النت قطع يا رداله

[Muhamed]

طبعا الكل لاحظ امبارح الاربعاء فى فتره الصبح ان مكنش فى نت فى نسبه كبيره لمشتركى الانترنت فى مصر او فى دول الخليج او حتى اوربا (على حسب تصريح وزير الاتصالاات) وحتى لما النت رجع كلنا لاحظنا السرعه الضعيفه للغايه اللى جه بيها من غير تفسير


اليكم اخوانى فى تيفا التفسير اللى خرج لتلك الظاهره التى لم يتم الاعلان عن مده اصلاحها سؤاء بالساعات او الايام او الشهور حتى

بقى شركات النت فى مصر ودول الخليج بتاخد النت عن طريق كابلات بحريه جايه من اروبا (الياف ضوئيه او fiber obtic ) اللى حصل بقه ان 2 من الكابالات دى انقطعوا نتايجه العواصف اللى بتحصل فى اروبا ومحدش يسال ايه علاقه العواصف بكابل تحت البحر مش عايزين اسئله ظريفه انا بقلكم التصاريح الرسميه اللى طلعت


قوم ايه بقه الكابالات دى انقطعت فى بدايه يوم 30/1/2008 يعنى ممكن تقولوا فجر يوم الاربع او قبله بشويه الناتج ان النت قطع بشكل كامل رغم وجود كابلات اخرى لم تنقطع ولكن لاعاده توزيع الاحمال قرروا قطع الخدمات

المهم بعد اعاده توزيع الاحمال على الكابلات المتبقيه طبيعى جدا ان السرعه قلت بشكل ملاحظ للجميع وان وصل للبعض انه مش عارف يعمل دون لوود

المهم وزارات الاتصالات فى الدول العربيه (الخليج وشمال افريقيا) صرحوا ان الموضوع بيحاولوا يصلحوه سريعا وانه عن قريب هنسمع ان الكبلين اتصلحوا وبقوا فى افضل حال :bm:

المهم اخر خبر بقه كان امبارح بالليل فى برنامج البيت بيتك

لما محمود سعد اتصل بالوزير طارق كامل وكان واضح من كلامه ان الموضوع هيطول شويتين يا حلوين :nono:


المهم اهم كلام اتقال فى المحادثثه كان موجه للشباب وكان مجمل الكلام ان الناس اللى بتستخدم النت فى الدون لوود للاغانى والافلام الخ من الحاجات الهجص دى يبطلوا اليومين دول لان العمليه مش ناقصه وفى ناس تانيه اولى زى الناس اللى بتعمل رسالات على النت او المستشفيات والمراكز المتقدمه لاننا عارفين ان النت اصبح عصب الاماكن الحديثه

وبصراحه هنا الراجل عنده حق

فيا ريت يا اخوانا فى تيفا (وياريت كل واحد ينشر الفكره دى) انه بلاش تنزيل للحاجات الهايفه اليومين دول لغايه ما الخدمه ترجع زى زمان ونسيب السرعه للناس اللى محتاجاها فى الحاجات المهمه

الى هنا انتهت المتابعه الاخباريه


كان معكم


ماندوز ابوالعافيه


قطاع الاخبار التيفاويه

[WebCraker]

أيوة تقريبا نفس الأخبار اللى وصلتنى , , ,

بس عندى هنا النت ما فصلش خالص رغم انه فاصل زى شغال يعنى بس الحمد لله فيه نت وخلاص بنفتح مسنجرات وكله السطه

الظاهر سمة قرش عضت الكابل :yawn:

وانا معاك يا بشمهندس .. ياريت ياجماعة محدش يعمل داونلود الايام دى لأن فعلا فيه ناس محتاجة النت لحاجات مهمه زى واحد هنا لا داعى لذكر اسمه بيعمل منتدى على النت مش عارف يعمله ههههههههه:010:

وأى حد هيعمل داونلود اليومين دول هيتفصل وانا بقولكم اهوه :bm:

[lewo nardo rewo]

فعلا

و انا عمال اقول النت بطئ كدة لية

[لوزة]

الله معكم ياشباب
انا عن نفسى مش هعمل اى داونلوود اليومين دول
بس ابقو افتكروا الجمايل دى
ماشى ياعم المش مهندس ؟؟!!

[mrmr]

انا برضة بقول النت بطئ لية وانا الى كنت ناوية اتخانق مع صاحب الوصلة بس الحمد لله ربنا رحمة هههههههههه بس الحمد لله المهم انة مش فاصل
وانا بضم صوتى لصوتكم ياجماعة ياريت بقا ترحموا النت شوية وبلاش تحميلات هايفة اليومين دول خلوا النت للناس المهمة زى علشان اعرف احمل الكام فيلم الى بحملهم بقا واخلص

[ايناس]

ميرسي يامندوز علي معلوماتك مع اني كنت عارفاها بس مش فاهمه ازاي حصل كدا تحت البحر وانت مش قولت بردو

بس كويس لاني لسه بمتحن يعني كدا كدا مش عارفه استعمله دلوقتي

[lewo nardo rewo]

محدش يقدر يعيش بلا انترنت

[hagar]

شكرا يا مندوز على المعلومات
وعلى فكرة احنا عندنا فى البيت عملين حظر تجول ان اى حد يحمل حاجة

[Muhamed]

الى اخر الانباء اللى حصلت امبارح


طبعا الخبر اللى الناس فرحت بيه هوا خبر الشهر المجانى اللى الوزير طارق كامل قاله

وكنت هعمل موضوع مخصوص بيه :18:


بس بعدها بدات اشوف رد الفعل على النت


ولقيت كلام الناس عكس شعورى تجاه القرار

دلوقتى انت قاطع من اسبوع

وهيستغرق هصلاحه برض جوالى 10 ايام بالنظام المصرى يعنى 20 يوم


يعنى ببساطه الشهر هوا الشهر :bm:


يعنى على رائ البعض

الحدايه مش هترمى كتاكيت :walkman:


المهم


خبر اخر انتشر امس

وهوا انقطاع كبل بحرى اخر اللى بيروح للهند

والهند قالت ان القطع حصل فى منطقتين الخليج والبحر المتوسط على حدود مصر



طبعا ربنا يستر وميكنش فى شركات من مصر واخده من الوصله دى


شركه تى اى داتا اللى انا مشترك فيها قالت على الموقع بتاعها ان الشركه بتاخد من 3 كبلات 2 منهم ضربوا


الا صحيح محدش فيكم عايز يعرف اخر سبب طلع على القطع

اتفضلوا

و بيقولوا أل ايه سفينه معديه ادام الاسكندريه بعمق 10ك رمت الهلب بتاعها راح قاطع الكابلين


دا من المحور امبارح :18:


حد يناويلنى البحار اللى رمى الهلب علشان نحطه مكان الكابلات ونرمى هلبات مصر كلها فوق دماغه :walkman:

السؤال اللى بيطرح نفسه حاليا


حاله من الشلل فى الحياه الشبابيه

وتلاقى ناس مخنوقه بشده علشان موضوع النت

ففى سؤال بيزن فى دماغى


هل النت اصبح بهذا الاهميه لنا معشر الشباب ؟؟؟؟ وماذا كنا نفعل من عشر سنوات فقط لما كان النت غير منتشر للدرجه الا باشتراكات ومكنش كتير مشترك

[عبدالرحمن م]

قتلتوا النت يا مجرمين

[mrmr]

معلشى ياعبد الرحمن المجرمين الى قتلوا النت هياخدوا عقابهم
ففى سؤال بيزن فى دماغى



هل النت اصبح بهذا الاهميه لنا معشر الشباب ؟؟؟؟ وماذا كنا نفعل من عشر سنوات فقط لما كان النت غير منتشر للدرجه الا باشتراكات ومكنش كتير مشترك


انا لقيت قصة عجبتنى قوى عن موضوع النت قولت احطها هنا بدل ماعمل لها موضوع جديد
توابع انقطاع النت, شباب مصر المسكين
خدت نفس عميق جدا جدا ... لدرجة إني حسيت إن خلصت الأوكسجين من البلد (قال يعني البلد لسه فيها حاجة مخلصتش) ... ورجعت أركز عشان أقفل الشغل اللي في إيدي ...
خلصت بدري في اليوم ده ... وقفلت الجهاز وأنا بمني نفسي بسهرة لذيذة تشيل عني قرف الشغل ....

نازل من على السلم بهدوء وسلاسة وفرح وعبير وهبة وعبلة و ....

" يوسف ... يا يووووووووسف "

اتنفضت وأنا نازل وخدت خمس سلالم مرة واحدة على ركبي المبجلة
" ايه يا عم إسلام ... مش توطي حسك شوية"
لقيت إسلام بيقرب مني بسرعة وكأنه هيقولي على سر القنبلة الهيدروجينية وهوه بيوشوشني بصوت مبحوح ... مقدرتش أميز منه غير :
" فصل ... راح .. النت ... وقف"
حاولت أهديه وأعمل نفسي حنين ... رحت خابط على ضهره خبطة مرزبة توقع برج القاهرة ... وقولتله بكل حنية :
"انت ياله ... اتعدل كده وخد نفسك زي البني آدمين ... واكلم عدل عشان مش ناقصاك "

لكن باين إن الخبطة الخفيفة بتاعتي جابتله إنزلاق غضروفي حاد وهبوط في الدورة الدموية ... فجحظت عيناه ووقع على الأرض وهوه بيردد :
" النت فصل ... النت قطع ... احنا خلاص فينيتو "

طبعا آخر فيوز في دماغي كان فص ... رحت سايبه ومكمل السلالم بكل هدوء وسلاسة وفرح بس من غير عبير ...
نزلت تحت وركبت المواصلات وحطيت دماغي على دراع الراجل اللي جنبي, راح باصص بكل قرف وعادلي دماغي بكف محترم ... طبعا زي ما قلت دماغي مش ناقصة قرف, رحت مريح على الكرسي ومديها سيمفونية التشخير المشهورة ...

قلقت في السكة علي كلام من عينة :

"الظاهر الكلام ده حقيقي ... أنا معنديش نت"
"بيقولوا النت قاطع في مصر كلها "
" أنا سمعت إن في كابل عمومي اتقطع عند البحر"

بدأت أقلُّق ... يكونش الواد المنيل إسلام كلامه صح ؟؟؟

" أنا بقى عرفت إن في طبق طاير على شكل قصافة نزل البحر وقطع السلك"

آآآآآآآآآآآه ... كده بقى دول شوية عيال مهيسة ضاربين بانجو ....
رجعت أنام تاني , وللأسف الشديد ريحت على دراع اللي جنبي و ... طااااااااخ .... اتعدلت الناحية التانية

-----------------------------------------------------

وصلت البيت وأنا وشي وقفايا حمر من كتر التحويل .... ودخلت الشقة من غير ما أعبر حد وطيران على أوضتي
قفلت الباب وفتحت الشنطة أتأكد إن العدة معايا .... كيس دوريتوز الأزرق عائلي, لتر بيبسي , بنص جنيه حلاوة , لبانتين سمارة ...
طبطبت على الكيس بحنان أبوي يمتزج به شعور شيطاني بالنشوة والأنتصار والفرح والهناء وبالمرة العبير ... وقعدت الجلسة المقدسة قصاد الجهاز ....

شغلت الجهاز وحمل بكا سرعة ... فركت إيدي كمن ينوي فتح خزائن علي بابا أو فتحي بابا مش هتفرق ...
بصيت في الشاشة ... ولقيت أيقونة الفاير فوكس بتلمع قصادي بثعلبها البرتقاني الرائع ... رحت ناحيتها بالماويس وضغطت كلكتين واستنيت ....
قغدت أستمتع برؤية الموقع وهوه بيتحمل واللودينج بيعد تحت و .......

ERROR LANDER

ايه ده ؟؟؟؟؟؟؟؟؟؟؟ دعكت عينيا وبعدين النضارة وقريت تاني .... أول مرة أشوف العبارة دي ....
مممممم -عملت عبقري يعني- .... يمكن عشان عامل موقع جوجل default وهوه حاول يفتحه لقاه واقع ؟؟؟

قلت أجرب موقع الياهو .... قعد يحمل ويلود و ...... ERROR LANDER

إيه ده ؟؟؟ ... طيب موقع Youtube, altavista deviantart ..... كله نفس الحكاية ...

رجعت بضهري لورا وأنا حاسس بصدمة محسيتهاش من ساعة ما جبت مادة تحليل نظم دور تاني ....

ترررررن

ايه اللي حصل ؟؟؟
تررررررررررن

أنا أكيد بحلم ...
ترررررررررررررررررررن

مفيش نت ؟؟؟؟؟؟
تررررررررررررررررررررررررررررررررن

فوقت على صوت التليفون ... رفعت الموبايل و رددت وأنا مسبهل ...

"ألو" (وأنا تايه)

ألو ... ازيك يا يوسف" (صوت تايه غير بتاعي)

"مين ... مين معايا" (لسه تايه برضه)

" أيه يابني ... أنا إسماعيل" (تايه هوه كمان)

"في إيه يا إسماعيل؟؟"

(صوت ريق بيبلع بصعوبة وكأنه بيبلع جزمة ريدوينج) " انت... انت شفت الليحصل ... حصل لخط ... النت"

"حصل إيه"

"النت فاصل في مصر كلها عشان الكابلات اتقطعت "

صرخت بصوت سمعه سكن غابات الأمازون:
" فاااااااااااااااااااااااااصل ... ليييييييييه ؟؟؟ ... وازاي اساسا الكابلات اتقطعت؟؟؟ .... اوعى تقولي فضائيين ومركبات فضاء"

سمعت صوته بالعافية وهوه بينهار
"انت عبيط ياله ... ده واحد في إيطاليا شد السلك من عنده عشان كان محشور ... قام اتقطع عندنا ..."

عيطت وأنا بقول بعيون بتنقط داتا :
"طيب والحل إيه دلوقتي ؟؟؟؟ "

فجأة صوته بقى جد وواخد نبرة صارمة وهوه بيقول :
"مافيش غير حل واحد"

"انت بتفكر في اللي أنا بفكر فيه ؟؟؟ "

"أكيد ... مفيش خيار تاني":bm:

--------------------------------------------------

العناوين الرئيسية في جرايد اليوم اللي بعديه :

"انتحار جماعي لعدد كبير من الشباب بسبب انقطاع خدمة الانترنت"
" نقص في عدد شباب مصر بنسبة 80% على خلفية عمليات انتحار النت"
"الانترنت يقتل شباب مصر":shades:


عنوان آخر تحت هذه العناوين :
"عودة خطوط الانترنت إلى مصر بعد التخلص من القصافة"

[Muhamed]

mrmr


هههههههههههههه


جامده جداااااااااااااااااااا


محطتيهاش موضوع ليه كنا سبتناه اساسا:bm:

[عبدالرحمن م]

موضوع جامد يا مرمر بجد

كان المفروض تعمليه موضوع منفصل كان هيبقى احسن

بس مش مهم

هو كده كويس

عبدالرحمن...

[Muhamed]

اخر الاخبار عن يوم 4/2/08

كفاءة شبكة الإنترنت تصل إلي 80% .. اليوم
تصل كفاءة شبكة الانترنت في مصر الي 80% اعتبارا من اليوم وتعود الي وضعها الطبيعي بعد 10 أيام.
اعلن د.طارق كامل وزير الاتصالات وتكنولوجيا المعلومات انه تم اضافة سعات كبيرة لشبكة الانترنت المصرية للتعويض عن انقطاع كابلين بالبحر المتوسط.. تلقي وزير الاتصالات تقريرا من المهندس محمد منصور يؤكد أن السفن بريئة من قطع الكابلين.

[totaaaa]

شكرا ليك يا مندوززز علي متابعه الأخبار الأنترنت في مصر
بس فعلا الأنترنت بقي ذو أهميه لدي اي انسان مش الشباب فقط

طبعا في ناس بتعتبر الأنترنت وسيله لترفيه عن النفس
ولكن هناك بعض اخر يعتبر الأنترنت وسيله لتثقيف

وانا واحده من الناس مش بعتبر الأنترنت وسيله لترفيه
انا بستفيد منه كتير معلومات اخيار دون لود لبعض كتب المشهير وطبعا أبحاث الكليه ربنا يسمحهم

ولو كنت مشتركه في منتديات مش عشان اللقب ولا عشان يكون عدد المشاركات كتير
بس عشان المنتدي عالم مفتوح لتبادل المعلومات والأخبار
وأهو عشان يبقي الأ عنده معلومه مش يبخل علي اللي معندوش
وعشان كمان حاجات كتير اي واحد هيبقي داخل علي المنتدي للأهميه هيعرف الأستفاده اللي هتخرج من المنتديات

وشكرا مره أخري يا مندوز للمتابعه الأخبار
معاك توتااااااا دكتور نفسويه
من أمام الكمبيوتر
ردا علي مسأله الأنترنت

[Lost Angel]

ياااااااااااااااااه والله تيفا وحشني
الواحد مشافهوش من يوم الاربع واخيرا النت رجع تاني
بعد فترة انقطاع طويلة هييييييييييه اخيرااااااااا
انا الموضوع ده بحاول افتحه من يوم الاربع بس مكنش ليا نصيب يحمل بقي شوفت العنوان بس
ههههههههههههههه يا دوب كفاية عليا
والنهاردة بفضل الله تمكنت اخيرا اني اقراه

وايه كمان المفاجأة توتااااااا كمان رجعت الله اكبر منورة يا توتاااااااا

[emo_000]

ميرسي على الخبر وانا شفت البيت بيتك وطبعا الكل بيعمل دون لود بس المشكله ان فى ناس بتخسر ملايين بسبب انقطاع النت
وياريت نراعى ده ونقلل من دخولنا النت شويه