب تانى
كان هيطيح فى عياله بالضرب وكان هيطردهم من البيت وكان هيقول قلبى وربى غضبانين عليك ليوم الدين

لكن سيدنا يعقوب قال الاية دى
فصبر جميل والله المستعان
ووصف الصبر الجميل فى اشد ابتلاء وبعد كده استعان بالله
يعنى ده كان رد فعله الاولانى

وقالها كمان مرة لما نفس الاخوات سابه ابنه الثانى فى مصر
يعنى لو اب تانى
وسامح عياله على فعلتهم الاولى كان هيتكتب فى نشرة الاخبار وبعدين مش بعيد يديله جايزة نوبل فى التسامح

طب لو عياله عملوا موقف شبيه تانى
اكيد بقه رد فعله مش قادرة اصورة
وبالرغم من كده رجع سيدنا يعقوب وقال فصبر جميل ووصف الصبر بالجميل تانى

قال الله(فَصَبْرٌ جَمِيلٌ عَسَى اللَّهُ أَنْ يَأْتِيَنِي بِهِمْ جَمِيعًا )



وبعد اما كان زعلان على ابن واحد بقه زعلان على التلاتة
سيدنا يوسف عليه السلام واخوه اللى وجدوا معاه صواع الملك فى وعاءه واخوهم التالت اللى هو كبيرهم اول واحد حس بالندم اللى هو مرضاش يرجع معاهم لابيهم حتى يأذن له سيدنا يعقوب او يحكم الله لانهم خالفوا وعدهم مع ابيهم

يااااااااااااااه ايه الجمال وايه قوة الثقة والاستعانة بالله دى

وكمان فصبر جميل قالتها السيدة عائشة رضى الله عنها فى حديث الافك
اول مسمعت ما تناوله المنافقين فى المدينة قالت كلام حلو صعب ان اى ست فى وضعها كانت هتثور وهتتنرفز وممكن تفكر فى الانتقام من اللى جاب فى سيرتها
لكن هى قالت انا مش حافظة كلامها بالنص بس دورت عليه وجبته

فقالت: والله ما أدري ما أقول لرسول الله صلى الله عليه وسلم، فقلت وأنا جارية حديثة السنّ لا أقرأ كثيرًا من القرءان: إني والله لقد عرفت أنكم سمعتم بهذا حتى استقرّ في أنفسكم وصدّقتم به، فإن قلت لكم: إني بريئة – والله يعلم أني بريئة – لا تصدّقوني بذلك ولئن اعرفتُ لكم بأمرٍ – والله يعلم أني بريئة – لتُصدِّقوني وإني والله لا أجد لي ولكم مثلا إلا كما قال أبو يوسف {فصبرٌ جميل والله المُستعان على ما تصفون}.

يعنى بجد 3 مواقف اصعب من بعض على اى انسان

هو الصبر حباله طويلة بس ليه نتيجة

سيدنا يعقوب صبر على فراق يوسف وعلى فراق ولاده التانيين اللى بعدوا عنه ولا ايذاء ولاده لسيدنا يوسف واخيه صبر على كل ده
وفى الاخر ربنا رجعله سيدنا يوسف وهو عزيز مصر واخو سيدنا يوسف معاه
وكمان ربنا غفر لبقيه ابناءه على اذيتهم لاخواتهم

والسيدة عائشة نتيجة صبرها ان ربنا نزل لتبرئتها ايات هتفضل تتقرأ ليوم تقوم الساعة