في اوضه صغيره فوق سطح بيت من البيوت عاشت ارمله فقيره مع ابنها الصغير حياه متواضعه في ظروف صعبه
الا ان الاسره الصغيره دي كانت تتميز بنعمه الرضا وعندهم قناعه وهي كنز لا يفني.
بس اكتر حاجة كانت بتضايق الام نزول المطر في الشتا ..
لان الاوضه كانت عباره عن اربع جدران وفيها باب خشب .. لكن من غير سقف.
الولد كان عنده اربع سنين وخلال الاربع سنين دول كان المطر مش بينزل كتير
وفي يوم من الايام السما اتملت غيوم وسحب كتير
ومع بدايه الليل بدأ المطر ينزل علي المدينه بغزاره شديده جدا
كل الناس احتمت في بيوتها .. اما الارمله وابنها الصغير كان موقفهم صعب.
بص الولد لامه ودفن نفسه في حضنها .. بس هدوم الام كلها كانت مبلوله من المطر.
جريت الام بسرعه لباب الاوضه خلعته وسندته علي الحيطه مايل كده وخبت ابنها تحته عشان تحميه من المطر.
بص الولد لامه في سعادة بريئه وعلي وشه ابتسامه رضا وقالها :
ياتري الناس الفقراء اللي مش عندهم باب بيعملوا ايه في المطر ده ؟!
الولد الصغير حس في الوقت ده انه غني .. لمجرد ان بيتهم فيه باب
مافيش احلي من الرضا بالحال والقضاء والقدر ..
لانه هو ده مصدر السعاده وراحه البال ووقايه من امراض التمرد والحقد