مطلوب مساعدة فى تقسيم هارد

[iMuslim]

احيكم بتحية الاسلام
السلام عليكم ورحمة الله وبركاته
مش عارف طلبى دا هيكون مناسب فى هذا المكان ولا لاء
وبرضه مش عارف اذا كان طلبى هيتجاوب عليه ولا لاء وخصوصا ان اخر موضوع كان من سنه 2010

اشتريت لابتوب جديد وعاوز اقسم الهارد بتاعه ماعنديش الا بارتشن السى بس
ارجو الافاده

جزاكم الله خيرا

[عبدالرحمن م]

وعليك السلام أخى الكريم ورحمة الله وبركاته

ياريت تقولى أولاً انت شغال على أى ويندوز وايه الحجم الكلى للهارد-ديسك
كذلك هاتلى صورة من بارتيشن السى بتقول فاضى\مستهلك عليه مساحة قد ايه ؟

وأخيراً عاوز تعمل كام بارتيشن جديد ؟

[عبدالرحمن م]

فى حالة انك شغال على ويندوز 7 أو فيستا دى طريقة التقسيم

توكلنا على الله

---------------------------------------

كليك لمين على أيقونة "computer" واضغط Manage من القائمة
افتح Storage
افتح Disk Management

دلوقتى فيه خطوتين هيتعملوا .....
الخطوة الأولى هنعمل shrink لبارتيشن السى بمعنى نقتطع جزء من مساحته
والخطوة الثانية نعمل extend للمساحة المقتطعة ونحولها لبارتيشن جديد

---------------------------------------
خطوة shrink

النافذة عندك بيكون شكلها كده
الرابط لايظهر فى الأرشيف

اضغط كليك لمين على بارتيشن الـC واضغط shrink من القائمة

هتظهرك نافذة زى دى بتسألك عاوز تقتطع مساحة قد ايه من الC
الرابط لايظهر فى الأرشيف

المساحة اللى هتلاقيها مكتوبة عندك قدام الخانة التالتة، دى المفروض انها اكتر مساحة ممكن تُقتطع من الـC ومش ينفع تقتطع اكتر منها لكن ينفع تقلل
- طبعاً المفروض ما تقتطعش كل المساحة الفاضية على الC لأن ده هيخلى البارتيشن مليان على الآخر ومش هينفع تسطب برامج بعد كده فاللى هتعلمه انك تكتب فى الخانة التالتة مساحة البارتيشن الجديد وتتأكد إنها أقل من الرقم الأصلى اللى كان مكتوب بحوالى 5000 ميجا

بعد ما كتبت مساحة البارتيشن الجديد وكله تمام اضغط shrink وانتظر شوية ..

[عبدالرحمن م]

الخطوة الثانية ........... "extend"

بعد إنهاء الخطوة الأولى النافذة عندك بيكون فيها جزء لونه أسود ومكتوب عليه Unallocated جنب بارتيشن الـC عندك

الرابط لايظهر فى الأرشيف

هتغط كليك لمين على البارتيشن الأسود وتضغط extend

هتظهرلك نافذة زى دى اضغط نيكست

الرابط لايظهر فى الأرشيف

هتظهرلك النافذة دى اضغط نيكست وبعدين finish

الرابط لايظهر فى الأرشيف

كده المفروض فيه عندك بارتيشن جديد وممكن تستعمله مش مطلوب خطوات إضافية، لكن يُفضل انك تكمل الخطوات عشان تديله حرف\اسم

من نافذة computer management دوّر عالبارتيشن الجديد اللى عملناه

الرابط لايظهر فى الأرشيف

هتلاقى عندك البارتيشن الجديد اضغط كليك لمين عليه واختار Change drive letter and path

من النافذة اللى هتظهر اضغط change

الرابط لايظهر فى الأرشيف

اختار حرف D واضغط أوك

الرابط لايظهر فى الأرشيف


بس كده :) ... لو عاوز تعمل كمان بارتيشن أعد الخطوات بحيث خطوة الـshrink تعملها على بارتيشن الـD والخطوة الأخيرة تدى البارتيشن الجديد حرف E

[iMuslim]

نوع الوندوز 8
حجم الهارد 1 تيرا
عدد البارتشن 5 بما فيهم الـ C
عاوز حجم البارتشن يكون 225 جيجا
معادا الـ C حجمه 100 جيجا

الحاجه الثانيه انا جربت الخطوات اللى حضرتك منزلها
اشتغلت معايا على وندوز 8 ولاكن اخر خطوه بيقولى عاوزه NTFS ولا exFAT
حضرتك رائيك ايه ؟

[عبدالرحمن م]

خليه يبقى ntfs ..
ومبروك اللابتوب

[iMuslim]

فيه مشكله قبلتنى وانا بقسم الهارد بارتشن السى مش نافع يقل عن 400 جيجا

تانى مشكله دخلت على بروبيرتز من بارتشن السى ثم على Optimize
ثم اختارت بارتشن السى واتكيت على Analyze
قبل ما اعمل الحركه دى السى كان مكتوب ادامه 10% fragmented
بعد ما عملتها بقى مكتوب 5%

انا كدا عملت حاجه خطء ولا عادى ؟
ومعلش استأذن حضرتك عاوز اخلى السى 100 جيجا بس هل يوجد حل
ام انه لا يقل عن ذالك
جزاك الله خيرا

[عبدالرحمن م]

المشكلة إن بيبقى فيه حاجات متخزنة فى نهاية بارتيشن الـC فويندوز مابيقدرش يقلل حجم البارتيشن للنقطة اللى متخزن عليها الملفات دى
الحل إنك تستخدم برنامج خارجى اسمه Partition Wizard عشان تقلل البارتيشن لـ100 جيحا يا إما تقلله لـ400 وتعمل جنبه بارتيشن 600 وتبقى تقسيمة تقضى الحاجة من غير تعب

الـDefragmentation دى المفروض تتعمل كل فترة عادى مافيهاش مشاكل ...

[iMuslim]

معلش يا عبدالرحمن استأذنك تجبلى البرنامج partition wizard
جزاك الله خيرا

[عبدالرحمن م]

مجانى يا ريس من هنا Download (الرابط لايظهر فى الأرشيف)

[iMuslim]

تسلم ايدك يا عبدالرحمن
معلش بالله عليك طريقة تقسيم الهارد بالبرنامج

[عبدالرحمن م]

الطريقة شبه اللى عملناها قبل كده فى إنك بتقتطع جزء من البارتيشن اللى حجمه زايد عن اللزوم وبعدين بتضيف المساحة دى لبارتيشن موجود .. أو إنك تستخدم المساحة اللى اقتطعتها تعمل منها بارتيشن جديد تماماً
على حسب التقسيمة اللى عندك دلوقتى خد القرار المناسب بحيث هتقتطع من ايه وهتضيف لايه عشان تخلى السى 100 جيجا والأربع بارتيشنات التانية 225 جيجا ...

--------------------------

طريقة الإقتطاع بتضغط على البارتيشن اللى حجمه زايد (وليكن فى المثال بارتيشن الـC) وتضغط على Resize

الرابط لايظهر فى الأرشيف

من هنا بتحرك المؤشر اللى عالشمال لناحية اللمين بالماوس، لحد ماتوصل للحجم اللى انت عاوزه يبقى حجم بارتيشن الـC بعد الإقتطاع (وليس الحجم المقتطع من C) ... وبعدين اضغط أوك

الرابط لايظهر فى الأرشيف

هيظهر عندك دلوقتى مساحة فاضية ومكتوب قدامها Unallocated

الرابط لايظهر فى الأرشيف

من هنا بقى المفروض تحدد يا إما المساحة الفاضية دى هتعمل بيها بارتيشن جديد تماماً ... يا إما هتضيفها لبارتيشن موجود أساساً

-----------------------

الحالة الأولى: عمل بارتيشن جديد من المساحة الفارغة

1-بتضغط على المساحة الفاضية
2- اضغط Create
3- اكتب اسم وحرف البارتيشن الجديد
4- اضغط ok

الرابط لايظهر فى الأرشيف

----------------------------------------

الحالة الثانية: إضافة المساحة الفارغة لبارتيشن قائم

1- اضغط عالبارتيشن المطلوب نقل المساحة إليه
2- اضغط Extend partition
3- اختار مصدر المساحة الإضافية (دور فى القايمة عالمساحة المكتوب قدامها Unallocated
4- حرك المؤشر لأقصى اللمين
5- اضغط ok

الرابط لايظهر فى الأرشيف


لحد دلوقتى كل التغييرات اللى انت عملتها مابتتنفذش

عشان تبدأ التنفيذ والتعديل عالبارتيشنات فعلاً بتضغط Apply
لو حاسس إن فيه مشاكل وعاوز تلغى اضغط Discard
الرابط لايظهر فى الأرشيف