هم ليه بيعملوا كده !!.....

[la princesse]

انا كنت هحط الموضوع فى الرياضى بس فضلت العام لانى هناقش سلوك واخلاق مش حدث رياضى
اثناء تصفحى لبعض المواقع الاخبارية شدنى موضوع عادى جدا لا يمت بصلة الى الرياضة
فوجدت بين التعليقات هذا التعليق من شاب مصرى!!



الإسم : ............
الدولة / المدينة : القاهرة
عنوان التعليق : مليون مبروك من زملكاوي الى نادي النجم الساحلي التعليق : الف مبروك لنادي النجم الساحلي على فوزه على فريق ونادي الفساد والحرامية في مصر النادي الاهلي

والله جمهور الزمالك وجمهور الاسماعيلي والمصري كله فرحان لفوز نادي النجم الساحلي




ده غير التصرف اللى كلنا شفناه فى ماتش تانى قبل ماتش الاهلى والنجم الساحلى
فى لقطة ظهر جمهور الزمالك رافع علم تونس!!!!!!

طبعا انا مش ضد ان المصريين كلهم يشجعوا تونس بس يشجعوا تونس حبا فى تونس
مش كره وحقد وغل لنادى مصرى
تصرفات وسلوكيات غلط وعيب اوى تحصل بين مصريين عايشين على ارض وحدة ومصيرهم واحد
والمفروض انهم اخوات
والفاظ الشخص وسلوكه فى التعامل مع الناس بتدل على الطريقة اللى اتربى بيها واتعود يعامل الناس بيها
ولو كانت الكورة هى اللى هتفرق بين الناس وتعمل فتن وشتيمة وقلة ادب فى رموز كبيرة يبقى بلاش كورة خالص

[فجر الاسلام]

دى ناس عقلها صغير و جاهلة
انا نفسى اعرف الاهلاوى ولا الزملكاوى ولا الاسماعيلى ولا غيره دول مش مصريين
وفى النهاية دى لعبة لازم واحد يطلع كسبان والتانى يخسر

ده بعد شوية هيطالبوا يكتبوا فىالبطاقة مصرى اهلاوى ومصرى زملكاوى

عيب علينا والله

[Muhamed]

تصرف طبيعى


مع دخول الانترنت والروابط الخاصه بالانديه الى اللعبه بمميزاتها الكتيره

ظهرت عيوبها التى ظهرت من قبل فى دول الشمال الافريقى المتقدمين عننا بخطوات فى هذا المجال

كلنا شفنا جمهور الترجى بيشجع الاهلى السنه اللى فاتت

وقلنا توانسه مش وطنين وعدينا الموضوع

واكيد شفنا اعلام الصفاقص

بل المدرج الكامل من استاد الاسماعيليه اللى شجع الصفاقص فى احدى مباريات الاسماعبلى

عادى

مهو مدام فينا تعصب اعمى يبقى خلاص

لما مواقع الانديه تزرع التعصب يبقى منتظرين ايه من الجمهور

محدش يقدر يقول ان الجمهور كله عاقل

او الجمهور كله متعصب

فى وفى

فى كده وفى كده فى كل الفرق الرياضيه

المفروض ان اللى يمسك اداره المواقع دى يكون من النوعيه العاقله

لكن للاسف فى بعض المواقع (اخص موقعين واحد للزمالك والتانى للاسماعيلى) مشهورين بالتعصب الاعمى بل يفوق العمى بانه يزيف الحقائق حتى يصل الى غرضه

قد لا يكون التزييف بقصد

ولكن نهايته واحده

كل هدفه زرع الكراهيه تجاه النادى الاخر

بس كل الكلام ده وقف بعد مقاله من راجل تونسى فى موقع يالاكوره احترمته جدا

ببساطه الراجل قال نحن كتوانسه لم نرحب بتشجيع الزمالكاويه والاسماعلاويه لفريقنا

فعندما يتقابل الكبار يكون لقاء بينهم فقط(قصده الاهلى والنجم) وعلى الصغار(قصده الزمالك والاسماعيلى فى مصر والترجى والصفاقص فى تونس) ان يبتعدوا ولا يتدخلوا


يعنى انا شايفه انه كان قلم جامد للمواقع المتعصبه دى


المهم

موال التعصب الاعمى لم يولد بعد متش الاهلى والنجم وانما من زمااااااااااااااااان قوى

يمكن مع ظهور المواقع دى للنور


وعلى فكره المواقع دى بتعيش على زرع التعصب


يعنى بعد القلم بتاع الراجل التونسى

دلوقتى عاملين هولوكست على لاعيب الزمالك اللى تحت 18 سنه اللى اتعور وبيتهموا كالعاه جمهور الاهلى واتحاد الكوره والخ

زى كل مره يعنى


طبعا مش لاقى رد

يعنى جمهور الاهلى عارف حد اساسا من ناشئ الزمالك

لا وايه ضربوه فى متش الاهلى والزمالك ببتاع 20 سنه

ال يعنى جمهور الاهلى عارف ان الولد ده خطير ولازم نكسره

ونتصل بالمافيا ونحضر لعمليه ارهاببيه(مش من بتوع فجر) علشان نعور اللاعيب الجبار ده يوم المتش

ونزود بقه فانتزايا الفيلم بمطالبه تدخل حسن صقر لعقاب الاهلى وجماهيره علشان نجم النجموم اتعور

بجد


حاجه تخنق

[انسان]

من حق اى انسان ان ينتمى للنادى الذى يريد حتى وان كان من خارج مصر
وان يشجعه حتى وان كان يلعب ضد فرق من مصر
ده حق كل واحد فينا وما حدش يقدر يمنعنا عنه فى عصر الفضائيات والعالم المفتوح
شجع المصريون النجم الساحلى فى القاهره
وخرجت المظاهرات احتفالا بفوزه فى الاسماعيليه
وفى بعض المدن المصريه ايضا
وهذا حق كل شخص ان يحدد انتمائاته
ولكن لى تساؤل قبل خروجى
هل يعلم المصريون انه قد تم حرق العلم المصرى فى قلب سوسه؟
وسب الشعب والدوله بمعنى انه اتمسح بكرامتنا الارض
والى مايعرفش اهو عرف