خطاب الريس .... ( هتقبل هحبك ..... هترفض هلبك )

[onlyme__onlyu]

السلام عليكم ورحمة الله وبركاته

على فكرة إوعى حد يفهمنى غلط أنا حزب ( وطنى ) ومعايا الكارنيه وبحب الحكومة طبعا فاهمنى يعنى معايا حصانه يعنى بصوا لازم تقبلوا وإلا ولا بلاش أنا مالى هسيبكوا تعرفوا ...................
هتقبل هاحبك ....... هترفض هلبـّك



الرئيس يخاطب شعبه الحبيب :


ياشعبي حبيبي ياروحي يابيبي ياحاطك في جيبي ياإبن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله دا حال

أحبك محشش مفرفش مطنش ودايخ مدروخ وآخر انسطال

أحبـك مكبـر دماغـك مخـدر ممشـّي أمورك كـده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبــالع لســانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي مُحبط وشايف محال

واحبك تســـافر وتبعد تهاجــر وتبعت فلوسك دولار أو ريال

واحبك تطبـّل تهـلل تهبـّـل عشان ماتش كورة وفيلم ومقال

واحبـك تأيــّد تعضّـد تمجّــد توافق تنافق وتلحس نعال

تحضّر نشـادر تجـمّع كوادر تلمـّع تقمـّع تظبـّط مجـال

لكن لـو تفكـّر تخـطط تقـرر تشغللـّي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجــال

ساعتها هاجيبك .. لايمكن أسيبك وراح تبقى عبرة وتصبح مثال

هابهدل جنابك واذل اللي جابك وهيكون عذابك دا فوق الاحتمال

وامرمط سعادتك واهزأ سيادتك واخللي كرامتك في حالة هزال

وتلبس قضية وتصبح رزية وباقي حياتك تعيش في انعزال

هتقبل هاحبك .. هترفض هلبـّك هتطلع هتنزل هاجيبلك جمااااال





طبعا كـــل شيئن إنكشفن وبان
إظهــــر وبــــان عليك الأمــان
شـــوية مستكة وشوية حبهان
وكل واحــد هيكون فى المكــان
وخاف على نفسك من التوهان
لا يبقى مكــانك هــو اللومـــان


حد يقدر يقول حاجة طيب
حد معترض هاه يعنى مسمعتش حد بيقول حاجة
هه......هه ........هو مين ده إللى يقدر يقول
خليك كده واد كول
ومفرفش على طول

مصر هى أمى....نيلها هو دمى..... شمسها فى سمارى.... شكلها فى ملامحى.... حتى لونى قمحى.... وسمعنى أجدع سلام لمصر والمصريين


مصراوى .... مصراوى على طووووووووووووووول

Only

[moussa]

احم احم
نعم فى حاجه
شكلى كده دخلت فى شارع غلط
انا تهت ولا ايه
ولا اقولك تسلم ايدك على الموضوع يا only وشكلك كده هتكون onlyهناك
بعيد عنى وعنك

[hagar]

هههههههههههههههه
شكرا يا only على المقال العسل دة
وعلى فكرة هى دى الحقيقة الى عايشها الشعب
:shutup::shutup::shutup:لانه مجبر يقول ويكون
لا ارى
لا اسمع
لا اتكلم

[adam_shokry]

الله الله الله على الكلام وانا من هنا بوجه الرساله دى للرئيس العزيز والاخ الغالى واقوله هشتكنا وبشتكنا ياريس

[فجر الاسلام]

انا معرفش هنا اسمه اونلى ولا حد اسمه ولا حد اسمه moussa (الرابط لايظهر فى الأرشيف) ولا هاجر ولا ادم

ولاحتى منتدى اسمه تيفا

[onlyme__onlyu]

أولا سلامى لكل التيفــــاويه حبايبى وإخواتى وعلى فكرة ياجماعة والله هى دى الحقيقة المرة للأسف إللى إحنا عايشينها وهنفضل عايشينها لو ما قدرناش نسعى إننا نغيرها وأنا والله ما سياسى ولا حاجة ولا بحب السياسة بس بحب إن الإنسان يكون عنده كرامة ويكون حر يقدر يعنبر ويقول رأيه فى أى حاجة بتحصل من غير ما يكون فيه حاجة تقيده وتفرض عليه إنه يكون من غير صلاحيات وتكون وظيفته فى الحياة إنه يربى العيال بس وده طبعا غير الأساسيات ( أكل وشرب ونوم و ........ الخ ) بس للأسف المصريين بيرضوا بالأمر الواقع لأنهم للأسف أصبحوا مسلوبى الإراده يعنى عناصر غير فعاله عايزين يعيشوا اليوم بيومه ( إحيينى النهارده وموتنى بكره )
آسف على الإطاله .....وياريت نحاول نقول الصواب مرة واحدة حتى لو كان ده على حساب نفسنا أو حتى لو فيه قطع رقبه زى ما بيقولوا
ويارب الحال ده يتغير ونكون فى ضع أحسن من كده ونحاول نحافظ على كرامتنا فى بلدنا بس الأول قبل ما ندور على كرامتنا فى الخارج لأن للأسف ياجماعة المصرى كرامته فى الخارج معدومة والله وحرام يفضل حقنا مهضوم لحد دلوقتى .....
وفقنا الله لما يحب ويرضى

[عبدالرحمن م]

ده موضوع يودّى فى داهية

أنا مش هاجى هنا تانى

عبدالرحمن...