°l||l° عفوا فالمصريين لن يلعبوا دور الكومبارس ابدا .. °l||l°

[mohamed ali]

كتب محمد علي: (ma852003)

بسم الله الرحمن الرحيم

السلام عليكم ورحمة الله وبركاته

الكوره والبيزنس

الرابط لايظهر فى الأرشيف

انتظار .. ترقب .. تشجيع .. فرحه .. واخيرا حزن لماذا ؟

انتظار :

انتظرنا كثيرا بطولة غانا 2008 لنستمتع بكاس الامم الفريقيه وبمنتخبنا الوطني
انتظرناها كثيييييرا وبفارغ الصبر املين ان نقدم مستوي رائع ونحتفل بفريقنا ومعه

ترقب :

اقتربت البطوله علي البدايه
ترقب من الشارع المصري ومتابعة للفريق الوطني
تشجيع لعضاء الفريق وحماس منقظع النظير املين ان نعود بالكاس

تشجيع :

بدات البطوله بصافرة الحكم في اولي مباريات المنتخب وفوز اقل ما يوصف بانه رائع برباعيه علي الاسود
شكك العالم في هذا الفوز بانه مؤقت لكن المصريين انطلقوا في الشوارع معلنين فرحتهم الاولي واملين ان تستمر
انطلقت الزغاريد والله سمعتها والاعلام ترفرف والاصوات تتعالي باسم مصر . مصر .
المناقشات بين المواطنين .. هل سنفوز بالكاس .. هل يفعلها الفراعنه ويستقبلهم الرئيس
هل سننتظر ابطال الكاس في المطار لنحتفل معهم في اروع الليالي . هل .. هل .. ؟!

فرحه :

استمرت الانتصارات بفضل الله قبل كل شيئ ثم بعزيمة الابطال
ابدع الفراعنه وكسبوا احترام العاالم اجمع

اخيييرا :

خسارة للاسف
بعد ان كسب المنتخب احترام العالم اجمع واجبروهم بتدينهم الذي اتضح حينما تبرعوا للجاليه الاسلاميه لبناء جامع في كوماسي
خسر رجال الاتحاد المصري للاسف احترام الشعب نفسه
او بمعني ادق بعض رجال الاتحاد .. اصحاب البيزنس .. الطامعين في الدنيا ..

الليله الاخيره

المعاد . بعد وصول رحلة المنتخب الوطني لمطار القاهره
الحدث . رغبة الشعب المصري في الحتفال مع لاعبيه

ذهب الي المطار من جميع انحاء الجمهوريه من المنصوره والشرقيه والقاهره والاسماعيليه ومن هنا ومن هناك
لكنهم لم يهنئوا ولم يحتفلوا مع الفريق بعد هذه الرحلة الشاقه .. لماذا
الحجه هي حتي لا يتم ارهاق اللعيبه

يتم نقل اللعيبه في سيارات خاصه لبيوتهم ثم المفاجاه انهم في اليوم التالي يحتفلون في دبي
ثم بعد الاحتفال هناك افتكروا اخيرا الشعب
لا اخواني فنحن لا نلعب دور الكومبارس ابدا

حجة الاطفال لاقناع الكبار

هل الاحتفال مع الشعب المصري وفي ارض مصريه يعتبر ارهاق
اما الاحتفال في دبي لا يعتبر ارهاق ؟!

[la princesse]

بصراحة انا مش شيفاها مشكلة كبيرة يعنى انا شايفة المشكلة فى حاجة تانية خالص
هو طبعا النصر فرحنا كلنا وعلى اسم مصر بس هل يستحق اننا نحتفل بيه علطول
من رايي فى الاول والاخر دى لعبة واى نعم انتصارنا كويس ونفرح ونحتفل بس بحدود
وانا شايفة ان المصريين بيتمسكوا باى حاجة بتفرحهم عشان ينسوا همومهم وخلاص
يعنى ممكن يفضلوا يحتفلوا ويفتخروا علطول وينسوا حاجات اهم بكتير اوى
ياريت نفوق والله ونشوف الدنيا حوالينا ماشية ازاى

[WebCraker]

موضوعك كويس ماشاء الله ,, جميل

وانا متفق على أميرة فى اللى قالته ايضا .. الكورة او الرياضة عموما مش كل حاجه

وبقول برضوا انها مهمه لكن نعطيها حقها ,, حقها فقط وليس اكثر من حقها فتطغى على الاساسيات الآخرى

وتضيع اهدافنا السامية فى الحياة نحن المسلمون ,,

وحلوة اوى حكاية دبى دى بصراحة اول مرة اعرفها .. انا مش مهتم بالكورة عموما بس خير إن شاء الله طالما ان اللعيبة مرتاحين مفيش مشكلة
خليهم يتبسطوا ويزأططوا

[mohamed ali]

انا مش معاكم انا معاهم

احترامي لارائكم ولكنكم لم تذوقوا ما ذاقته الجماهير المتعطشه لهذه اللعبه عندما انتظروا الفريق في المطار ليحتفلوا مع الفرقه ولكن اصحاب المصالح الشخصيه فضلوا البيزنس والاموال عن الجماهير

[Muhamed]

بالطبع اوافق مليون فى الميه على الكلام ده واحب اضيف ان السبب المعلن حتى الان ان الجهاز الفنى هوا من طلب ذلك لاراحه الاعيبه

على اساس يعنى ان الاعيبه هتلعب متش فى الاحتفال ولا حاجه !!!!!!!!

الموضوع ببساطه يا ساده ان كل واحد فى البعثه لهف 100 الف دولار

طب بزمتكم مش يبقى حرام لو ضيعوا الفلوس دى من اجل سعاده الجمهور الغلبان اللى جرى يستقبلهم

وحظهم ان الريس عمل الاستقبال فى المطار مخلهاش فى يوم تانى علشان يجبرهم يفرحوا مع شعبهم

وطبعا بعد اللى حصل فى المهرجان اللى مقدرش اوصفه الا بكلمه مسخره

سؤاء من عمرو زكى او الحضرى او شادى ودول كباتن كبيره ونجوم كنا بنشفها بتسجد تحمد ربنا ودلوقتى نرا العكس تماما من رقص لا يليق باى انسان محترم مسخره وقلت ادب اثارت تحفظى خلال متابعتى للمهرجان ولم استمر كثيرا فى المتابعه لشعورى بالاشمئزاز

بس بعد كده سمعت عن لقطه زادت احترامى بلاعب

وهوا الخلوق ابوتريكه

على حسب اللى سمعته ان سعد العبيط كان عمال ينادى عليه علشان ينزل يرقص ولكنه رفض باحترام لانه انسان محترم ولذلك يحترمه الجميع

دى وجهه نظرى اللى انا مقتنع بيها

بس برضه فى وجهه نظر اخرى لازم اوضحها حتى اوضح كل الحقيقه

لو واحد مننا نجح فى امتحان واهله فرحانين بيه وعمه دعاه على حفله احتفالا بيه

الرد هيكون ايه ؟

يعتذره ويطلب التاجيل

ولا يقبليروحله بما ان اهله هوا معاهم علطول والافراح لن تنقطع فيها (خصوصا ان اللى احتفل بيه عند عمه هما اهله برضه )


دوله الامارات الحبيبه احترمها واقدر لها ما فعلته سؤاء معنا او مع المنتخب العراقى الشقيق فتصرف كهذا لا نتيجه له سؤاء رمى بذور المحبه بين الدول ولا يوجد افضل من المجال الرياضى لرمى تلك البضور املا فى ان تكبر فى يوما ما لتصبح شجره صداقه جزورها غائره فى الارض

ضيفوا على كده فرحه المصريين اللى هناك فى الامارات وكلنا شفنا الاستاد شكله ايه

المصريين هناك مغتربين

فى دوله عربيه اه لكن برضه بعيد عن ارضهم

الشئ الوحيد اللى خلانى اعرض عليهم هذه الفكره فى ان الموضوع مش سيئ للدرجه هيا الفرحه التى عاشها المصريين فى دوله الامارات

المنتخب معانا احنا طول الوقت نفرح بيه براحتنا

لكن بالنسبه للناس المغتربين اظن ان الفرحه فى التوقيت ده حاجه كبيره اوى

اما موضوع الفلوس

فدلوقتى نفس المثال السابق

طالب نجح وعمه عزمه على حفله واداله هديه

ناس قالت اللى عايز يهادى يجيله بيته

طب لاعقل كده

يعنى العم هيعمل الحفله فى بيت الطالب ولا فى بيته والمكان الطبيعى للهديه هيكون فى بيت الطالب ولا فى مكان الحفله

اظن انى كده وضح وجهتين النظر اللى فى تفكيرى على هذا الموضوع

ومنتظر ارائكم

[L'Siver]

أنا معاك يا ماندوز في موضوع الحفلة لأن الاحتفال بالبطولة معانا هنا هيطول لأن زي ما الكل عارف المصريين نفسهم في حاجه تفرحهم ومش هيعدوا المناسبة دي كده لأ دول هيحتفلوا يبقى المنتخب يروح يفرح بقيت الناس اللي بره


أما عن جزئية الرقص يا ماندوز هسألك سؤال
انت راجل محترم وبتصلي وكل حاجه
يوم فرحك او يوم نجاحك وحفلة تخرجك اكيد كنت فرحان هل انت مرقصتش من الفرح وعلشان تفرح اللي حواليك

أكيد طبعا هترقص وهتفرح وأكيد انت هتكون وكنت عاوز الناس كلها ترقص معاك لأ وكمان ايه لو محد فرح معاك وقام على الاقل صقف هتقول ده نسان اتم
صح ولا غلط يا ماندوز وأنا أذكر ان فيه موقف أيام النبى عليه الصلاة والسلام بس مش فاكره ومش عاوز اقول حاجه غلط المهمان الموقف ده بيوضح ان الاناسن يوم العيد او لما يكون مبسوط من حقه يفرح مدام مفيش حاجه حرام واللعيبة مجابتش رقاصة رقصوا معاها اللعيبة رقصت وفرحت وفرحت الناس
مش كل حاجه حلوة لازم نطلعلها عيوب وزي ما منتخب العراق فرح كل العراقيين وخلاهم يفرحوا رغم أزماتهم مع الأمريكان والاحتلال احنا برضه عاوزين حاجه تفرحنا وتنسينا الغلا في الاسعار

[Muhamed]

واللعيبة مجابتش رقاصة رقصوا معاها اللعيبة رقصت وفرحت وفرحت الناس


بس مش لدرجه ان الحضرى يلبس علم مصر ويرقص بيه !!!!


يوم فرحك او يوم نجاحك وحفلة تخرجك اكيد كنت فرحان هل انت مرقصتش من الفرح وعلشان تفرح اللي حواليك


رقص عن رقص يفرق يا محمود

راجع اللقطات وهتعرف ان كان فيه بعض الحاجات الاوفر شويتين خصوصا من ال 3 اللى قلتلك عليهم


ضيف على كده ان انا فى فرحى عيلتى اللى شايفانى

مش العالم العربى كله

بل والعالم كله اللى ممكن يتفرجوا على احتفاليه ابطال افريقيا

والاهم من ده ان فى جيل صغير اللى هما سن 13 سنه مثلا دول اللاعيبه دى احد الامثله للشباب اللى بيفكروا يكونوا زيه طيب لما يشوفوا رقص للدرجه دى متفتكرش انهم هيحاولوا يقلدوهم

انا مع الفرح


ولكن بحدود

[فجر الاسلام]

بصوا يا جماعة رايى مش هيختلف عن رايكم

انا مش كروية اوى
بس طبعا الماتشات بتاعة المنتخب بتفرج على الاجوال ما عدا لو كان نهائى بتابعه

انا معاكم اللعيبة عملت انجاز ولعبت كويس ومن حقهم ان هم يتكافئوا
الحقيقة هم اتكافئوا وخدوا اكتر من حقهم


الكورة مش مجرد لعبة هى رياضة

بس ارجع اقولكم فى ناس عملوا لمصر حاجات اعظم واحسن سواء فى الرياضات الاخرى ( يعنى انا افتكر ان فى الاوليمبيات معظم الوقت الاصحاء نرجع يا مولاى كما خلقتنى من غير حتى ميداليه بصفيح والمعاقين يحققوا اعلى الميداليات وللاسف مش بينالوا تكريم
وبيتقال يمكن الخبر بتاع فوزهم فى الاخبار فى التليفزيون اكنهم اخبار المنوعات)

اما على الصعيد العلمى

وفى ناس تانية فى مصر عندهم علم وعاوزين بستثمروا علمهم ونفسهم ناس تدعمهم ولو حتى بقيمة مكافئات 3 لعيبة كورة


اما بالنسبة لموضوع التكريم من رايى انه كان يجب يتكرموا هنا الاول احنا الاولى

اما بالنسبة لموضوع الرقص انا اتفرجت على الحفلة
وفعلا الموضوع كان مثير للاشمئزاز جدا بالذات من عمرو ذكى والحضرى

خاصة لما اتحزم بالعلم انا من رايى ان المفروض يتجازى عليها ويتعاقب عليها للاسف الموضوع تم تجاهله لان من وجهه نظر البعض ان هو فرحان
هو فرحان لكن فى نفس الوقت بكامل وعيه

لانه مش مبرر ادام كل الناس ان هو فرحان يقوم متحزم بالعلم

العلم ليه احترامه وهيبته
عيب اوى اللى هو عمله

وعمرو ذكى كمان عيب برضه رقصه ده
وكمان هم رايحين للتكريم هناك يمثلوا اسم مصر يعنى لازم كانوا يحترموا الاسم ده للاخر
هو اما عصام الحضرى ولا عمرو ذكى لما اتكرموا
يتقال حراس مرمى المنتخب المصرى او لاعب المنتخب المصرى
كمان فى وسائل اعلام بتنقل الحدث ده

والاخطر من كده ان فى كتير من الاطفال والشباب الزوغير معتبرينهم قدوة عيب يشوفوهم وهم كده


مش هم بس 3 اللى فرحانين باقى اللعيبة فرحانة بس محدش عمل كده

الحقيقة احتفالية دبى معجبتنيش سواء من 3 لعيبة او من تنظيم الحفل

هى دبى كرمتنا تشكر دى عملت حاجة تشكر عليها مفيش كلام

بس مكنش فى نظام وتحس ان الحفلة ملغبطة بس كون ان دبى كرمتهم ده يخلينا نغفل عن التنظيم

لكن التحزيم بالعلم مفيش اى مبرر مهما كان ملهوش مبرر يخلينا نغفل عنه