ازيكم يا هيلتى وحشتووووووووووووونى موت
تسمحولى اقطع مناقشتكم فى موضوع الجامعة لانى انا بجد فرحاااااااااااااانة خالص
وعاوزة اقولكم ايه اللى مفرحنى
نبدا الحكاية من اولها
الحكاية بدايتها ترجع من الاعدادى انا كان ليا اتنين صحباتى بحبهم موووووووت
كنا احنا التلاتة مع بعض دايما
بس للاسف فى واحدة منهم زعلت مننا وافترقت عننا وبقينا احنا اتنين وهى واحدة
دى المرة الوحيدة اللى حد من اصحابى يفارقنى والحقيقة الموضوع كان صعب عليا ايامها
هتقولولى طيب مرحتيش انتى وصحبتك تصالحوها ليه هقولكم هى قاطعتنا فجأة وبقت تتهرب مننا لانها زعلانة مننا من غير نقاش و السبب يمكن فى المرحلة السنية بتاعة الاعدادى كان ممكن يكون سبب جامد لكن لو بصيت للموضوع دلوقتى هلاقيه مش محتاج ان هو يحصل فراق
بس ربنا اللى يعلم بالرغم من كل ده ان انا بعزها وبحبها
لدرجة ان من حوالى سنة فكرت اتصل بيها بس اتحرجت خفت احسن تقول بعد السنين دى ايه اللى خليها تتصل
وطبعا انا مشفتهاش خالص من الاعدادى
بس انا و صديقتى اللى فضلت معايا انتيم جدا جدا ( اللى للاسف الشديد والحسرة و الالم دخلت كلية الهندسة )واحيانا كتير كنا بنتكلم مع بعض نفتكر صديقتنا اللى سابتنا
ونسأل يا ترى دخلت كلية ايه؟؟؟؟؟؟؟؟؟
المهم يوم الاحد اتفقت مع صحبتى الانتيم اللى فى الهندسة انى بعد لما اخلص محاضراتى هقابلها على البحر( لان انا كليتى فى المجمع وهى كليتها الهندسة منفصلة عن المجمع )
وانا خارجة من باب الكلية ورايحة اقابل صحبتى ببص قدامى لقيت صاحبتنا اللى فارقتنا من حوالى 4سنين واكتر
انا مش قادرة اوصفلكم ايه اللى حصل جوايا حصلت جوايا فرحة بها شىء من التردد
فرحت جدا جدا ومترددة خايفة انها هتكون لسه زعلانة بس قلت مش معقول تكون زعلانة ده كان مخ عيال كل ده دار فى عقلى فى اقل من ثانية وانا عينى فى عينها ومبتسمين لبعض
وبعد كده رحنا لبعض وحضنا بعض جاااااااااااااااااااااااااااااااامد فى مشهد مؤثر يوسف شاهين ميعرفش يعمل زيه وكادت اعيننا تدمع من الفرح وسألتها دخلت ايه قالتلى تجارة انجلش
وسبحانك يا الله يشاء قدرك انى اقابل صحبتى اللى فارقتنا فى نفس اليوم اللى رايحة اقابل فيها صحبتنا التالتة المهم وقفنا واتكلمنا وقلتلها تيجى معايا عشان نشوف صاحبتنا اللى فى الهندسة اللى مستنيانى ع البحر و طبعا كنت اتاخرت عليها و رحت فى المكان ولسه هتديلى اسطوانة تهزيق عشان اتاخرت عليها قلتلها قبل اى كلام انا معايا لكى مفاجأة
مين دىىىىىىىىىى؟؟؟؟؟؟؟؟؟؟
رحت بصت للى واقفة جمبى قالتلى دى .............. قلتلها اه قالتلى هى وكل ده وهى عليها علامات الذهول قلتلها اه
راحوا حضنوا بعض فى منظر مؤثر
و اتمشينا على البحر وخدنا تليفوناتها وخد ايميلها ووصلنا صاحبتنا لكلية الهندسة عشان محاضراتها
بجد الموضوع ده فرحته لسه ماثرة عليا لغاية دلوقتى خصوصا اللى انا بكلمها على الايميل
بس الحمد لله بجد بجد انا ارتحت لان موضوع اللى احنا متخاصمين كان بيتعبنى بالذات لما كنت بسمع احاديث الرسول صلى الله عليه وسلم عن المتخاصمين
معلش يا جماعة طولت عليكم بس بجد انا كنت عاوزة انقلكم فرحتى ويارب اسلوبى فى سرد الموضوع ده تكونوا فهمتوه عشان تقدروا تعرفوا اد ايه انا فرحانة
لانى بجد جزء كبير جوايا ارتاح
واسفة للاطالة وعودة لمناقشة مواضيعكم