الحكومة: استخدام التكييفات دليل رفاهية المصريين

[حبيبـة ابـوها]

بسم الله ,, والسلام عليكم ورحمة الله وبركاته

اختتم الحزب الوطني أمس (الإثنين) مؤتمره السابع، وتحدّث الدكتور أحمد نظيف -رئيس مجلس الوزراء- مؤكّداً ارتفاع مستوى معيشة المصريين في العام الأخير، فيما قالت عائشة عبد الهادي، وزيرة القوى العاملة والهجرة: "إن خريجي الكليات النظرية كالآداب والحقوق ليس لهم مكان في الوظائف الحكومية والقطاع العام"، ودعتهم للعمل "أفراد أمن" بالمولات التجارية.

ففي كلمته قال نظيف إن استهلاك الطاقة في المنازل يزيد بنسبة 10% سنوياً، ما يعني ارتفاع مستوى معيشة المصريين، الذين اشتروا حوالي 750 ألف جهاز تكييف خلال العام الأخير، على حد قوله. وأضاف رئيس الوزراء؛ حسب ما نقلته جريدة المصري اليوم: "مافيش بلد في العالم يعيش بهذا البذخ الذي نفعله في الطاقة"، ووعد بتحسين الأجور، وتحقيق التوازن في الأسعار.

وفي الوقت نفسه وجّهت عائشة عبد الهادي دعوة صريحة لخريجي الكليات النظرية في برنامج "90 دقيقة" على قناة المحور الذي يقدمه الإعلامي معتز الدمرداش، للعمل "أفراد أمن" بالمولات التجارية؛ لأن "هذا هو المتاح"؛ على حد قولها.


وفى الاخر لا تعليق طبعا :shutup::tefanet-yolks1-28::shutup:

[عبدالرحمن م]

كالعادة

احنا نشاور على المشاكل وهما يشاوروا على حاجات مالهاش علاقة خالص

سيبوا الورد يفتح بقى على رأى اسمها ايه

[Muhamed]

بص يا عبده

الحكومه عندنا ودن من طين وودن من عجين

او عندنا حكومه ماشيه بسرعه السلحفاه فى التفكير فى مصلحه المواطن البسيط ( بس صواريخ مع المستثمر اللى ممكن يبقى حرامى)


لكن برضه

معلش يعنى

احنا شعب فرعونى وزياده عن اللزوم

متقنعنيش ان واحد بيصرف 100 جنيه كروت شحن

و100 جنيه سجاير فى الشهر الواحد

ويقولى اصل المرتب ضايع

مينفعش يكون مواطن الطبقه المتوسطه شايل موبايل بكام الف امال الطبقه فوق المتوسطه يشيل موبايل بكام

طبعا بمناسبه ذكر موضوع التكييفات هقلكم ارقام حلوه


الحكومه قالت ان فى 750 الف جهاز تكييف زياده السنه دى

طيب بالارقام برضه علشان الناس تفهم

قدره جهاز التكييف تتراوح من 1 حصان الى 3 حصان

هقول متوسط 2 حصان

والحصان وحده = 750 وات تقريبا يعنى 3\4 كيلو

انا هحصب ان الحصان = كيلو علشان ابقشش على الحكومه

عندنا 750 الف وحده تكييف كل واحده متوسط 2 كيلو

يعنى بنتكلم فى 1500 الف كيلو واحد

يعنى ببساطه 1500 ميجا وات

يعنى ببساطه الزياده ناتج التكييف اللى الحكومه بتعيط عليه = قدره محطتين كهربائتين كل واحدخ 750

طيب ايه المشكله

المشكله ان سنه 2009 استهلاك مصر وصل لذروته لما وصل لحد 19 الف ميجا وات

وكان الانتاج سعته 21 الف ميجا

فى 2010

الذروه وصلت 27 الف ميجا وات والانتاج 32

الزياده بلغت 8000 ميجا وات فى الاستهلاك

طب التكييف سبب الازمه زود 1500

طب وال 6500 الباقيين دول محدش سال نفسه هما ايه

ولا الحكومه خلاص اى مشكله يبقى المواطن السبب

المواطن اوقات بيأفور بس مش كل مشكله هنصدر عدم وعى المواطن !!!

[محمد الجزار]

بيقولوا ان فى 750 الف جهاز تكييف زياده السنه هل ده دليل قاطع علي أن مستوي معيشة الفرد أرتفعت
دا أسمه كلام دول معظمهم بالقسط ما يحسبها حسبة صغيره - متوسط دخل الفرد 1500 علي حد حسابتهم لو أحنا فردين بس بالمنزل .
*عارفين أكل في اليوم الواحد يكلف كام
( فطار : طبق فول + 2 فلافل + قطعة جبن + 5عيش = 5 جنية
غذاء : 1ك مكرونة + 2 بيض + سلطة + 1/2 بطاطس محمرة < في أقل من كدا > = 10 جنية
عشاء : طبق فول + 2 فلافل + قطعة جبن + 5عيش = 5 جنية )
جنية 20 * 30 يوم = جنية 600 أكل فقط
* ( مواصلات للعمل يومياً + 1كوب شاي = 6 جنية ) 0 دا طبعا مفيش أنا أتأخرت علي الشغل أخد تاكسي
6 * 26 يوم = 156 جنية
* ( كهرباء + مياه + غاز ) = 100 جنية
600+100+150 = 850 جنية
كل دا
-- ( وأنا ما أكلتش فراخ ولا لحمة ولا فطرت عيش زيادة ولا زوت في الأكل شوي ولا جبت فاكهة ولا جبت حلوي لطفلتي ولا جبت أكل مخصوص للطفل ) .
-- ومفيش دكتور ومفيش علاج . < وكشف الدكتور مش أقل من 30 جنية - وعلاج مش أقل من 40 : 50 جنية >
-- مفيش بامبرز للطفل .
-- مفيش تصليحات في المنزل .
-- مفيش ملابس .

حد يا جماعه يقولي نعمل أية ده للفرد اللي شغال وبياخد 1500 جنية طيب دا في ناس بتاخد 500 جنية بتعمل أية

علي العموم الحمد لله ربنا اللي سترها برحمتة

[عاشق الايمان]

برضة نظيف

مفيش فايدة

مش هو ده يا اخواني الا كان بيقول ان مستوي معيشة الفرد في مصر زاد نسبة الي زيادة مبيعات السيارات

الدولة دي يا جماعة تقريبا كده والله اعلم ان الطبقة السفلي والمتوسطة مش محسوبه عليهاااا

كاننا مش موجودين من الاساس

وده من واقع الكلام الا فوق ده

[حبيبـة ابـوها]

واضح ان هناك حالة من الاستغراب على الكلام دا ,, ودا الطبيعى بصراحه يعنى

هما بالنسبة ليهم بيحكموا على الشعب من خلال نسبة زيادة المبيعات سواء تكييفات او سيارات او.... او موبايلات او كروت شحن وسجاير وما الى اخر ذلك ,, بس بالنسبه للى بيشتروا معظم الحاجات دى من الطبقه اللى حالتها حلوة يعنى مش هتقول اجيب منين ولا اودى فين

انما فى ناس تانيه محدش عارف عنهم حاجه الا المولى عز وجل وكفاهم الله يعنى

وبخصوص كلام الست عيشه يعنى خريجى اداب وحقوق(منهم اللى دخل علشان التنسيق جاله كدا ومنهم اللى دخل برغبته) اخرهم افراد امن ,, مش بعيب فى فرد الامن لا سمح الله ,, اى نعم هو احسن من مفيش ,, بس مكانش يتعب نفسه ويدخل كليه علشان فى الاخر يشتغل فرد امن !!!!!

يلا الحمدلله على كل شئ معانا ربنا :tefanet-yolks1-30: