الحلقه الثالثه
فوجئ يوسف بـ نور تفتح باب السيارة و تجلس بجواره .. و تخبره بأنها ذاهبة الى القاهرة ..
نور :- أنا مسافرة القاهرة .. و لا عندك مانع !!
يوسف فى غضب :
- لااا ...... مش كفاية اللى حصل هنا ..
نور فى دهشة :
- أيه اللى حصل يعنى .. عشان جالك شوية برد !!
يوسف :- ده بسببك ضاعت منى ... ثم أدرك ما يقول فأوقف حديثه ..
نور فى لهفة :
- ضاعت منك أيه ؟!!
يوسف :- مفيش .. و بعدين انتى مش خايفة منى ؟!! .. يعنى أنا شاب .. و الطريق طويل ..
نور فى ابتسامة :
- لا .. اطمن .. اللى قدامك دى معاها الحزام الأسود فى الكاراتيه .. وبعدين شكلك ابن ناس ...
اخرج يوسف نفسا عميقا :
- يعنى مفيش فايدة ..
نور تشير بيدها ليبدأ الرحلة :
- يلا .. يلا ..
يوسف :- بس أنا عندى شرط ..
نور فى دهشة :
- شرط أيه !!
يوسف :- مش عاوز و لا كلمة طول الطريق ..
نظرت اليه نور:
- و لا كلمة .. و لا كلمة ؟
يوسف :- اه .. و لا كلمة ..
صمتت نور قليلا بعدها نظرت اليه مرة أخرى :
- هحاول ..
***
بدأت السيارة طريقها الى القاهرة .. و كلما تحاول نور أن تتحدث يشير اليها كى تصمت فتشعر بالغضب .. و واصلا هكذا طريقهما حتى اقتربا من القاهرة .. بعدها نظرت اليه :
- ممكن موبايلك ؟ .. عندى مكالمة لازم اعملها ..
يوسف :- و موبايلك فين ؟؟
نور :- موبايلى فاصل شحن ..
أعطاها يوسف هاتفه .. و بدأت الاتصال .. بعدها سمع يوسف رنين هاتفها .. فنظرت اليه :
- أنا كدة سجلت رقمك عندى ..
هز يوسف رأسه .. و عاد ليقول فى نفسه :
- والله مجنونة ..
....
بعدها وصلت السيارة الى القاهرة .. و طلبت نور أن تغادر السيارة ..
: - أنا متشكرة جدا .. مش عارفة أشكرك على أيه ولا أيه ..
نظر اليها يوسف :
- مش عاوز أشوفك تانى ........ ثم تركها و غادر ..
***
عاد يوسف مرة الى بيته .. و أعاد سلاحه الى مكانه .. و هناك وجد حسام و منال فى انتظاره .. فنظر اليه حسام وهو يحتضنه :
- طبعا المهمة اتنفذت ..
صمت يوسف قليلا ثم نظر الى منال :
- بلغى البنك يرفض استقبال أى تحويل فلوس عن المهمة دى ..
منال فى دهشة :
- هى المهمة ...
يوسف :- أيوة .. الهدف سافر و المهمة فشلت ..
حسام :- ازاى .. دى أول مرة تحصل ..
يوسف فى سخرية :
- كله بسبب بنت ..
حسام :- بنت !!!!
أكمل يوسف :- بنت كانت بتغرق .. و انقذتها و بعدها تعبت و مقدرتش أنفذ المهمة ..
منال و كأن الغيرة أصابتها :
- بنت ... هى البنت دى حلوة ..
يوسف :- دى مملة ..
منال :- انتو اتعرفتو كمان !!
يوسف وقد شعر بغيرة منال :
- لا .. دى وقتها بس ..
نظر حسام الى يوسف :
- كاسانو .. بنت يعنى ضعف .. يعنى انهيار لامبراطورية كاسانو ..
ابتسم يوسف :- مش كاسانو اللى تأثر فيه بنت ...
***
أخذ يوسف قسطا من الراحة .. بعدها بدأ يستعيد حياته مرة أخرى و يواصل ممارسته للرياضة .. فحياته تحتاج الى الهروب و السرعة فى أوقات كثيرة .. و تزداد دهشته من اتصالات نور المتتالية .. فيبتسم و يمتنع عن لرد ..
....
حتى جاء مساعده حسام بعد أيام ليخبره :
- احنا مش هنرفض تحويل الفلوس لحسابنا عن المهمة اللى فاتت ..
يوسف :- ليه .. المهمة فشلت ..
ضحك حسام :- لا .. لحد دلوقتى المهمة لسة موجودة ..
نظر اليه يوسف فى دهشة :
- أنا مش فاهم أى حاجة ..
حسام :- نفس الهدف هيكون موجود فى حفلة الشهر الجاى .. فى دار الأوبرا .. و الحفلة دى هيكون فيها عرض عالمى ..
يوسف ينظر الى حسام :- و بعدين .. كمل ..
حسام :- احنا عرفنا ان العرض بيعتمد على المؤثرات الضوئية .. و لحسن حظنا ان فيه وقت , النور هيتقطع تقريبا عشر ثوانى ..
يوسف و قد فهم ما يفكر به حسام فهز رأسه و ضحك :
جميلة أوى المؤثرات الضوئية دى ..
حسام :- بس خد بالك لازم تحدد هدفك كويس .. لأن مفيش احتمال للخطأ ..
يوسف فى غضب :
- مش عاوز اسمعها منك تانى ..
بعدها صمت حسام قليلا :
- بس فيه مشكلتين .. لازم نفكر فيهم ..
يوسف فى لهفة :
- أيه هما ؟
حسام :- كل مداخل الأوبرا متأمنة تأمين كويس .. و الحل الوحيد انك تدخل كشخص عادى مدعو للحفلة ..
يوسف فى ثقة :
- و أيه المشاكل فى كدة !!
أكمل حسام :
- المشكلة الاولى .. ازاى هتقدر تدخل و معاك سلاحك وسط التأمين ده ..
يوسف :- و التانية ؟
حسام :- المشكلة التانية ..ان الحفلة دى للثنائيات بس .. يعنى لازم تكون معاك بنت و انت داخل ..
صمت يوسف قليلا .. فهو يعلم أن مساعدته منال لا تستطيع القيام معه بتلك المهمة بعدما تورطت فى عملية قتل .. و أصبحت مطاردة من الشرطة .. و أخذ يفكر قليلا .. حتى سمع صوت رنين هاتفه .. فنظر الى حسام :
- فيه مشكلة منهم اتحلت .. أنا خلاص لقيت البنت ..
يتبع
