الحكم بالسجن 6 أشهر للشرطي المصري الذى رفض حراسة السفارة الإسرائيلية

[la princesse]

قضت المحكمة العسكرية الشرطية بمصر أمس بمعاقبة أمين شرطة بالسجن 6 أشهر لرفضه حراسة مقر السفارة الإسرائيلية بالقاهرة، وأدانته المحكمة بتهمة الإضراب عن العمل وممارسة سلوك مضر بالضبط والربط العسكري وعدم إطاعة الأوامر العسكرية؛ وذلك لرفضه تنفيذ الأوامر التى صدرت إليه بحراسة مقر السفارة الإسرائيلية، الكائن بإحدى البنايات على كورنيش النيل بالجيزة، غرب القاهرة.
وكان أمين الشرطة محمد خلف، 23 عاما، وهو من الإسكندرية قد تم تكليفه بحراسة السفارة الاسرائيلية، إلا أنه امتنع عن تنفيذ الأوامر الصادرة إليه من وزارة الداخلية، فقررت الوزارة تحويله إلى المحكمة العسكرية، ورد على القرار ببدء إضراب عن الطعام استمر أسبوعا وتم إسعافه، وأمس أصدرت المحكمة العسكرية الشرطية الحكم المتقدم، وفور صدور الحكم تم ترحيل أمين الشرطة مكبل اليدين وتحت حراسة مشددة إلى محبسه لبدء تنفيذ العقوبة.

يذكر أن أمين الشرطة كان يخدم ضمن شرطة الإسكندرية، حيث مقر إقامته، وتقرر نقلة إلي القاهرة وإلحاقه بالخدمة الأمنية على السفارة الإسرائيلية، إلا أنه رفض وتقدم بعدد من الالتماسات لإعادته إلى خدمته الأولى بالإسكندرية، ليكون قريبا من أسرته، ورفضت الوزارة التماساته. وأكد محاميه رفعت عبد المجيد أن موكله أضرب عن الطعام منذ 16 فبراير(شباط) الحالي مع تناول الماء فقط بسبب رفضه حراسة السفارة الإسرائيلية ولم تستغرق المحاكمة سوى جلسة واحدة حجزت بعدها الدعوى للحكم في جلسة (أمس).

[ايناس]

بصراحة انا مش مصدقة اللي بيحصل دا

ربنا معاه ويقويه بجد هي دي الرجاله

شكرا برنسيسه علي الموضوع

[عاشق بلده]

يسلموووووو

[tota]

:bomb: :bomb: :bomb:

:017: :017:

مش عارفة أقول أية جوايا صرخة عالية على اللى بيحصل

حسبى الله نعم الوكيل

:no3:

شكراً يا la princesse

[أحمد سلطان]

لاتتعجب....أنت فى بلد الديمقراطيه

[Muhamed]

اولا ليا تعقيب

السفارة الإسرائيلية، الكائن بإحدى البنايات على كورنيش النيل بالجيزة، غرب القاهرة.



دى مش السفاره الكلام ده كان من كام سنه لغايه محصلت الانتفاضه التانيه والجامعه اتقلبت فاصبح المكان المزكور قنصليه وليست السفاره (شاهد عيان :18: )


ولكن لى رايئ اعلم انكم ستختلفون معى فيه ولكنها وجهه نظر مطروحه لن اقول انى مقتنع بها ولكنى فكرت بها واعلم الرد عليها ولكنى سانتظر لارى ردكم على تلك وجهه النظر اولا


وجهه النظر دى بتقول


لو كنا فى عهد الرسول عليه افضل الصلاه واتم التسليم وجاءه سفير من الرووم لينقل له شئ او يكون همزه وصل بين المسلمين والرووم هل كان الرسول سيقتله ام انه هيحسن ضيافته

طيب نفكر من جانب اخر

فى ناس عايزه تفرقع السفاره الاسرائيله


وهناك اكثر من ناس وكل له اسبابه


فهل من الاوقع ان نضع حراسه عليها ام لا


بمعنى لدينا فى اسرائيل سفاره ايضا وهناك فى اسرائيل متطرفين ويمكن ان يفعلوا معنا كما يود الجميع ان يفعل بالسفاره بتاعتهم


طب نقول تانى

لو حصل والسفاره اتسابت من غير حراسه

وحد جه وفرقعها


مش هتلاقوا بعدها بيومين الاعلام فى العالم بيند بمحرقه الهلوكست التانيه اللى حصلت فى مصر

ومصر هتبقى فى موقف وحش


طيب الكل عارف ان الشعب المصرى من اكبر راس لاصغر راس مش طليقه اسرائيل وبما فيهم العساكر الغلابه اللى واقفيت صبح وليل تحت العماره


والنظام العسكرى بيقول مهو لو عدينا الموضوع ببساطه ممكن نلاقى بكره الكل عايز كده لانه ببساطه الكل عايز كده فعلا من جواه ولكن علشان مصلحه الدوله بينفزوها غصب عنهم (نشرب الدواء وهوا مر ولكنه مطلوب)


فعايز اشوف رايكم فى كلامى والرد بتاعكم عليه

[heroshima]

لا حول ولا قوة إلا بالله

مصر بقت دلوقتي زي ........ لإسرائيل .. احنا إلللي كنا بنرعبها دلوقتي خلاص بقت بتقتل وتخطف في جنودنا على الحدود كفاية ان احنا بنمد إسرائيل بالغاز الطبيعي ببلاش

حسبي الله ونعم الوكيل

[tota]

بجد أقنعتنى بكلامك يامندوزززززز

وفعلاً عندك حق فى كلامك

وصح وعندك حق فى كلامك ولازم نحكم عقولنا وبطريقة دينية ونقتضى بما كان يفعله الرسول صلى الله عليه وسلم

[Muhamed]

بجد أقنعتنى بكلامك يامندوزززززز

وفعلاً عندك حق فى كلامك

وصح وعندك حق فى كلامك ولازم نحكم عقولنا وبطريقة دينية ونقتضى بما كان يفعله الرسول صلى الله عليه وسلم


شكرا توتا على المتابعه والرد ومستنى اراء باقى الاعضاء فيما زكرته فوجه النظر اللى طرحتها انا حطتها للنقاش ورايكم يهمنى

[الطيب احسن]

بصراحه رغم تعاطفى اللى كان مع الضابط الا انى عايز اضيف توضيح
انه صدر بيان من وزاره الداخليه با الشاب عمل كده لمصالحه الشخصيه
وانه رسم فيها دور البطل
المهم انا مقتنع جدا بكلام ماندوزز

[la princesse]

ماشى يا ماندوززز كلامك كله تمام وانا مقتنعة بيه
بس هل احنا بس اللى مطلوب مننا نلتزم بالقوانين دى
وهل لو دولتنا التزمت بيها هيبقى من باب الالتزام واحترام القوانين
او الاقتداء بالنبى عليه الصلاة والسلام زى ما انت قلت
؟؟؟؟؟؟؟
الاجابة طبعا لا
احنا عملنا كده خوف بس مش التزام واحترام واقتداء
ولو عاقبوا الراجل على مشاعره ناحية دولة معادية وبتكرهنا
بحجة انه مهمل وغير مطيع للاوامر
يعنى سابوا كل حالات الاهمال والفساد والظلم ومسكوا فى امين الشرطة الغلبان
اللى حتى لو كانت طريقته غلط بس نيته صح ومشكلته انه مش فاهم ومحتاج حد يفهمه
حبسوه 6 شهور علشان مش عايز يحرس السفارة الاسرائيلية
كانوا حبسوا بداله ممدوح اسماعيل على سبيل المثال
مش ده احق واهماله اكبر واخطر ده اذا مكنش اللى حصل للعبارة بفعل فاعل يعنى
بس هم زى ما بيحللوا ويحرموا براحتهم بيعاقبوا ويعفوا براحتهم

قال النبى محمد صلى الله عليه وسلم

"إنما أهلك الذين من قبلكم أنهم إذا سرق فيهم الشريف تركوه وإذا سرق فيهم الضعيف أقاموا عليه الحد.
وأيم الله لو أن فاطمة بنت محمد سرقت لقطعت يدها."

صدق النبى الكريم صلى الله عليه وسلم

فمال بال الأمة بنخبها المفكرة وشعوبها المظلومة لا تقطع أيدى المستبدين؟!

[mohamed ali]

انا رايي والله ان الراجل اللي عملو دا اصح عمل
وهو دا فعلا اللي مفروض يتعمل ومش شرط علشان مثلا يطبقو سياسة الدولة يطبقوها علي حساب المصريين مافي جنود اسرائيين وجيش كامل ممكن يخدو منو بس 10 افراد جنود اسرائليين يحرسو قول ياعم 50 انما ازاي تجيب واحد مصري عربي مسلم ( ها مسلم ) ويحرس سفارة اسرائيلية

قال رسول الله صلي الله علية وسلم

عينان لا تمسهم النار عين بكت من خشية الله وعين باتت تحرس في سبيل الله
صدق رسول الله صلي الله عليةوسلم

بزمتكم لوكان بيحرس السفارة يبقي في سبيل الله كدا ...... اكيدة لا طبعا

[تائب الي الله]

سلام عليكم

كلامك علي دماغي ياماندو

بس انا بقول دا بعيد خالص عن اللي انت بتقولو عن الافتراض بتاع السفير لان الموضوع دا مش زي سفير وجاي يوصل رسالة زي محضرتك بتقول وبعدين حتي لو كان رسول كان الرسول بيتكلم عن الدين ودعوة للاسلام فان قبلو امنو وان لم يقبلو عليهم جزية مش سياسة دولة وسفارة فدا بعيد اولا ما علينا من دا
الاهم بقي لو اسرائيلي رفض يحرس السفارة المصرية في اسرائيل هل هيتعمل فية نفس اللي تعمل في الراجل المصري الغلبان دا ... اعتقد لا لالالالالالالالالالالالالالالا
وبالنسبة للاخ اللي بيقول ان الشهامة اخدتة وعمل فيها راجل لا اقول لحضرتك لو انا منة والله هعمل كدا و هرفض لان عمري مقبل اني اكون بحمي سفارة اسرائيلية كافرة
وعينان لا تمسهم النار عين بكت من خشية الله وعين باتت تحرس في سبيل الله
ولو انا حرست السفارةدي هبقي بحرس الكفار يبقي في سبيل الله ولا اية رايك .. ما علينا من دي
انت مثلا مقتنع ان مصر عملت في الراجل دا علشان منفزش الاوامر وكدا لا والله دول عملو فية كدا علشان اسرائيل تهدي علينا بردو وانهم يمنعو اي حالات زي دي تطلع من الشعب المصري تاني يعني سياسة دولة بس انت بدام اتكلمت علي الدين في الاول وقولت عهد الرسول صلي الله علية وسلم يبقي انا كمان اجيلك من نحية الدين واقولك من نحية الدين غلط غلط غلط ومينفعش خالص انك تكون حارس لناس اعداء للدين

وطبعا في الاول وفي الاخر المفاوضات هتستمر وكل دا ونشوف اللي يرضي اسرائيل علشان متثورش علينا وكلو علي افا الغلبان المصري دا
وانا مع الاخت برنسيز والاخ ma852003 في رايهم واللي اتعمل في الراجل دا باذن الله هيقتص منهم يوم القيامة واسال الله ان يفرج كربة وهمة وان يجزية خير الجزاء ... اللهم امين
واسف لتطويلي في الكلام والرد

ومنتظر ردك ماندوز بفارغ الصبر

تقبل مروري وكلماتي

[Muhamed]

مافي جنود اسرائيين وجيش كامل ممكن يخدو منو بس 10 افراد جنود اسرائليين يحرسو قول ياعم 50 انما ازاي تجيب واحد مصري عربي مسلم ( ها مسلم ) ويحرس سفارة اسرائيلية


ارجو ان اراجع تلك الجمله


لان فيما معناها ان يقف جنود اسرائلين مسلحين داخل الاراضى المصريه ليحرسوا سفارتهم

علشان ان شاء الله لما تيجى مظاهره ويموتوا حد وهما اصلا جول السفاره وهما اسرائلين وتتوقع منهم اى شئ
فماذا سيكون ردنا وعلى فكره ارض السفاره تحسب كانها مكان للدروله الاخرى والاعتداء عليه كانه اعتداء على الدوله يعنى لو الجنود دول قعدوا جوا السفاره مش هنقدر نجيبهم

فلامر مستبعد تماما وارجوا مراجعه فكرتك والنظر اليهم بمنطوق اوسع


الاهم بقي لو اسرائيلي رفض يحرس السفارة المصرية في اسرائيل هل هيتعمل فية نفس اللي تعمل في الراجل المصري الغلبان دا ... اعتقد لا لالالالالالالالالالالالالالالا

انظر الى الضباط الاسرائلين والامريكان الين يرفضوا ان يزهبوا للجبهات وما رد الفعل لتعرف رد الفعل



انت مثلا مقتنع ان مصر عملت في الراجل دا علشان منفزش الاوامر وكدا لا والله دول عملو فية كدا علشان اسرائيل تهدي علينا

وهل تظن ان مصر هتكترث باسرائيل لموضوع كهذا

اولا اسرائيل تعلم ان الشعب المصرى كله يكرهها

اسرائيل تدرى ان مصر عامله سلام معاها فقط من اجل الاستقرار لان ببساطه الجميع يكره اسرائيل

اسرائيل فى علاقتها بمصر تكون معها امريكا غير ذلك لا تنجح محادثات او اتفاقات بيننا

اخيرا اسرائيل تخشى مصر اكثر مما تخشى مصر اسرائيل



واقولك من نحية الدين غلط غلط غلط ومينفعش خالص انك تكون حارس لناس اعداء للدين

اعود واقول لو كنا فى عهد الرسول صلى الله عليه وسلم وجاءه رسول من الرومان والرسول يعلم ان هناك من يريد قتله هل كان سيدعه بدون حراسه ام سيحرسه

اخى الكريم لو وصلت معك ان مصر رفضت وضع حراسه من الاساس على السفاره الاسرائيليه الست معى فى ان اسرائيل ستقوم بتاخير حراسه لها وقد تكون من قلب اسرائيل كما قال اخونا محمد

والان قول لى رايك ان نحط قوات ليست للحراسه اكثر من روتين فهل تخرسها ضد جنود مثلا وطيارات جيين يدمروا السفاره

الحراسه على السفاره هوا امر شكلى


شكلى فقط

وفائدته الوحيده ساعه المظاهرات

والا ترى معى ان تلك الحراسه هيا عيننا داخل السفاره


الا ترى اننا نقيدهم بتلك الحراسه

الا ترى اننا نمنع احدى حيلهم وكما زكرت السفاره كانت احد بؤر التقاء الراس الكبيره فى عمليات كثيره فالا ترى ان تلك الحراسه ساعدت فى تضييق الخناق عليهم وفى تعاملتهم المباشره على الاقل


ومنتظر ردك الاخير حتى ادلى باخر ما لدى ورائ الاخير فى هذا الموضوع :shades:

[تائب الي الله]

علشان ان شاء الله لما تيجى مظاهره ويموتوا حد وهما اصلا جول السفاره
وهما اسرائلين وتتوقع منهم اى شئ


ارجو ان تاخد الكلمة بمفهوم اوسع وهو يعني لما تقوم مظاهرات في مصر الجنود المصريين مش بيموتو ناس دا مش في مظاهرات وبس دا في انتخابات وفي كل حاجة

اعود واقول لو كنا فى عهد الرسول صلى الله عليه وسلم وجاءه رسول من الرومان والرسول يعلم ان هناك من يريد قتله هل كان سيدعه بدون حراسه ام سيحرسه

اعود واقولك انا انك بتشبة مثل في رسولنا الكريم يعني مكارم الاخلاق يعني كان بيتعامل مع الكافرون بالرحمة فما بالك بالرسول اللي جاي لية علشان يشوف رسالتة ورسولنا يدعوة للاسلام فدا بعيد كل البعد عن ضرب المثل ولله المثل الاعلي وثانيا احنا بنتكلم علي اسرائيل وبعدين الرسول نفسة صلي الله علية وسلم كان اعلم الناس بان الكافرين يرديون قتلة اكيد معايا وكان بينام تحت الشجرة لوحدو وجاءه رجل وقاللة من يمنعك مني فقال الله فسقطالسيف من يدة فمسك رسول الله السيف فقال لة من يمنعك مني الان
مش بقولك بقي روح امسك السيف وروح قولة كدا انما نكون ولازم تكون تعاملتنا صح في كل حاجة علي مذهبرسولنا وانا مش متشدد ولا حاجة والله بس الراجل دا صعبان عليا جدا دخولة السجن وظلم ظلم ظلم ولو كان لية ظهر والله محد كان كلمة واللي لية ظهرميضربش علي بطنة انما علشان راجل غلبان وملوش حد يتعمل فية كدا
وكنت انا عايز اخد رايك بقي ياتري اللي عملو ه دا ينفع في دينا والدين بيقول كدا الجواب بنعم او لا
و مجمل كلامك انك عايز تقول انك مقتنع باللي عملوة في الراجل دا واكيد هتقول علشان يكون عبرة لغيرة او حكومتنا وكدا بس انا للاسف خلافك ودي وجهة نظر واان احترم وجهة نظرك بس انا بجد استحالة اقول غير
حسبي الله ونعم الوكيل ولا حول ولا قوة الا بالله

[تائب الي الله]

وانا معاك في رايك انه امر شكلي وااننا نديق عليهم وهي عييننا داخل السفارة ولكن لو انت اللي كنت مكان الراجل دا كنت هتقبل بردو ولو انت اللي بتحكم كنت هتحكم علية بكدا وعايزك تشوف رايي الناس زمايلك وتشوف اول رد فعلهم اية اعتقد ان يعني مفيش حد هيقول يستاهل علشان كذا وكذا اللي هو الكلام اللي حضرتك قولتة دا

وفي الاول وفي الاخر ديوجهة نظر بردو ممكن تكون شايف حاجة انا مش شايفها او عارف حاجات انا مش عارفها بس ربنا يسامحهم

ودي اخر مشاركة ليا في الموضوع دا وانا منتظر ردك

[Muhamed]

قبل ان اوضح رايئ الخاص والذى لم ازكره فى السابق لانى ببساطه كنت غير مقتنع بالرائ الذى كتبته ولكن لسبب لم يتم زكره


اما عن الاسباب التى وردت وكنت ارد عليها فكنت ارد ايضا من نظريات يطرحها فكرى


فكما قلت هناك اكثر من نظريه فى راسى ولكننى اقتنع باحدها وساشرحها ولكن بعد الرد على جزئيه اخى تائب الذى استمتعت بجد بفكره والحوار العاقل معه وسارد بما طرحه عقلى

ارجو ان تاخد الكلمة بمفهوم اوسع وهو يعني لما تقوم مظاهرات في مصر الجنود المصريين مش بيموتو ناس دا مش في مظاهرات وبس دا في انتخابات وفي كل حاجة

فى عامى الاول فى الجامعه اندلعت الانتفاضه الاولى

وفى حبنها كانت السفاره على بعد امتار من الجامعه

واندلعت المظاهره الكبرى

وهيا اكبر مظاهره شهدتها منطقه الجامعه منذ عقود طويله ولو تفتكر ساعتها توفى طالب فى الاسكندريه بسبب التدافع او القنابل المسيله للدموع

اتزكر ان السفاره تقبع فى الدور الاخير من العماره القانته فى الشارع

وساعتها كان الامن المركزى لا يجد بدا من القنابل المسيله لابعاد الطلبه الهائجه عن العماره

فازكر لى لو لم يكن هناك حراسه على السفاره ماذا سيكون النتيجه هل تحطيم السفاره كما حطمت فى تلك الاوقات محلات ماكدونلدز وكنتاكى

ماذا ستنتظر من لو كان الاسرائلين هم من يحروسوها


الا ترى انه وبعيدا عن الامور السياسيه

لو ضباط وعساكر الامن المركزى المكلفين من الاساس بمظهرات الجامعه (غير حرس السفاره)

لو راؤ الحراسه الاسرائليه تقوم بضرب الطلبه المصريين سواء باسلحه مطاطيه او بارصاص الحى ماذا سيكون التصرف


الا ترى ان الموضوع سيتطور الى مذبحه ومشاكل لا حصر لها



اذن ففكره حراسه السفاره من قبل ناس غير مصريين غير قابله للنقاش من الاساس


عوده الى الموضوع

انا معك فى انه موضوع حبس الامين امر غير مبرر

ولكن فى نقطتين اطرحهم لفكرك لتفكر معى فيهما

اولهم هل تدرى طبيعه النظام العسكرى فى مصر وطبيعه التعامل فى اى موقف مع الضضباط والجنود عند مخالفه الاوامر (اى اوامر) لست هنا لتقييم تلك القواعد من الاساس ولكن يبدوا انهم طبقوها مع هذا الامين ولا يصح مقارنت هذا الموقف بموقف المرتشين والهاربين لانهم خارج النظام العسكرى


ثانيهم هل تعلم من نشر الموضوع من الاصل

يعنى مين اللى اظهر الموضوع للنور ومين مصلحته فى اظهاره

على الرغم ان زى مقلت ان الموضوع عسكرى ودى امور داخليه عندهم


والان الى وجهه نظرى اللى انا مقتنع بيها

انا ارفض مثل هذا التصرف والسبب

لما استشدت فى عهد الرسول بالرومان كان الرومان قوم معترف بهم فى هذا الزمن


اما الان فمعنى اننا قبلنا السفير اننا نعترف باسرائيل نفسها


وهذا ما لا يقبله عقلى ولا يقبله فكرى بان نعترف من الاساس بهذا الكيان المسخ

فما بنى على باطل فهو باطل

ومدام لا توجد اسرائيل فما هوا سفيرها الذى نعترف بوجوده

الخطا هوا الاعتراف باسرائيل من الاساس

ومنه ترتب وجود السفير

ومنه ترتب وجود الحراسه


ومنه ترتب موضعنا اليوم

وارجوا ان تكونى فهمتوا وجت نظرى

وشكرا

[تائب الي الله]

والان الى وجهه نظرى اللى انا مقتنع بيها

انا ارفض مثل هذا التصرف والسبب




وهو دا اللي انا كنت عايز اسمعو منك واللي كلنا مش موافقين علية

[Muhamed]

وبعد اكثر من عام يشاء القدر ان يفتح احد ضيوف المنتدى هذا الموضوع القديم لاراه من شاشه المتواجدون حاليا حتى استعيد ذكريات احد اجمل النقاشات التى دارت فى ساحات المنتدى ولتسنح لى الفرصه للرد على اخى تائب الى الله الذى اتمنى لو يرا كلاماتى وتحياتى له على فكره الناضج

وهو دا اللي انا كنت عايز اسمعو منك واللي كلنا مش موافقين علية


الفكره يا اخى تائب انى كما وضحت فى اول تعليق ليا على الموضوع انى ساطرح كذا وجهه نظر وانا مقتنع باحداها

ولكنت اردت فى مداخلاتى ان القى الضوء على الفكر الغربى او المعاكس الذى كان سيخرج مضاد للموضوع

وهذا شئ مهم للغايه

ان تعلم كيف سيفكر عدوك وماذا ستكون مبرراته حتى ولو تخفت فى ثوب غير ثوبه

وما اكثر رافعين اللواء الغربى فى عالمنا العربى والاسلامى

كنت اناقشكم بنفس هذا الفكر لكى ارى الغيره فى عيون شباب الاسلام

وهذا يبهجنى ان ارى غيره الشاب المسلم على دينه ووطنه

وانته ابرز مثال على ذلك فلولا مداخلتى لما استفززك الموضوع ودخلت لترد دفاعا عن دينك ووطنك

بارك الله فيك وفى جميع شباب الاسلام

[la princesse]

وبعد اكثر من عام يشاء القدر ان يفتح احد ضيوف المنتدى هذا الموضوع القديم لاراه من شاشه المتواجدون حاليا حتى استعيد ذكريات احد اجمل النقاشات التى دارت فى ساحات المنتدى ولتسنح لى الفرصه للرد على اخى تائب الى الله الذى اتمنى لو يرا كلاماتى وتحياتى له على فكره الناضج




الفكره يا اخى تائب انى كما وضحت فى اول تعليق ليا على الموضوع انى ساطرح كذا وجهه نظر وانا مقتنع باحداها

ولكنت اردت فى مداخلاتى ان القى الضوء على الفكر الغربى او المعاكس الذى كان سيخرج مضاد للموضوع

وهذا شئ مهم للغايه

ان تعلم كيف سيفكر عدوك وماذا ستكون مبرراته حتى ولو تخفت فى ثوب غير ثوبه

وما اكثر رافعين اللواء الغربى فى عالمنا العربى والاسلامى

كنت اناقشكم بنفس هذا الفكر لكى ارى الغيره فى عيون شباب الاسلام

وهذا يبهجنى ان ارى غيره الشاب المسلم على دينه ووطنه

وانته ابرز مثال على ذلك فلولا مداخلتى لما استفززك الموضوع ودخلت لترد دفاعا عن دينك ووطنك

بارك الله فيك وفى جميع شباب الاسلام



مش هقول غير بارك الله فيك وفى تائب وفى تفكيركم المتوازن وربنا يكتر من امثالكم وينفع بكم الاسلام