ضيفنا الثالث ๑۩۞۩๑ WebCraker ๑۩۞۩๑

[3aShe2]

السلام عليكم ورحمة الله وبركاته
ضيفنا اليو لا يحتاج لمقدمة اكتبها بحقه
فقد كتب عن نفسه سلفا
وترك لدينا جميعا اكثر من انطباع .. اكثر من بسمة .. اكثير من وقفة اعتزاز
بيوم ما كنت احاول ان اكتب له تهنئة .. فقلت من ا لصعب جدا ان اصفه بالكلمات
وانا استضيف اخي الغالي جدا بحثت عن الكلمات طويلا علها تسعفني فاعذرني اخ الغالي لو قصرت

الرابط لايظهر فى الأرشيف
لمن اهدانا كثيرا وكان حضوره مدهشا مرحا يفوح باصالة بلاده
ويفيض من خيرات النيل الكريم ساقول وانتم معي طبعا .. اهلا اهلا اهلا بـــــــــــــ

الرابط لايظهر فى الأرشيف
WebCraker
الرابط لايظهر فى الأرشيف
قلمٌ نَقَشَ علَى مَدَارِ عَطَائِهِ إِبْدَاعاً شَرْقِياً
بِـ وَزْن حُـرُوفٍ قَافِيَـةٍ
بِـ طَلَةِ شَمْعَـةٍ نُورَانِيَةٍ عَلَى رُوحِ إِيِمَانِيـَةٍ



..سعداء جدا لاننا ندرك مقدما ماذا سنسمع .. ونحن سنستقبل فيض حضورك الجميل جدا .. تواجدك بطيبته واصالته وروحه المرحة .. سنقول هنيئا لنا وللمنتدى بشخص له روعة صفاتك ..وهنيئا لي انا اخا مثلك ..


المقابلة ستسمر 7 ايام بدءا من هذا اليوم لكل واحد الحق بان يسال ضيفنا الغالي 5 اسئلة ,, من الممكن ان يحوي السؤال 3 نقاط
,, وارجو عدم التكرار ..

عاشق الجنة
8/11/2007

[3aShe2]

الاسئلة الاعتياية

الاسم - الاقامه - الهوايات - مهنتك او دراستك -تاريخ الميلاد

[Muhamed]

طبعا من غير مقدمات لان شخصيه محمد مشفتش زيها


المهم ننط الى اسئلتى الرخمه


1-موقف غير فى مسار محمد. ايه هوا الموقف ده وامتى حصل


2-حلم تمنيت تحققه ومحصلش


3-حلم تتمنى تحقيقه




كفايه كده دلوقتى بس اكيد طبعا هخش اسال تانى

هوا كده بلطجه :bm:

[FREEDOM]

طبعا شخصية محمد غنية عن التعريف

فندخل على الاسئله على طول


1_ إيه أكتر موقف محرج حدث ليك في الجامعه

2_قول اكثر 3 اشياء بتدايقك في حياتك

3_كام مره حسيت انك ملكش لزمه فى الحياه

انتظر عودتـ.....

[قمر الليالى]

اهلا بيك يا محمد معانا

طبعا انت هتنور الكرسى هذا الاسبوع

انا بقة اسئلتى:


عاوزة اعرف اكتر حاجة اسعدتك فى حياتك
اكتر حاجة احزنتك فى حياتك
ويا ترى انت بتحب ولا ........؟مش هطول عليك كفاية كدة

علشان انت الى قولت انك عاوز كدة

[WebCraker]

اولا وقبل الاجابة على السؤالات اللى طبعا هتبقى عاملة زى التحقيق

انا بشكر الاستاذ عاشق الجنة على الكلام الجميل اللى انت كاتبه بصراحة حاجه يعنى تحرج والواحد مش عارف يقول ايه !!


الاسم - الاقامه - الهوايات - مهنتك او دراستك -تاريخ الميلاد
الاسم : محمد إبراهيم
الإقامة : مصر - محافظة الدقهلية - مركز دكرنس - قرية كفر عبد المؤمن
الهوايات : أحيانا اما اكون فاضى بلعب ميدل اونلاين وهذا لا يبعدنى ابدا عن مراعاة الله فى كل شىء وعدم نسيان الصلاة فى اوقاتها ...
مهنتك : مازلت طالب فى كلية التجارة جامعة المنصورة آخر سنه ان شاء الله
تاريخ الميلاد : أكتوبر 1985



نروح لحبيبى Mandozzz

1-موقف غير فى مسار محمد. ايه هوا الموقف ده وامتى حصل

2-حلم تمنيت تحققه ومحصلش

3-حلم تتمنى تحقيقه
موقف غير مسارى : بصراحة هوا غيرها جامد :wacko: , , , نتيجتى فى مادة الكيمياء فى الثانوية 29.5 من 50 . . . اجاركم الله طبعا من علمى إلى ادبى طوالى وبعدين نتيجة احلى فى مادة التاريخ تقريبا زيها كدا فهيا بنا إلى كلية تجارة

حلم تمنيت تحققه ومحصلش : انى ادخل كلية هندسة او حاسبات ومعلومات

حلم تتمنى تحقيقه : الآن وفى هذه الظروف اتمنى انى احصل على الشهادات التالية بعد تخرجى
ZCE = Zend Certified Engineer
OCP = Oracle Certified Pro
وياسلام بقى لو MCSE و البتاعة بتاعة كلية تجارة دى اللى اسمها ايه الزمالة الامريكية CMA تقريبا

بعد كدا دموع الخشية واه منك انت

1_ إيه أكتر موقف محرج حدث ليك في الجامعه

2_قول اكثر 3 اشياء بتدايقك في حياتك

3_كام مره حسيت انك ملكش لزمه فى الحياه

1_ اكتر موقف محرج , , , ههههه ربنا ما يوريكش انا اساسا مش بروح الكلية غير قليل اوى بس اكتر موقف دمى اتحرق فيه اما اتأخرت 10 دقايق عن اول مادة فى الامتحانات السنه اللى فاتت وطبعا ما كنتش جبت رقم الجلوس المهم بقى الموقف ده حكيته انا قبل كدا فمش عاوز ارغى فيه تانىالمهم الكلية واسعة والابنية بينها وبين بعض مسافات اروح لواحد يبعتنى مبنى تانى واروح للدكتور يبعتنى للعميد يقولى لو قالك خش هدخلك :)
وفى الحوار ده كان فات نص ساعة على ما وصلت للعميد ربنا يكرمه يارب كدا ويترقى يبقى حاجه كبيرة كدا المهم السكرتيش بتاعه مخلنيش ادخل وقالى فيه اتنين عاملين حادث مخلهومش يدخلوا ................... كل ده عشان 10 دقايق نصيحة يابنى انت وياه كل واحد يقدم ساعته 10 دقايق

2_ اكتر 3 اشياء بتضايقنى فى حياتى : انا مش متذكر حاجه اللوقت بصراحة بس هفكرر ..... مممممممممم مش فاكر حاجه خالص بس هقولك على 3 حاجات بس هما مش اكتر حاجه
أ - اما اكون مفكر شخص معين صديقى . . . ويقوم بفعل شىء يثبتلى انه غير مهتم بالصداقة هذه وانه تهون عليه العشرة
ب - كل ما أفكر فى المستقبل
جـ - واكتر حاجه زعلتنى فاكرها اللوقت اما عدت سنتين فى كلية تجارة

3_ كم مرة حسيت انى ماليش لزمة دى , , , , مفتكرهاش خالص بصراحة . . .انا مؤمن ان كل شخص له دور فى الحياة وان ربنا عز وجل خلقه لحكمه الله اعلم بها وان مهما تثاقلت عليك هموم الدنيا تدعوه ينشرح صدرك بأمره

[فجر الاسلام]

السلام عليكم ورحمة الله وبركاته

قبل الاسئلة وقبل الكلام

عاوزة اقول ان محمد ابراهيم من الشخصيات المحترمة جدا الحقيقة انا عمرى مكلمته بس من خلال المنتدى ومواضيعه ومناقشاته

جمعت فكرتى عنه ان هو شخصية كتير محترمة ومتدينة وعنده تحمل مسئولية

ندخل بقه على الاسئلة

1- اكتر شخص تتمنى اللى هو يكون جمبك وان تكون جمبه فى الحلو وفى الوحش بس للاسف الظروف بتمنعه وتمنعكانكم تكونوا بجانب بعض؟؟؟؟؟؟؟؟؟؟؟؟؟

2- صفة او ميزة فى شخصيتك كل الناس بتحسدك عليها وصفة او ميزة فى شخصيتك تتمنى انها متكنش فيك؟؟؟؟؟؟؟

3- ايه اكتر حاجة تخلى محمد ابراهيم يفقد السيطرة على اعصابه وتخرجه عن شعوره وتبقى الدنيا حريقة؟؟؟؟؟؟؟؟؟

4- ايه اكتر مكان او بلد نفسك تروحوا ( طبعا غير الاسكندرية حلم كل انسان ) لتريح فيه اعصابك ؟؟؟؟؟؟؟؟

[WebCraker]

نيجى لـ قمر الليالى العسولة والاسئلة المحرجة بقى :nono:


عاوزة اعرف اكتر حاجة اسعدتك فى حياتك
اكتر حاجة احزنتك فى حياتك
ويا ترى انت بتحب ولا ........؟

1- اكتر حاجه اسعدتنى :- اما نجحت السنه اللى فاتت لأنى ما كنتش متوقع بصراحة بس الحمد لله هذا من فضل ربى
2- اكتر حاجة احزنتنى:- اما جدتى توفت . . . ربنا يرحمها ويحسن إليها ,,
3- وياترى انت بتحب ولا .......؟ :- طبعا بعد حبى لله ولوالدتى ... لا يوجد



فجر الاسلام والكلام الكبير اوى اللى قالته
شكرا يا فجر ربنا يكرمك يارب ويوفقك ان شاء الله


1- اكتر شخص تتمنى اللى هو يكون جمبك وان تكون جمبه فى الحلو وفى الوحش بس للاسف الظروف بتمنعه وتمنعكانكم تكونوا بجانب بعض ؟؟؟

2- صفة او ميزة فى شخصيتك كل الناس بتحسدك عليها وصفة او ميزة فى شخصيتك تتمنى انها متكنش فيك؟؟؟؟؟؟؟

3- ايه اكتر حاجة تخلى محمد ابراهيم يفقد السيطرة على اعصابه وتخرجه عن شعوره وتبقى الدنيا حريقة؟؟؟؟؟؟؟؟؟

4- ايه اكتر مكان او بلد نفسك تروحوا ( طبعا غير الاسكندرية حلم كل انسان ) لتريح فيه اعصابك ؟؟؟؟؟؟؟؟

1- أمتنع عن الإجابة :icon26:
2- ميزة الناس بتحسدنى عليها :- والله ما عارف بس ممكن لو سألت احد اصدقائى يقولى .. فيه فى المنتدى كتير ممكن اى حد يقول ,,
صفة او ميز اتمنى متكنش فيا :- مش فاكر برضوا حاجه معينة
3- اكتر حاجة تخلى محمد ابراهيم يفقد السيطرة على اعصابه :- أما اكون محتاج الكمبيوتر وحد من أخواتى لازق عليه وانا هموت لو ما اعدتش اللوقت حالا ... :bomb:
4- أكتر مكان نفسى اروحه :- اسافر بره اروح اى دولة اوروبية واروح دبى ,, بس مكان اريح فيه اعصابى دى فهو دائما حجرتى فى المنزل او احد اصدقائى فالصديق وقت الضيق

[L'Siver]

1\أكتر حاجه بتعصبك؟

2\بتحب ايه؟

3\نفسك في ايه دلوقتي؟

[Muhamed]

عدنا بعد الفاصل


نواصل التحقيق


1-شخصيه افتقدتها فى حياتك ( يعنى واحد صاحبك مثلا وابعد عنك وانته مفتقده).:no3:

2-اكبر صدمه فى حياتك كانت امتى وفين وايه اللى حصل فيها:bm:(ومتقلش ثانويه عامله ولا امتحان الكليه غيره)


3- عضو فى المنتدى بتفتقد وجوده معانا هنا :walkman:

[WebCraker]

1\أكتر حاجه بتعصبك؟
2\بتحب ايه؟
3\نفسك في ايه دلوقتي؟


حبيبى والله يا لوسيفر بس الاسئلة دى تقريبا انا جاوبت عليها


نأتى مرة أخرى للباشمهندس Mandozzz
مش عارف هوا الاحد ممكن يسأل تانى ولا ايه بس ما علينا :shutup:
2\بتحب ايه؟ 3\نفسك في ايه دلوقتي؟
-شخصيه افتقدتها فى حياتك ( يعنى واحد صاحبك مثلا وابعد عنك وانته مفتقده).:no3:

2-اكبر صدمه فى حياتك كانت امتى وفين وايه اللى حصل فيها:bm:(ومتقلش ثانويه عامله ولا امتحان الكليه غيره)
3- عضو فى المنتدى بتفتقد وجوده معانا هنا :walkman:


1- شخصيه افتقدتها فى حياتك :- والله كتير . . . منهم مهند ابن عمى واصدقاء الكلية وكان فيه طالب فى اول سنه اسمه احمد عرفته بس بعدين حول كلية تانيه ومعتش شفته ,,, وصديقى احمد رجب من الجمالية ... وناس كتير بس ده اللى فاكره اللوقت

2- -اكبر صدمه فى حياتك كانت امتى وفين وايه اللى حصل فيها :- انت ماوراكش غير الصدمات ,, مش فاكر والله يا ماندوز

3- عضو فى المنتدى بتفتقد وجوده معانا هنا:- ناس كتير كانوا بيدخلوا ومعادوش بيدخلو او بشوفهم قليل

[lewo nardo rewo]

اشطة يا ويب

سؤالي : مين احب واحد اليك في شبكة تيفا ؟

مين اكثر واحد مش بتحبة في تيفا - محرج -

, و بس ........:wub:

[WebCraker]

ريو

سؤالي : مين احب واحد اليك في شبكة تيفا ؟

مين اكثر واحد مش بتحبة في تيفا - محرج -أحب واحد إليك فى شبكة تيفا :- كل الناس اللى فى المنتدى كويسين والله وكلهم بحبهم زى اخواتى

مين أكتر واحد مش بتحبه فى تيفا :- اجابتى اللى فاتت دى توضح السؤال ده ,, بس ممكن أقول ان فيه ناس أحيانا بتبقى مشتركة لأسباب فى رأسها خارج نطاق المنتدى . . . طبعا بزعل منهم ومش ببقى مبسوط
لكن غير كدا زى ما قلت كلكم اخواتى وبحبكم كلكم

اللى بعده اللى بعده . . .

[فريال1]

انا الحقيقة اول مرة اشارك معاكم في كرسي الاعتراف اسئلتي هي
1- ليه اختر اسم ويب كركر كاسم مستخدم ؟
2- هي الصورة الي محطوطه صورتك ولالا ؟
3-ايه اكتر اكلة بتحبها ؟ امنية نفسك تحققها .
انا سالتك 3 على حسب طلبك وارجو تقبلها وشكرا ليك

[Muhamed]

مقدرتش امسك نفسى

لازم اخش تانى

مش عارف نفسى مفتوحه للرد على الموضوع ليه

مش عارف هوا الاحد ممكن يسأل تانى ولا ايه بس ما علينا :shutup:


ولو فى قاعده بالشكل ده انا هاخد اكسبشن :walkman:



1- ليه اختر اسم ويب كركر كاسم مستخدم ؟


يااااااااااااااااااه فاكر لما سالتك السؤال ده زمااااااان:bm:



2- هي الصورة الي محطوطه صورتك ولالا ؟



ايوه طبعا يا فريال

انتى مش عارفه ان محمد كان البطل فى prison break باجزائه ال 3 كمان:18:



المهم نخشششششششش على اسئلتى

1-يوم تتمنى يتكرر فى حياتك تانى؟

2-يوم تحب كتفتكرهوش ابدا؟

3-يوم عمرك مهتنساه سواء كويس او وحش اقلك قلنا الاتنين يعنى يوم كويس مش هتنساه ويوم وحش مش هتنساه:bm:


كفايه كده

[فريال1]

ايه يا مندوز هو انت الي في الكرسي ولا ويب وبعدين انا سالتو ان كانت صرتو ولو كان صورة حد تاني اورياضي او حاجة مفيهاش حاجة علشان انا ملياش في الرياضة يا عم عمري ما سالت ولما اسل ترد انت مستعجبل على الركسي متخفش هتعد فيه هي كوشه ولا ايه ههههههههههههههههههههههههههه

[lewo nardo rewo]

معلش يا ويب ، سؤالي الثاني كان غلط دة : مين اكثر واحد بتحبة في تيفا

كان قصدي : مين اكثر واحد بتكرهه في تيفا - هوة دة الي محرج -

معلش بقى كنت بكتب بدون تركيز :)

[MohanneD]

محمد ابراهيم: شخصية جميلة وبسيطة أوى إفتقده كتير بعد انتقالى للعمل بالمحروسة وبعد مكنت بشوفه كل دقيقة مرتين تلاته
بقيت بشوفه بالصدفة فى صلاة الجمعة, أو آخر الشهر عشان ياخد فلوس النت مكنش العشى. بيعامل الناس كلها بحسن نية لحد
لما يتلسع يقوم قالب على الوش التانى. غالبا مرح ونادرا كئيب وأحيانا غير مبالى وفى كل الأحيان هو محمد ابراهيم ولازم يرد على كل الأسئلة بتاعتى:

ايه أكتر موقف نسيت فيه نفسك وأنت مروح بيتكم الفجر من المنصورة؟
كام مرة نمت فى عربية وملحقتش المحطة بتاعتك؟
أكتر موقف حسيت فيه بالكوميديا وجتلك هستريا ضحك؟
فيه كام واحد أكسل (أكثر كسلا) منك فى بلدكو؟
ناوى تعمل ايه ان شاء الله لو عديت السنه دى وخلصت؟ ناوى تعدى أصلا؟
بتذاكر كام دقيقة فى التيرم ؟ ايه هى المواد اللى عليك السنه دى؟
انت لسه شفت حاجة اصبر بس
اللى عاوز يلاقيك فى البيت يجيلك الساعة كام؟
لو كنت تتمنى تبقى حد تانى, ياترى هو مين؟
امتى تحس انك محترم أوى وامتى تبقى قليل الأدب ؟
لو مشيت جمب واحد وقلتله سلام عليكم, ومردش عليك تعمل ايه؟
أكتر دعاء بتدعيه من ربنا وأنت بتصلى؟
أكتر أكله بتحب تاكلها هى ايه؟
ايه رأيك فى عصير القصب؟
ليه نفسك تخرج من مصر فى أقرب فرصة زى شباب كتير؟ شايف ان مفيش أمل هنا؟
شايق ان البنات لهم تأثير فى مشكلة البطالة اللى بيعانى منها كتير من الشباب؟
تحب لما ربنا يكرمك وتتأهل ان مراتك تشتغل؟ لو كنت متحبش وهى مصممة تعمل ايه؟
فى نهاية الحلقة, تحب تسمع ايه؟

[3aShe2]

ويلكم يا حبى

بإذن الله تقضى وقت ممتع و جميل و مريح فى المقابلة :)



من هو مثلك الاعلي ؟؟

ما هي امنيتك الشخصية والعامة ؟؟


لنفرض شاركت في برنامج من سيربح البنبون قصدي المليون واكيد كسبت المليون ان شاء الله تحصل
ممكن تحكيلنا كيف ستنفق المليون


هل مارست كرة القدم ام تحب ان تشاهدها فقط؟؟


لو تزوجت ( بعد الشر يعنى )وإكتشفت بعد الزواج ..أن زوجتك نرجسية ..بمعنى أنانية وشديدة الغيرة جداً عليك ..من بنات المسنجر ..وبتقلك : مفيش زي أختك وزي بنت عمك ..( يا أنا يا هن ) ..ماذا تفعل : إختر ممايلي :-
أ/ تقلها : سمعاً وطاعة ..وتحذف كل بنات المسنجر ..
ب/ تحط عليهم بلوك ..وتغتنم الفرصة في غياب زوجتك ..
جـ/ تخليها تتعرف عليهم ..وتعرف كم هن محترمات ..بعدين هي بنفسها حتقلك..كلمهم..



ما يعني لك حب هذه الايام اي يبدأ بكلمة اخت ثاني يوم صديقه وثالث يوم حبيبه ؟؟

إلى أي درجة يلعب النت دوراً في حياة كيمو ..بمعنى ( كم ساعة تقعد على النت في اليوم – هل تستطيع العيش من غير نت كليةً – صف لنا حياتك من غير نت (( ماذا تفعل في وقت الفراغ حينها )) ..) ..؟؟


حكمه تؤمن بها ؟؟

حدد نسبة الصفات دى بالنسبة لشخصيتك ؟

1- العناد.... %
2- الانفعال ....%
3- الحزن ....%
4-الصبر ....%


كفاية كده

بس احب قبل ما اخلص ابشرك ببشرى اعتقد هتعجبك

ان شاء الله العضو الى هيكون موجود فى المقابلة بعد انتهاء مقابلته
هيتفضل يختار لينا الـ 3 اعضاء الى هينزلوا فى الاستفتاء للمقابلةالى بعدها
:bm:
وابقى سلملى على ماندوز
:bm:
سلام

[WebCraker]

نيجى لأحد مهندسين المنتدى اللى انضموا للحزب جديد . . . الله اعلم بقى وما يبقوش زى ناس تانيه
بيسألوا كتير :bm:
- ليه اختر اسم ويب كركر كاسم مستخدم ؟
2- هي الصورة الي محطوطه صورتك ولالا ؟
3-ايه اكتر اكلة بتحبها ؟ امنية نفسك تحققها .

1- اولا اسم ويب كراكر المفروض يكون كدا Web Cracker بس انا نقصت حرف عشان اما اشترك بيه ما يكونش واحد تانى مشترك بيه . . .
وكمان انه اسم برنامج فمحبتش يكون نفس الاسم يعنى

اولا بداياتى فى النت كانت فى الهاكينج فاخترت الاسم ده بس بعدين اتجهت للتصميم والاستضافة وبعدين اصبح استضافة بس ودعاية الآن ,, وبكدا الاسم فضل معايا ومش هينفع اغيره لأنه اصبح أنا :as:
2- لأ دى مش صورتى هههههه دى صورة البطل فى مسلسل بريزون بريك Prison Break زى ما ماندوز قال ولأنى متابع وبحب المسلسل حطيت صورة (الرابط لايظهر فى الأرشيف) مايكل سكوفيلد Michael Scofield (الرابط لايظهر فى الأرشيف)
3- اكتر اكلة بحبها :- فراخ فى الفرن , , , الامنية كتبتها قبل كدا






نيجى بقى للناس اللى واحشنا اوى ,,, ما شفتوش فى الموضوع غير بتاع 6 ولا سبع مرات بس
ما تغيبش كتير كدا علينا ياعم اصلك بتوحشنا اوى ودى اخر مرة تسأل فيها بعد كدا تخش تعلق بس دا ما فاتش غير يومين ياحاج . . .


1- يوم تتمنى يتكرر فى حياتك تانى؟
2- يوم تحب كتفتكرهوش ابدا؟
3- يوم عمرك مهتنساه سواء كويس او وحش اقلك قلنا الاتنين يعنى يوم كويس مش هتنساه ويوم وحش مش هتنساه




1- اليوم ده :- هوا ماكانش يوم واحد كان تقريبا 3 ايام , , , كنا انا واصحابى مهند وعلاء ومحمد عزت ووسيم ... بنصيف فى مصيف جمصة الدولى :wacko:
المهم مش هحكى اللى حصل بس الواد وسيم كان احرجنا فى موقف وحش اوى الواحد كان عاوز يطخه بالنار وبعدين يختفى من الموقف ده :) ... وطبعا مش هحكى الموقف عشان محدش يسأل
لكن الباقى كله كان ميه ميه

2- يوم ما احبش افتكره تانى :- مش فاكر بصراحة . . .
3- ومش فاكر دى كمان ينفع اوى يوم الامتحان اللى مدخلتوش , , , اعد اسألنى نفس السؤال وكل مرة هقولك امتحان المالية العامة :bm:





اهوه هوا ده مهند صحبى وحبيبى وكفاءة , , ,
اولا شكرا على الكلام اللى بيسقط زبادى جهينه اللى انت كتبته


ايه أكتر موقف نسيت فيه نفسك وأنت مروح بيتكم الفجر من المنصورة؟
ههههه . . . أصل كنا انا وهوا مرة جايين من المنصورة كنا بنام فى العربية ومحدش فينا صحى ونزلنا بعد بلدنا تقريبا ببلدين :nono:

كام مرة نمت فى عربية وملحقتش المحطة بتاعتك؟
لأ ما حصلتش معايا تقريبا اكيد حصلت معاك انت . . . انا عارف

أكتر موقف حسيت فيه بالكوميديا وجتلك هستريا ضحك؟
مش فاكر موقف بصراحة

فيه كام واحد أكسل (أكثركسلا) منك فى بلدكو؟
افتكر اتنين اكسل منى حاليا . . . واحد اسمه هشام وهوا هنا فى المنتدى اسمه The Boss وواحد
تانى اكسل واكسل وهوا مهند ابن عمى :) بصراحة حاجه تخلى العيل الصغير ينطق

ناوى تعمل ايه ان شاء الله لو عديت السنه دى وخلصت؟ ناوى تعدى أصلا؟
مش عارف والله ربنا يسهل . . . الواحد يخلص ورق الجيش الاول وبعيدن يشوف هيعمل ايه
وان شاء الله ربنا يسهل وننجح السنه دى

بتذاكر كام دقيقة فى التيرم ؟ ايه هى المواد اللى عليك السنه دى؟
إشطه اوى ساعه ونص دا مُـنجاز كبير

انت لسه شفت حاجة اصبر بس

اللى عاوز يلاقيك فى البيت يجيلك الساعة كام؟
فى اى وقت بصراحة بعد الساعة 4 العصر ... وممكن ايام ييجى قبل كدا

لو كنت تتمنى تبقى حد تانى, ياترى هو مين؟
اتمنى ابقى حد تانى إزاى . . . غريب اوى السؤال ده , , , بس انا مش متخيل نفسى حد تانى بصراحة

امتى تحس انك محترم أوى وامتى تبقى قليل الأدب ؟
محترم اوى اما اشعر باحترام اللى ادامى ليا . . . وقليل الادب دى نادرا يعنى حتى لو اللى ادامى ده قليل الادب , , , بس احيانا بفقد اعصابى والوش الحديد بيظهر اما استفز بس طبعا انا لا أبالى عشان كدا مش بستفز بسهولة . . . غير كدا على النت مع اصحابى عادى يعنى لأنى بزهق من الكتابة

لو مشيت جمب واحد وقلتله سلام عليكم, ومردش عليك تعمل ايه؟
بخلى اللى ماشى جمبى يرد عليا هههههههه
بقوله انت ما بتردش ليه مش بقولك سلامو عليكو . . . وطبعا انا مش بقوله عشان هوا ماشى معايا اصلا حاجه بديهيه يعنى

أكتر دعاء بتدعيه من ربنا وأنت بتصلى؟
رب اغفر لى ولوالداى ولأمة المسلمين جميعا . . رب ادخلنى الجنة . . رب وفقنى لما تحبه وترضاه . . رب اهدنى ووفقنى وعافنى وانصرنى . . اللهم انى أسألك العفو والعافية فى دينى ودنياى وآخرتى ومالى ,,


أكتر أكله بتحب تاكلها هى ايه؟
قلتها قبل كدا وهى الفراخ فى الفرن ولو مش فى الفرن هتتاكل برضوا

ايه رأيك فى عصير القصب؟
مش بحبه بالدرجة اللى هيا بصراحة وانت عارف كدا إلا لو يوم حرر بقى والواحد عطشان بس يكون عليه ليمون

ليه نفسك تخرج من مصر فى أقرب فرصة زى شباب كتير؟ شايف ان مفيش أمل هنا؟
بصراحة انا متفائل اوى وانت اكتر واحد بتلاحظ كدا ومن كتر تفاؤلى كان الواحد بيتصدم كتير
لكن ده مش معناه ان مفيش امل هنا . . . والله بره أنا شايف انه فيه اكتر على الاقل السفر فيه 6 فوائد

شايف ان البنات لهم تأثير فى مشكلة البطالة اللى بيعانى منها كتير من الشباب؟
مش عارف بصراحة . . . بس ممكن لأن المرأة الآن اصبح ليها دور كبير غير ذى قبل واصبحت فى كل المجالات وبالتالى فرص تواجد الرجال قلت او اصبحت مناصفة او اكثر من النصف لأن لو تاخد بالك اللى بيطلب موظفين بيكتب فى الاعلان ,, حسنة المظهر :010: . . . وانا لست ضد دخول المرأة إلى عالم الاعمال نهائيا


تحب لما ربنا يكرمك وتتأهل ان مراتك تشتغل؟ لو كنت متحبش وهى مصممة تعمل ايه؟
لأ طبعا . . . يس أكيد قبل الجواز هعرف حاجة زى دى . . . وهنكون متفقين عليها

فى نهاية الحلقة, تحب تسمع ايه؟
ياريت اغنية سمعنى بودعك للفنان الكبير شون كونرى :bm:





نذهب إلى أخى وحبيبى عاشق الجنة

من هو مثلك الاعلي ؟؟
كل من يفوقنى خبرة اراه مثلا اعلى لى . . .
ما هي امنيتك الشخصية والعامة ؟؟
الامنية الخاصة مكتوبة قبل كدا . . .
الامنية العامة :- هى ان ينتصر المسلمون فى شتى بقاع الآرض وتكون الامة الاسلامية امة واحدة متحدة . . . وبتنشر السلام والإسلام وان مصر تكون افضل وافضل وافضل

لنفرض شاركت في برنامج من سيربح البنبون قصدي المليون واكيد كسبت المليون ان شاء الله تحصل ممكن تحكيلنا كيف ستنفق المليون
والله هاخد كورسات مكثفة ودورات كتيرة انا كنت محتاجها وممكن ادخل كلية هندسة خاصة (ميكاترونيات) عشان ابقى مهندس ميكاترونيك :009:وبعدين ان شاء الله لو ربنا وفقنى وقدرت اعمل اللى قلته ده هفتح شركة كبيرةهتكون شركة هندسية و شركة خدمات عامة للويب واشترى مبدأيا 10 سيرفرات معايا مليون بونبونايه بقى اصدى جنيه

هل مارست كرة القدم ام تحب ان تشاهدها فقط؟؟
كنت بلعب طبعا بس من فترة طويلة معتش بلعب . . . ولا أطن انى هلعب تانى لأن معتش فيه وقت بصراحة وغير كدا اللوقت لو جيت العب كورة هاخد وقت على ما اتعود تانى :wacko:

لو تزوجت ( بعد الشر يعنى ) وإكتشفت بعد الزواج ..أن زوجتك نرجسية ..بمعنى أنانية وشديدة الغيرة جداً عليك ..من بنات المسنجر ..وبتقلك : مفيش زي أختك وزي بنت عمك ..( يا أنا يا هن ) ..ماذا تفعل : إختر ممايلي :- أ/ تقلها : سمعاً وطاعة ..وتحذف كل بنات المسنجر .. ب/ تحط عليهم بلوك ..وتغتنم الفرصة في غياب زوجتك .. جـ/ تخليها تتعرف عليهم ..وتعرف كم هن محترمات ..بعدين هي بنفسها حتقلك..كلمهم..بصراحة انا مش عندى بنات على الميل اساسا غير قليل ... وكلهم زى اخواتى ,, زى هنا فى المنتدىبس لو احتكم الامر هخليها تعد بجوارى وانا بتكلم مع أى واحدة وتشوف انا بكتب ايه :icon26:

ما يعني لك حب هذه الايام اي يبدأ بكلمة اخت ثاني يوم صديقه وثالث يوم حبيبه ؟؟
منتشر جدا جدا جدا . . . لكن يتوقف معى عند كلمة أخت فقط

إلى أي درجة يلعب النت دوراً في حياة كيمو ..بمعنى ( كم ساعة تقعد على النت في اليوم – هل تستطيع العيش من غير نت كليةً – صف لنا حياتك من غير نت (( ماذا تفعل في وقت الفراغ حينها )) ..) ..؟؟

دور كبير جدا . . . لا أظن انى استطيع ان استغنى عن الانترنت فترة طويلة
من غير الانترنت اهو الواحد بيذاكر


حكمه تؤمن بها ؟؟

حدد نسبة الصفات دى بالنسبة لشخصيتك ؟

1- العناد.... 5%
2- الانفعال ....10%
3- الحزن ....55%
4-الصبر ....30%

ممكن كدا بالتقريب


بس احب قبل ما اخلص ابشرك ببشرى اعتقد هتعجبك ان شاء الله العضو الى هيكون موجود فى المقابلة بعد انتهاء مقابلته هيتفضل يختار لينا الـ 3 اعضاء الى هينزلوا فى الاستفتاء للمقابلةالى بعدها :bm: وابقى سلملى على ماندوز
ههههههههه والله احسن اختراع البتاعة اللى انت قلتها دى ما ينفعش تختار واحد 3 مرات :bm: ؟ ؟ ؟

[WebCraker]

أكتر موقف حسيت فيه بالكوميديا وجتلك هستريا ضحك؟
اه استنى افتكرت موقف . . . كنا جايين انا وانت برضوا من المنصورة بس انت كنت مسخسخ اوى وكنت عاوز تنام وانا برضوا نفس الحكاية بس انا مسكت نفسى شوية انما انت ايه بقى عينك ما تشوف إلا النور كان جمبك راجل تخين قمت مدد عليه ونايم كأنه مخده وانا ابص للراجل واضحك وهوا يقولى سيبه سيبه خليه ينام ههههههه انا بقى كل ما اتخيل المنظر ده افطس من الضحك

وكمان موقف تانى ,,, اما كان محمد ناصر ابن خالك كنا جايين مرة من الكلية وهوا اعد واللى ادامه اعد وساند اوى على رجله وطبعا الكرسى كان لو سبته هيرجع لورا يوصل للأرض ,,,, ههههه هوا قال مقولة مشهورة اوى لا داعى اقولها يعنى
وكان بيقول برضوا حاجه كمان
كان بيقول كدا فى نص الكلام اننا لو عاوزين ننقل طبق دش كبير من على الارض نطلعه على السطح ننقله إزاى ؟
قلتله إزاى ؟
قالى : ناخده من على الارض كوبى ,,, بيست على السطح هههه

[Muhamed]

دوراً في حياة كيمو

كيمو مين:bm:



مهندس ميكاترونيك


:18::18::18:



1- العناد.... 5% 30%
2- الانفعال ....10% 10%
3- الحزن ....55% 40%
4-الصبر ....30% 20%
:bm:





نكمل الاسئله :walkman:


1-موقف فقدت فيه اعصابك بعدين لمت نفسك ؟


2-ماندوز(القاهره)وبالمره تشوف الفرعون الصغير - عاشق الجنه(منصوره جنبك يعنى) - الطيب احسن (اسكندريه وابو العباس)

ال 3 دعوك على كوبايه شاى عندهم فى بيوتهم تختار مين تروحله :bm:


3-سؤال شخصى بقه فى الاخر

تصرف حصل منى زعلت منى او مكنتش متوقعها منى:054:

[وحبي لك لن يموت]

السلام عليكم
معلش يا ويب انا جيت متأخرة
بس هما أسئلة بسيطة

اولاً : كم وزنك قبل رمضان وبعده ؟؟؟؟
ثانياً : مين أعز شخص ليك في المنتدى ؟؟
ثالثاً : انت باين عليك واد شقي صح ولا نو ؟؟؟
رابعاً : كم مرة عاكستلك واحدة في الجامعة وخدت منها محاضرات محترمة ؟؟
خامساً : تهدي لمين :
ورده :
بصلة :
طماطم ضاربة :
بوسة :
شلوط :
بوكس :
بطاطساية :
باقة شوك :
خامساً :إيه رأيك فياو لو شفتني هاتعمل فيا إيه ؟
Looooool

معلش انا ملحقتش أقرأ كل الردووووود
أتمنى ميكونش فيه حاجة مكررة
أختك : شهد

[la princesse]

اولا ربنا يعلم انا مبسوطة ازاى انى لحقت شفت الموضوع ده قبل ما الاسبوع يخلص
ثانيا بقى اسئلتى
1- مين مثلك الاعلى على 3 مستويات الشخصى والعملى والتاريخى(يعنى شخصية تاريخية كان نفسك تبقى مكانها)؟
2-ايه تقييمك الشخصى لتيفا نت بشكل عام
3-يا ترى شخصية محمد ابراهيم اللى فى الواقع هى اللى على النت؟؟ ولو فى اختلاف قوله
4- مين العضو اللى:
نفسك تشطب عضويته
نفسك تتعرف عليه عن قرب
نفسك يكون فى منه نسخ كتير
نفسك تضربه
نفسك تشوفه
ساب المنتدى ونفسك انه يرجع

5-يا ترى ايه مشاكلك فى الحياة؟

6- انت اهلاوى ولا زملكاوى؟

[فجر الاسلام]

اقتباس:
1- اكتر شخص تتمنى اللى هو يكون جمبك وان تكون جمبه فى الحلو وفى الوحش بس للاسف الظروف بتمنعه وتمنعكانكم تكونوا بجانب بعض ؟؟؟

2- صفة او ميزة فى شخصيتك كل الناس بتحسدك عليها وصفة او ميزة فى شخصيتك تتمنى انها متكنش فيك؟؟؟؟؟؟؟

3- ايه اكتر حاجة تخلى محمد ابراهيم يفقد السيطرة على اعصابه وتخرجه عن شعوره وتبقى الدنيا حريقة؟؟؟؟؟؟؟؟؟

4- ايه اكتر مكان او بلد نفسك تروحوا ( طبعا غير الاسكندرية حلم كل انسان ) لتريح فيه اعصابك ؟؟؟؟؟؟؟؟
1- أمتنع عن الإجابة :icon26:
2- ميزة الناس بتحسدنى عليها :- والله ما عارف بس ممكن لو سألت احد اصدقائى يقولى .. فيه فى المنتدى كتير ممكن اى حد يقول ,,
صفة او ميز اتمنى متكنش فيا :- مش فاكر برضوا حاجه معينة




ايه ده بقه سؤالين بحالهم من اسألتى متجاوبهمش

يا استاذ عاشق هل من حق الجالس على الكرسى ان يمتنع عن اجابة سؤال
هههههههههههههههههههههههه
ما علينا انت حر

الاسئلة الجديدة

شخصية فى المنتدى تقولها انا مش متصور المنتدى من غيرك ؟؟؟؟؟؟؟؟

ايه تقييمك كمدير ادارة المنتدى للاعضاء التاليين

برنسيس

ايناس

الطيب احسن
انسان

ماندوز

عاشق الجنة

قمر الليالى
دموع الخشية
ma858003

l'siver

فجر الاسلام
tota
totaaa
الفرعون الصغير

وايه تقييمك لنفس ذات الاعضاء على المستوى العادى او الشخصى او الانسانى او الفكرة العامة عن شخصيتهم ( بعيدا عن مجهوداتهم فى المنتدى )

كلمة تقولها لاعضاء ظهروا جداد زى فريال ولفلى جيرل
وغيرهم وتقييمك لهم

ملحوظة انا شلت قرايبك كلهم اللى احتلوا المنتدى من التقييم عشان لو قلت عليهم اى تقييم مش هيعجبهم عارفين طريقك وهيوصلولك وساعتها ربنا يستر عليك

ملحوظة كمان مهمة جدا جدا

فى الاسئلة اللى فاتت ممنوع منعا باتا الاجابات الدبلوماسية
انا مش بحب الاجابات الدبلوماسية جاوب بصراحة


سؤالين ولا تلاتة كتبتهم بس الاجابات انا عارفه هتكون طويلة

عشان تعرف تمتنع عن الاجابة

لو كراسة الاجابات بتاعتك خلصت قولى عشان اجبلك واحدة تانية

[The_boss22]

انا يا جماعه مردتشي أخش في الحوار ده بس علشان خاطر ويب أصل حرام اللي بقعد علي الكرسي ده
والله حرااااااااااااام

فيه كام واحد أكسل (أكثركسلا) منك فى بلدكو؟
افتكر اتنين اكسل منى حاليا . . . واحد اسمه هشام وهوا هنا فى المنتدى اسمه The Boss وواحد
تانى اكسل واكسل وهوا مهند ابن عمى بصراحة حاجه تخلى العيل الصغير ينطق


وربنا أنتوا متعرفوا ويب دا أكسل واحد في الدنيا دا أنا أتعلمت الكسل منه ومش كده وبس أسكتوا بلاش فضايح .......
ماشي يا ويب تعلمني الكسل وتوب أنتا :ongue:
انا مش هسأللك كفايه عليك الناس الجمال بتوع تيفا دول
وأسالتهم وياريت تكمل ردك يا كسووووووووول:bm:

[WebCraker]

1-موقف فقدت فيه اعصابك بعدين لمت نفسك ؟

2-ماندوز(القاهره)وبالمره تشوف الفرعون الصغير - عاشق الجنه(منصوره جنبك يعنى) - الطيب احسن (اسكندريه وابو العباس)
ال 3 دعوك على كوبايه شاى عندهم فى بيوتهم تختار مين تروحله :bm:

3-سؤال شخصى بقه فى الاخر

تصرف حصل منى زعلت منى او مكنتش متوقعها منى

1- مش فاكر اى موقف بصراحة
2- لأ بصراحة ,,, هروح للأقرب عاشق الجنه ... غير كدا انا ما بحبش الشاى
3- انت ما زعلتش منك فى اى حاجه بصراحة إلى الآن



وحبي لك لن يموت
اولاً : كم وزنك قبل رمضان وبعده ؟؟؟؟
ثانياً : مين أعز شخص ليك في المنتدى ؟؟
ثالثاً : انت باين عليك واد شقي صح ولا نو ؟؟؟
رابعاً : كم مرة عاكستلك واحدة في الجامعة وخدت منها محاضرات محترمة ؟؟
خامساً : تهدي لمين :
ورده :
بصلة :
طماطم ضاربة :
بوسة :
شلوط :
بوكس :
بطاطساية :
باقة شوك :
خامساً :إيه رأيك فياو لو شفتني هاتعمل فيا إيه ؟


أولا : انا ما وزنتش نفسى من فترة طويلة بس تقريبا 85:90
ثانيا : كل واحد فى المنتدى عزيز عليا واخص بالذكر . . . ماندوز وأميرة وقمر وشهد وفجر وعاشق ودموع ومحمد على ولوست وبوص .... وكتير طبعا بس كفاية دول ومحدش يزعل ان اسمه مش مكتوب جل من لا يسهو
ثالثا : انت باين عليك واد شقى :- لأ لأ لأ انتى فاهمانى غلط :no3:
هقولك زى ما احمد حلمى بيقول :- اوعى تفهمينى صح
رابعا : انا ما بعاكسشى بنات فى الجامعة خالص . . . عيب ,, :wacko:
خامسا : أهدى
وردة :- لفجر واميرة وقمر وشهد ولوست انجل وفريال ,, عشان هما اللى هيمشى معاهم الورد
لو جيت ادى لواحد تانى من صحابنا وردة وليكن .... (ولا بلاش ذكر اسماء أصل يكلونى) هيقولى لأ عاوز سندوتش :bm:
بصلة :- لقمر
طماطم ضاربة :- لقمر برضوا عشان قسم الطبخ بتاعها
وما تقولش احنا حارمينها من حاجه خالص
بوسة:- بلاش الاحراج ده
شلوط:- برضوا ده احراج
بطاطساية :- ممكن اعطيها لـــ ......... قمر برضوا عشان ميكونش نفسها فى حاجه
باقة شوك :- إلى كل عضو وحش دخل هنا بنية غير صافية
خامساً :إيه رأيك فياو لو شفتني هاتعمل فيا إيه ؟
هطخك بالبندقة لغاية ما تتعورى ودمك يسيح --- ولا أقولك لأ بلاش اصل هتصعبى عليا :009:





la princesse

1- مين مثلك الاعلى على 3 مستويات الشخصى والعملى والتاريخى(يعنى شخصية تاريخية كان نفسك تبقى مكانها)؟
2-ايه تقييمك الشخصى لتيفا نت بشكل عام
3-يا ترى شخصية محمد ابراهيم اللى فى الواقع هى اللى على النت؟؟ ولو فى اختلاف قوله
4- مين العضو اللى:
نفسك تشطب عضويته
نفسك تتعرف عليه عن قرب
نفسك يكون فى منه نسخ كتير
نفسك تضربه
نفسك تشوفه
ساب المنتدى ونفسك انه يرجع 5-يا ترى ايه مشاكلك فى الحياة؟ 6- انت اهلاوى ولا زملكاوى؟
1- شخصية تاريخية كان نفسى اكون مكانها :- بصراحة أى صحابى من الصحابة الكرام على سبيل المثال عمر او عثمان او على رضى الله عنهم جميعا
على المستوى العلمى :- ممكن أحد مؤسسى شركة جوجل لارى بيج او سيرجى برين

2- التقييم العام الآن لشبكة تيفا ... هوا كان أفضل من كدا الاول من حيث عدد الاعضاء والزوار
ولكن من حيث القيمة والثراء فهو الآن افضل واغنى عن ذى قبل بالمواضيع والشروحات
ينقص المنتدى مشرفين او اعضاء فى اقسام كثيرة لإثرائها . . . فالمنتدى اولا واخيرا قائم بجهود الاعضاء والادارة معا
مشرفين كتير معدناش بنشوفهم , ,

3- والله تقريبا نفس الشخصية ..

4- العضو اللى نفسى :-

اشطب عضويته :- انا ما بيبقاش نفسى فى حاجه من دى بصراحة :)
تتعرف عليه من أقرب :- كل طاقم الإدارة
نفسك يكون فيه منه نسخ كتير :- ايوه انتى جيتى على الوجيعه بقى بصراحة هكتبلك الاعضاء اللى نفسى يكون فيه منهم كتير
(Mandozzz - فجر الاسلام - عاشق الجنة - MR.S - الفرعون الصغير - دموع الخشية - la princesse - قمر الليالى - وحبي لك لن يموت )

5- أيه مشاكلى فى الحياة :- عذرا . . . امتنع عن الإجابة
6- أهلاوى






فجر الاسلام
ايه ده بقه سؤالين بحالهم من اسألتى متجاوبهمشانا فاكر انى جاوبت على اسألتك كلها وامتنعت عن سؤال واحد ارجعى شوفى الردود تانى

شخصية فى المنتدى تقولها انا مش متصور المنتدى من غيرك ؟؟؟؟؟؟؟؟
أميرة - Mandozzz
ايه تقييمك كمدير ادارة المنتدى للاعضاء التاليين برنسيسشخصية قوية جدا تجبرك على احترامها وايضا معطاءة ايناس
شخص جيد اتى ذكره (بالخير) مرة فى حديثنا عن المنتدى لكنى لا أراها كثيرا فى المنتدى
الطيب احسن
مش بيدخل بقالو فترة الظاهر سافر ابو ظبى المعتقل من الحاجات اللى كتبها فى المنتدى السياسى
انسان
شخصية محترمة جدا زات إحساس مرهف , , , ممكن يكون كاتب او شاعر :cupidarrow:
ماندوز
شعلة المنتدى مهواش محتاج كلام بصراحة كفاية انه بيساعد الكل
عاشق الجنة
مجتهد جدا وبنى أدم كويس فعلا
قمر الليالى
شخص اكن له احترام كبير
دموع الخشية
مشرف وصديق افتقده
ma858003
شخص لمع بمواضيعه الجذابة القوية
l'siver
مشرف منتدى الرياضة وصديقى قبل ذلك افتقده ايضا ومعتش بيدخل غير قليل من اول ما عمل منتدى :039:
فجر الاسلام
روج جميلة جدا , معطاءة tota
معتش بشوفها فى المنتدى مش عارف الظاهر زعلانه مننا :no3:
totaaa
الخبير النفسى لشبكة تيفا هههه
شخص جدير بالاحترام ايضا
الفرعون الصغير
شخص عزيز على تواجده مستمر وعطاءه مستمر

وايه تقييمك لنفس ذات الاعضاء على المستوى العادى او الشخصى او الانسانى او الفكرة العامة عن شخصيتهم ( بعيدا عن مجهوداتهم فى المنتدى ) كلمة تقولها لاعضاء ظهروا جداد زى فريال ولفلى جيرل وغيرهم وتقييمك لهم
ظهور مشرق فجأة ...





وربنا أنتوا متعرفوا ويب دا أكسل واحد في الدنيا دا أنا أتعلمت الكسل منه ومش كده وبس أسكتوا بلاش فضايح .......
ماشي يا ويب تعلمني الكسل وتوب أنتا :ongue:
انا مش هسأللك كفايه عليك الناس الجمال بتوع تيفا دول
وأسالتهم وياريت تكمل ردك يا كسووووووووول:bm:

ياخبر ابيض انا برضوا اللى كسول ياد يا كسول .. يا كسول :054:
بس كويس انك ما سألتش أصلى زهقت ردود النهارده

[وحبي لك لن يموت]

هقولك زى ما احمد حلمى بيقول :- اوعى تفهمينى صح
هههههههههههههه لا متخافش انا مفهمتش صح
رابعا : انا ما بعاكسشى بنات فى الجامعة خالص . . . عيب ,, :wacko: هههههههههههه وبراءة الاطفال في عينيه
وردة :- لفجر واميرة وقمر وشهد ولوست انجل وفريال ,, عشان هما اللى هيمشى معاهم الورد ثانكس يا جدع
لو جيت ادى لواحد تانى من صحابنا وردة وليكن .... (ولا بلاش ذكر اسماء أصل يكلونى) هيقولى لأ عاوز سندوتش :bm: هههههههههههههه طيب عندهم حق السندويتش غلي في المطاعم
شلوط:- برضوا ده احراج ولا إحراج ولا حاجة الشلوط حاجة بسيطة مجرد رفع رجل مش أكتر
بطاطساية :- ممكن اعطيها لـــ ......... قمر برضوا عشان ميكونش نفسها فى حاجه شفتي يا قمر الواد مش حارمك من حاجة أهوه ...
هطخك بالبندقة لغاية ما تتعورى ودمك يسيح --- ولا أقولك لأ بلاش اصل هتصعبى عليا :009:
ههههههههه ياه كل داه وبندقية كمان ؟؟ خلاص انا معايا دبابة كنت شرياها من السوق الحمرا ممكن تستلفها وبعدين ترجعها تاني


أجوبتك كلها جامدة يا واد يا محمد
ربنا يوفقك يارب كدا ونشوفك دكتور قد الدنيا كدا
وانا أديك درجة 8 وتلت / 10 ولو عايز نجمة هاخصم واحد >> اتصرف بقى

لك من حزني الاغاريد ومن قلبي التمني

[WebCraker]

ولا إحراج ولا حاجة الشلوط حاجة بسيطة مجرد رفع رجل مش أكتر

إذا شعرت بركلة من الخلف فأعلم انك فى المقدمة :)

وعلى العموم زى ما قلتى الشلوط دفعة للأمام

زى ما كان واحد صحبى بيقول , , , شلوط سعاتك يا فندم دفعة للأمام :)

[3aShe2]

يا استاذ عاشق هل من حق الجالس على الكرسى ان يمتنع عن اجابة سؤال


yes he can

[MohanneD]

يا استاذ عاشق هل من حق الجالس على الكرسى ان يمتنع عن اجابة سؤال

yes he can
الصحافة فيييييييييييين ..........................

[mrmr]

كان نفسى بصراحة اسألك اى سؤال بس الاسئلة كلها موجودة
على العموم يعنى انا حبيت اشارك وخلاص ولا انا ماليش نفس يعنى.
وربنا يوفقك يارب وتاخد الشهادات الى نفسك فيها دى بس انت اجتهد اصل كان فى غيرك نفسهم فى حاجات من دى زيك كدا بس بعيد عنك احبطوا

[WebCraker]

الصحافة فيييييييييييين ..........................
دونت وورى ... انا كلمت الصحافة وتلاقيهم جايين اللوقت

وربنا يوفقك يارب وتاخد الشهادات الى نفسك فيها دى بس انت اجتهد اصل كان فى غيرك نفسهم فى حاجات من دى زيك كدا بس بعيد عنك احبطوا
هوا انا لسه هأحبط , , ,

[Lost Angel]

طبعا يا جماعة انا مش محتاجة اتكلم عن ويب انتم عارفينو كويس
ومهما قولنا مش هنكفي بالكلام

ربنا يعينك يا ويب دول تقريبا ما صدقو يا عيني انك قعدت ع الكرسي
ههههههههههههههههههههههههههههه

اه استنى افتكرت موقف . . . كنا جايين انا وانت برضوا من المنصورة بس انت كنت مسخسخ اوى وكنت عاوز تنام وانا برضوا نفس الحكاية بس انا مسكت نفسى شوية انما انت ايه بقى عينك ما تشوف إلا النور كان جمبك راجل تخين قمت مدد عليه ونايم كأنه مخده وانا ابص للراجل واضحك وهوا يقولى سيبه سيبه خليه ينام ههههههه انا بقى كل ما اتخيل المنظر ده افطس من الضحك

الموقف ده جاااامد طبعا انت ومهند متتوصوش وياعيني مهند ماصدق وسحب ههههههههههههههههههههههه
نقول ايه بقي النوم سلطاااااااان:bm:

يلا انا مش هطول عليك وبلاش اساله كمان يلا باعم عد الجماااايل :wub:

[فجر الاسلام]

الطيب احسن
مش بيدخل بقالو فترة الظاهر سافر ابو ظبى المعتقل من الحاجات اللى كتبها فى المنتدى السياسى



هههههههههههههه لا فى معتقل الهندسة يا ويب اصل عنده امتحانات الميد تيرم
بس اطمن بوصله اخبار المنتدى دايما
وهو بيسلم عليك وعلى كل اعضاء المنتدى
وبيقولك كان نفسه يشوفك وانت على الكرسى بس ربنا على الظالم والمفترى (كلية الهندسة )
وان شاء الله راجع قريب عشان يكمل نضاله فى المنتدى السياسى


tota
معتش بشوفها فى المنتدى مش عارف الظاهر زعلانه مننا :no3:

لا يا ويب توتا مش زعلانة من المنتدى خالص ده بالعكس المنتدى واحشها جدا جدا
بس مبيكنش عندها وقت تدخل عشان شغلها ربنا يوفقها
ودايما لما بشوفها تقولى اسلم عليكم
بس انا اللى بنسى !!!!!!!!!!!

توتا بتسلم عليكم يا اعضاء منتدى تيفا

[WebCraker]

يلا انا مش هطول عليك وبلاش اساله كمان يلا باعم عد الجماااايل
ربنا يخليكى ليا يا بنت عمى , , , مش عارف من غيرك كنت هعمل ايه

وان شاء الله راجع قريب عشان يكمل نضاله فى المنتدى السياسى
ربنا يرجعه بالسلامة من معتقل هندسة إلى معتقل تيفا السياسى الحربى

توتا بتسلم عليكم يا اعضاء منتدى تيفا
الله يسلمك يا توتا من كل سوء يارب وترجعى لينا برضوا بالسلامة ومتسنيينك

[Muhamed]

ايه هوا دا

انتوا هتقضوها سلام وتحيه


بقلكم ايه

نعود الى الموضوع احسنلكم


1- يوم قعدت فيه على الكمبيوتر بتاعك(اطال الله عمره:walkman:) وحصلت فيه حاجات وانته قاعد قدامه ومكنتش عارف تعمل ايه

يعنى فيه فيرس او حاجه وانته مكنتش عارف تتصرف

احكيلنا القصه:bm:


2- اصعب تحدى واجهه محمد لغايه دلوقتى وهل تغلبت عليه ولا لاه


3- مصريه - شاميه(سوريا او لبنان) - اروبانيه(من دول اروبا يعنى او حتى ابريكا:bm:)


تتكر محمد ابراهيم نسبه انه يتزوج من واحده من الجنسيات دى اد ايه

واساسا انته نفسك تتجوز اى واحده فيهم

وكفايه كده النهارده:shades:

[WebCraker]

1- يوم قعدت فيه على الكمبيوتر بتاعك(اطال الله عمره:walkman:) وحصلت فيه حاجات وانته قاعد قدامه ومكنتش عارف تعمل ايه

يعنى فيه فيرس او حاجه وانته مكنتش عارف تتصرف
احكيلنا القصه:bm:
2- اصعب تحدى واجهه محمد لغايه دلوقتى وهل تغلبت عليه ولا لاه 3- مصريه - شاميه(سوريا او لبنان) - اروبانيه(من دول اروبا يعنى او حتى ابريكا
:bm:)
تتكر محمد ابراهيم نسبه انه يتزوج من واحده من الجنسيات دى اد ايه

واساسا انته نفسك تتجوز اى واحده فيهم
1- والله يا ماندوز حصل حاجات كتير قبل كدا . . . افتكر اخر حاجه مركب هارد واحد صديق والهارد ده بيقرأ التقسيم غلط
يعنى هوا 40 اما تيجى حتى تقسمه من الاول تلاقيه قارىء 20 مثلا
المهم جيت اعمله حاجه اسمها Zero MBR دى زى ما تقول كدا بترجع الهارد زيرو او مش بالظبط كدا دى بتلغى اى بيانات تقسيم عليه

واما تيجى تقسمه تانى تلاقيه قارىء كل حاجه مظبوطه . . . .المهم اللى علمته بقى انى نسيت اشيل هاردى وعملت Zero MBR لهادى انا . . . .
طبعا الهارد فقد تقسيمته ياعينى عليا اول مرة اشوف حاجه زى دى طبعا وزُهلت . . . حياتى على الهارد اللى اتفرط ده
بس الحمد لله رجعت كل حاجه تانى بس طبعا نزلت ويندوز تانى :) والحمد لله على كل حال

وحاجه حلوة اوى اليومين دول بتحصل , , , جهازى كل شوية بيعمل رستارت
المشكلة دى كهربا لأن الكهربا الفترة دى مش مظبوطة فى المنطقة
بس ان شاء الله لو غيرت الباورد سبلاى جبت واحد اقوى او لو جبت ستابلايزر او زى مانتوا بتسموه يا بشمهندس UPS تتظبط وتبقى عال

2- أصعب تحدى واجهنى :- هوا انا عاوز انجح السنه دى ومش عارف اذاكر ولا كلمة . . . وعاوز فى نفس الوقت أبقى مبرمج PHP محترف قبل ما اتخرج
وطبعا لم اتغلب عليه لسه لأن النجاح اولا محتاج اقولك بعد السنه دى ما تخلص والـ php بتاخد اطول من السنه دى لأنها بتاخد سنوات عشان تكون محترف

3- آخر سؤال مش واضح شوية بس هرد على حسب ما فهمت
والله يا ماندوز . . . بالنسبة للمصرية او الشامية او الاوروبية او مهما كانت . . . فده شىء ما اقدرش احدده اللوقت
لكن انا معنديش مانع خالص تكون زوجتى التى سوف احبها يوما من الايام ان تكون مصرية او خليجية او شامية او امريكية او اوروبية
مفيش مانع لو فيه حب متبادل وانها تكون مسملة او انها هتأسلم ده طبعا اهم شىء ويكون فيه بينا اتفاق ووضوح ونكون متفاهمين

وأسألتك دى كويسة , , ,

[la princesse]

وأسألتك دى كويسة , , ,



مش عارفة ليه حاسة ان الكلمة دى مليانة غل:shades:

ما علينا
انا رجعت علشان اكمل فى الاول ده كان تسخين بس
1- بتحب تقرا فى ايه؟
2- بتحب تسمع مين فى القراء وايه اتر صوت محبب ليك بعد القران
3- اتخيل نفسك رئيس جمهورية ليوم واحد هتختار دولة ايه وهتعمل فيها ايه
4- ايه احسن حاجة حققتها فى حياتك وفرحان انك عملتها
5- لو جتلك فرصة تطلع القمر مع 3 اشخاص بس هتختار مين( ودول براحتك من داخل او خارج المنتدى)
wait 4 my back

[WebCraker]

1- بتحب تقرا فى ايه؟
2- بتحب تسمع مين فى القراء وايه اتر صوت محبب ليك بعد القران
3- اتخيل نفسك رئيس جمهورية ليوم واحد هتختار دولة ايه وهتعمل فيها ايه
4- ايه احسن حاجة حققتها فى حياتك وفرحان انك عملتها
5- لو جتلك فرصة تطلع القمر مع 3 اشخاص بس هتختار مين( ودول براحتك من داخل او خارج المنتدى)


1- بحب أقرأ جديد اخبار التكنولوجيا والاخبار العامة والطريفة وأخبار المواقع
2- بحب اسمع مشارى راشد وسعد بن سعيد الغامدى وفارس عباد
3- بصراحة ما أحبش اكون رئيس جمهورية :) بس لو ممكن يعنى ولابد ابقى رئيس أمريكا , , , هضرب اسرائيل بالصواريخ والطيارات لغاية ما اخليش فيها فردة جزمة ولا كوتش سليم ولا حتى كلب ماشى فى الشارع . . . وبعدين اعمل معاهدات سلام وتحالف مع باقى العالم وخصوصا العرب ومصر ونعيش بقى فى سلام وأمان
4- دخولى عالم الانترنت
5- طبعا هلبس بدلة رواد فضاء ولا هطلع كدا بالترنك ؟؟لو هلبس بدلة ممكن اخد معايا ماندوز طبعا بهدوم النوم بتاعته هههههه وآخد كمان قمر وأمير افرجهم على الارض من فوق :)واما اجى انزل اقوم راكب المركبة وسايبهم كلهم وجاى واقولهم يصورونى صورة وانا على الارض من على القمر اما اشوف شكلى هيبقى ايه :) وتبقى دى نهاية الفيلم وهما بقى يفضلوا على القمر ويبنوا بيوت هناك ويعملوا عشش لغاية ما البعثة اللى جاية بعد 100 سنه توصل هناك ويكتشفوا ان الـ 3 دول كان رائد الفضاء محمد ابراهيم نساهم هناك
ويبقى احسن يوم فى حياتى . . .

[la princesse]

واما اجى انزل اقوم راكب المركبة وسايبهم كلهم وجاى واقولهم يصورونى صورة وانا على الارض من على القمر اما اشوف شكلى هيبقى ايه :) وتبقى دى نهاية الفيلم وهما بقى يفضلوا على القمر ويبنوا بيوت هناك ويعملوا عشش لغاية ما البعثة اللى جاية بعد 100 سنه توصل هناك ويكتشفوا ان الـ 3 دول كان رائد الفضاء محمد ابراهيم نساهم هناك
ويبقى احسن يوم فى حياتى . . .




اه يا مفترى
طب انا كنت ممكن اقطعلك فرامل المركبة بس انا مش هعمل كده علشان هنحتاجلها
علشان انا هاخدهم ونستخبى تحت الانتريه اللى جوه المركبة قبل مانت تركب:shutup:
واول متيجى انت راكب نروح زاقينك وتقع ونصورك وانت متشعلق فى الهوا كده:shades:
ولما نرجع الارض نقول دى كانت اخر صورة لرائد الفضاء محمد ابراهيم شهيد العلم:ongue:

[فريال1]

هاي بشكرك اولا على زوقك وتانيا عندي كام سؤال ليك
1- ليه مفيش منتدى اغاني في تيفا؟
2- يترى ليك منتديات تانية ولالا؟
3-ليه اخترت اسم تيفا كاسم للمنتدى ؟
4-انت في شخصية او في حياتك بتحب تكون قائد يعني مدير بمعنى اخر بتحب السلطة وتصدر قوامر وكده يعني ؟
وارجو اني مكنش ثقلت عليك وشكرا

[The_boss22]

طبعا هلبس بدلة رواد فضاء ولا هطلع كدا بالترنك ؟؟لو هلبس بدلة ممكن اخد معايا ماندوز طبعا بهدوم النوم بتاعته هههههه وآخد كمان قمر وأمير افرجهم على الارض من فوق واما اجى انزل اقوم راكب المركبة وسايبهم كلهم وجاى واقولهم يصورونى صورة وانا على الارض من على القمر اما اشوف شكلى هيبقى ايه وتبقى دى نهاية الفيلم وهما بقى يفضلوا على القمر ويبنوا بيوت هناك ويعملوا عشش لغاية ما البعثة اللى جاية بعد 100 سنه توصل هناك ويكتشفوا ان الـ 3 دول كان رائد الفضاء محمد ابراهيم نساهم هناك
ويبقى احسن يوم فى حياتى . . .

طب بلاش ويب والنبي في الحته دي اصله متفرج علي فيلم
The Astronaut Farmer
والفيلم دا البطل بدل ميطلع الصاروخ لفوق طلع بالجمب ومشي علي الطريق ودمر الدنيا
وهوا ويب بحب الفيلم دا أوي :18:

[WebCraker]

وهوا ويب بحب الفيلم دا أويلأ فانى ياللا . . . يخربيت عقلك ضحكتنى وانا الدكتور قايلى اضحك كتير :)


1- ليه مفيش منتدى اغاني في تيفا؟
2- يترى ليك منتديات تانية ولالا؟
3-ليه اخترت اسم تيفا كاسم للمنتدى ؟
4-انت في شخصية او في حياتك بتحب تكون قائد يعني مدير بمعنى اخر بتحب السلطة وتصدر قوامر وكده يعني ؟1- أولا الاغانى . . . معظم الفتاوى بتقول ان الاغانى حرام ,, وانا ما احبش اشتال زنوب حد يحمل اغانى
وزى ما رسولنا الكريم قالنا ,, تجنبوا الشبهات ..
بسم الله الرحمن الرحيم
إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآخِرَةِ وَاللَّهُ يَعْلَمُ وَأَنتُمْ لا تَعْلَمُونَ
صدق الله العظيم

2- معنديش منتديات تانيه بصراحة فريال بس ممكن اقول انى بساعد فى منتديات تانيه
3- الموقع فى الأول كنت عامله لواحد صحبى اسمه مصطفى Tefa عشان كدا اتسمى tefa net
4- والله انا احب أشتغل فى تيم او فى جروب يكون كل واحد له دور ومهام عارفها كويس ويقدر يساعد باقى التيم لو واحد نقص
واعرف اشتغل لوحدى برضوا نو بروبليم يعنى . . . ولو أنا المدير عادى يعنى الرأى الاول والاخير بيكون ليا طبعا بس بعد التشاور وآخذ آراء مختلفة عشان مفهومى يكون اوسع واشمل

وشكرا ليكى على الاسئلة

[lewo nardo rewo]

- ليه مفيش منتدى اغاني في تيفا؟

السبب : مرة استاذ التربية الاسلامية قالنا : القران هو قران الله و الاغاني قران الشيطان

[3aShe2]

وكما بدأناها مع أخونا WebCraker,, ننهينها الآن ونشكره كل الشكر
على سعة صدره ..
على أمل اللقاء به إن شاء الله في مناسبات أخرى .

وإنتظروني لاحقاً إخواني أخواتي بترشيح الثلاثي اللذى سيقوم الاخ ويب بترشيحهم للمقابلة الرابعة إن شاء الله