للأسف وجدت الكثيرين لا يستخدموا المحمول ـ ووجوده مجرد " فشخرة " وللتباهى والمنظرة فقط
فكتبت لهم
سيدى الموبايل

مع إن حالى تعبان ودُقَّـه
لكِـنِّـى عَصرِى وباجارى عَـصْرِى
دينت نَـفْـسِـى وما بقتش آكُـل
علشان سلامته سيدى الموبايل

ماسكه و كأنى شايل لاسلكى
الناس تهابنى وتعمل حسابى
والسكه تفضى ، أمشى براحتى
فاكرينى شرطه أو م المباحث

ولما أحُـطُّـه فى جرابه جنبى
احساسى ، شايل فَـردِة طبنجه
وأمشى ابَّرق ، كَاتِـم فى نَفَـسِـى
وصدرى يعلى و بابقى وارم

فى أى زحمه باعمل لى منظر
أعمل كأنى باطلب وأكشر
شويه اسمع وكتير أزعَّـق
وأدِّى أوامر والناس تبحلق

بس مضايقنى ارساله يقطع
ب اضطر أشحت وادفع لشحنُـه
وأمَـلى أكسب فى مسابقه واحده
ومعايا تضرب والبليـة تلعب

*******************