اقتباس:

دا العيال في الثانوي الوقتي بشربوا حشيش يا فرحتي

فى احد المرات ركبت اختراع القرن الحادى والعشرين الذى يعرف بالتوك توك

كان يقوده طفل


واعنى كلمه طفل

لا يتجاوز ال 11 سنه باى حال من الاحوال

الملفت للنظر كون هذا الطفل يشرب السجاير بطريقه طبيعيه


شئ عادى جدا

كانه مثلا بياكل كيس شيبسى او كوبايه عصير كما يفعل اقرانه فى تلك السن الجميله فى حياه الطفل

ما صعقنى انه خلال رحلتى معه الى البيت تقابل مع توك توك اخر

وهنا توقف وتبادل كلمات مع الطفل الاخر الذى يقود تلك المركبه العظيمه اللى جابت الخيرات لمصر ( ودى لو فتحت باب للنقاش عنه مش هقفل )

المهم

ملخص كلامهم ان واحد تالت جاب سجاره من نوع خاص وانتوا فاهمين خاص اقصد بيها ايه والسائق التانى شربها وكانت تمام مش زى اللى شربوها عند شخص تانى الخميس اللى فات

طبعا مش هوضح الكلام لان الصاعقه نزلت عليا وانا بسمع

محاولتش انقاش

او حتى اتكلم مع الولد ده

دا طفل

كيف يتم توجيهه

كيف اخاطبه بمنطق علمى او دينى او اخلاقى

لما قريت كلام بوص فى موضوع ثانوى تزكرت ان الكارثه نزلت لاقل من ذلك


ولكن

دعونا نكون صريحين

لقد فكرت فى مكان عملى ان اضع بعض المصقات واعلم انه يوجد الكثيرين معى متحمسين للفكره وينتظرون فقط ال push

عرضت الموضوع على من يفوقنى خبره وسن ويمكنه توصيل صوتى لرئيس القطاع حتى يتم الامر

فقال لى

مهلا

لا بد ان تنظر لبعض النقاط

لدينا فى المشروع نوعان من الناس

هناك المهندسين ويقطنون المبنى الادارى وهناك الفنين ويقطنون الورش

اذا قررت وضع اعلامه فى كل مكان

من المستفيد

بنظره اخرى

لو وضعت تلك الصوره لنا معشر المهندسين فستجد ان رد الفعل لن يتجاوز الشكر على الفكره الجميله

على الطرف الاخر معشر الفنين اذا علقت تلك الصوره فى كل مكان يجلسون فيه وبينهم من يشرب المخدرات وهذا اكيد فهل تعتقد انه قد يغير

ساقول لك ماذا سيرد الفنى بعقليته على صوره كتلك

ان تلك الحمله وتلك الصور وما يحدث من خطوات تهدف الى علاج الناس ولاد الناس الكويسين اللى بيشربوا المخدرات مجرد انهم معاهم فلوس زياده او علشان واحد خسر حبيبته او سبب هايف وسهل نغير رايه

مش المصايب اللى فوق دماغ العامل ومش لاقيلها حل غير بالنسيان

فكرت مليا فى وجهه نظره

افكار اخرى بدأت تتداخل فى عقلى

هل اجعل الحمله ضد المخدرات فقط

اردت فى البدايه ان اجعلها عن كل تصرف خاطئ

اردت ان اجعلها لمن يشرب المخدارب والسجاير وكل ما يذهب عقل الانسان ولو ثوانى

ستسخرون لو قلت انى كنت بدات فى ابسط حاجه المنبهات حتى زى النيسكافى وما سابه من نصيححه مستمره لزمايل بعدم الاكثار منه لان معدله لما يكون 3 مرات اثناء العمل دا معدل كارثى

لقيت فى تصرفات كتيره

وبعدين فكرت فى كيف اصل الى حل

لن افرح بالقاء الضوء على مشكله دون حل لها

لن افرح بان يقال ان فلان فعل خير ويتبنى حمله لكذا او لكذا مدام من يقول ذلك ليس المقصود بالحمله

دعونا نضع هذا مبدء لنا جميعا

اذا اردنا اصلاح حقيقى فلنجعل دستور عملنا ليس فقط اظهار المشكله ولكن لابد من التفكير ايضا فى الحلول التى تناسب المشكله

كل واحد فينا

فى بيته

فى الشارع

مع زمايله

فى الجامعه

فى شغله

كل واحد فينا بيقابل ناس مدمنين او لديهم تصرفات خاطئه

حاول معاهم

شوف مشكلتهم من ايه

شوف علاج اخر

حاول تنصح

حاول توجه

كله يتحرك فى الطبقه اللى شايف انه ممكن ياثر عليها

كل واحد فينا ياريت يشوف مشكله ويحاول يشوفلها حل

مش هنكر واقول ان موضوع كارثه اللى انا كنت عامله كان محاوله منى لالقاء الضوء حول نماذج الناس التى ينتهى بها الحال الى الادمان

ولكنى اكتشفت قبل ان انهيه انى مهما كتبت فى مشاكل او انواع سيظل هناك الجديد والجديد وانواع وانواع لم اسلط الضوء عليها ولم اظهر مشاكلها التى تؤدى بهم الى هذا الطريق

ساستمر فى محاولتى عسى ان يستفيد واحد من بين ملايين البشر منها

عذرا على الاطاله

ولكن الموضوع اراه انه يستحق