المجلس القومى للرجل

[فجر الاسلام]

يا أخي البنات مقصفوين الرقبة دول خلاص إستقووا و افتروا


إفتروا إيه ..قول توحشوا ..البنت من دول بقى يندب في عينها رصاصة


رايحة الشغل ..جاية من النادي ..رايحة الدرس ..راجعة من السينما


لا بقوا يتثبتوا ولا يتظبطوا و كله كوم و اللي حبست الواد اللي كان بيعاكسها دي كوم ..فين بنات زمان ..ولا واحدة كانت بتفتح بقها


و كل يوم مؤتمر ..جمعية


لأ و مجلس قومي للمرأة كمان


طب و إحنا مالناش مجلس ليه؟


آه صحيح ليه؟



و قد كان ..قررنا نحن الإخوة الرجال المقهورون إننا صحيح رجالة ..بس من زمان ماوقفناش وقفة رجالة ..ضد سيطرة المرأة على كل مجريات الحياة..ضد زحف جحافل النساء و شراذم الفتيات على كل المهن و المواقع ..ضد مشيهم في الشارع ..ضد ركوبهم الميكروباصات ..ضد إعتراضهم لما حد يمد إيده كده والا كده ..ملعونييييين في كللللللل كتاااااااااب ..ما هم اللي بيجيبوه لنفسهم ..اللي ماشية لوحدها ..عشان نفسها تتعاكس..و اللي ماشية مع أبوها والا أخوها و إيش عرف الناس مين ده إن شاء الله ..و اللي راكبه عربية لوحدها ..مش عارفه إن الموضوع ده بيثير الغرائز و اللي راكبه مع واحد جنبها ..مش عارفة إن شرف البنت زي سلك الفرامل ؟..اللي لابسه قصير ..أستغفر الله العظيم ..و اللي لابسه طويل ..إلهي تولعوا بجاز ..ما احنا بنفضل نفكر يا ترى اللبس الطويل ده مخبيه تحته إيه؟ ..اللي خارجة في العيد الصغير دون أي إعتبار لإن الناس لسه خارجة من صيام ..و اللي خارجة في العيد الكبير و الناس نفسها مفتوحة ع اللحمة ..و كله كوم و اللي خارجة في عيد العمال دي كوم .. ما احنا معذورين لما نظن فيها الظنون لأن كل الناس عارفة إن عيد العمال ده هو عيد "المكن" ..ولا سابوا شغلانة إلا و اشتغلوها ..ولا سابوا دراسة إلا ودرسوها ....خايليننا في الرايحة و الجاية ..ماتكنوا في حتة و تريحونا بقى ..و تقعدوا في بيوتكم و تسيبونا ناكل عيش



و لهذا قررنا نحن (مجموعة من الصحفيين و أساتذة الجامعة و المهتمين بشئون
المجتمع و حقوق الإنسان) إننا نقوم بإنشاء مجلس قومي للرجل (الرابط لايظهر فى الأرشيف) ..أسوة بالمجلس القومي للمرأة و مافيش حد أحسن من حد..أما عن مبادئنا فهي كما يلي



المبدأ الأول : إذا رأيت فتاة أو سيدة تتعرض لموقف سيئ في الشارع لا أساعدها..


ده على أساس إن الرجالة مقطعين بعضيهم مساعدات و الحكومة نزلتها على بطايق التموين عشان كل راجل مايستعبطش و يساعد ست واحدة و بس



..
المبدأ الثاني: مقاطعة جميع المحلات والشركات التي تمتلكها أو تعمل بها فتيات أو سيدات..

قشطة جدا .. ..كده هتقضوا حياتكم فول و كشري و عصير قصب ....بدل المقهورون في الأرض,,هتبقوا المنتفخون في الأرض.. صحة و عافية إن شاء الله
.


.المبدأ الثالث: مقاطعة المنتجات التي تظهر في الإعلانات التلفزيونية التي تقوم بها فتيات أو سيدات..
طب دي بأه جايبة من أول السمنة و الشاي لغاية إعلانات "خللي السلاح صاحي" الشهيرة ..الإعلانات الوحيدة اللي مافيهاش ستات هي إعلانات مصلحة الضرائب.. خللي الضرايب بأه تنفعكم بدل السمنة و الشاي و....أي حاجة تانية يعني



المبدأ الرابع: إذا كنت صاحب شركة أو محل أمتنع عن تعيين الفتيات والسيدات وإذا كان لدي موظفات أقوم بفصلهن من العمل
طب إعملها كده ..أبو وردة هيسمعوه و هو بيعمل زووووو فوق نافوخك من آخر حارة في الصين



المبدأ الخامس: إذا كنت سائق تاكسي أو ميكروباص فلا أقوم بتوصيل النساء
عادي..هنقضيها تكاتك ..و يا توك توك الغرام يا ..مقرب البعيد



المبدأ السادس: المطالبة بالمساواة بين الذكور والإناث في تأدية الخدمة العسكرية
و الله ماعندنا مانع ..سلمونا انتوا بس الجيش ده 3 شهور و اتفرجوا عليه بعدها ..جمعيات و أجازات و أذونات رضاعة ..احنا ما نتأخرش أبدا عن خدمة الوطن



و تتوالى المباديء حتى المبدأ الرابع عشر : الإمتناع عن الزواج من أي فتاة حاصلة على أكثر من الإعدادية أو مؤهل متوسط على الأكثر..
دي شكلها تنفيضة قديمة من الفيونكة أيام الجامعة يا برنس ..



و إذا كنت أعرف شخص متزوج من مصرية أقاطعة لأن الذي يقبل الزواج من مصرية في ظل القوانين المعمول بها ليس رجلا..
هيييه ..مسكوا في بعض..مسكوا في بعض



أما أكثر مباديء الجمعية أهمية على الإطلاق هو المبدأ التاسع عشر و الأخير: إذا دخلت مصر حربا لا أدافع عنها..
ده علشان مصر مؤنث مثلا والا إيه؟



العضوية مقتوحة لكل المقهورين من كافة الأعمار و الخلفيات ..

و لا عزاء للسيدات
.


يا وكستك يا برايد إنتي و اللي زيك ..هم دول اللي فاضلين بعد اللي راحوا في الحرب و غرقوا في العبارة و اللي حاجزين في حادثة القطر اللي جاية؟..عليه العوض و منه العوض

لنا الله يا بنات

منقوووووووووووووووووول من مدونة عايزة اتجوز

[Muhamed]

بصراحه متفق مع معطيات الكلام ومختلف فى النتائج

يعنى

اى حد فينا لو نزل الشارع وركب المواصلات وراح شغله

كفيل ان يطلع بنفس المعطيات المذكوره عاليه

فى كون المراه سبب فى نكبه الرجل فى عصره الحالى

المراه التى تخرج وتركب المواصلات هيا عبء على من اراد الله ان يبتليه بعطله فى الوقت وزود عليها وجع الدماغ لو كانوا اتنين ستات مع بعض

افتكر مره اتنين ستات قعدوا وقت يقرروا مين يركب الاول

حتى ولو مش مع بعض فالحرب ما بينهم مصيبه اخرى ( عطله برضه)

ومين فى الاتنين يركب العربيه الاول

طبعا مش هنسى ان خروج البنات للجامعات بيخلى الواحد وهوا رايح كليته يقول يارب هاخد كام سيئه النهارده لانه فى النهايه بشر وعنيه ممكن تقع مره او اتنين فى اليوم من المناظر الغريبه الموجوده

نروح الشغل بقه علشان نلاقى العبقريه المميزه

الصراحه انا هتكلم عن نفسى وعن تخصصى بعيدا عن التخصصات الاخرى

انا مهندس

باى شكل من الاشكال مستحيل اتقبل فكره ان مهندسه تنزل مواقع

مش داخله زمتى بشلن

المهندسه كبيرها تقعد على مكتب بعيدا عن المواقع

طب حد يقلى وانته مالك بيها

مالى ان المكان بتاعها كان هيشغله شاب حلو كده زى حالاتى يشيل معايا الشغل فى الموقع

مالى ان الشاب ده مش هبقى مطالب بانجاز الاعمال بتاعته اللى بتتطلب اماكن مرتفعه

ففى كل الاحوال عمل المهندسه اما بيكون على حساب شاب (مش لاقى شغل) وبيكون على حساب الشغل نفسه لان طبيعتها كانثى لا تسمح باعمال كتيره

طبعا فى اماكن اخرى الستات تنفع فيها على عينى وراسى

بس سلملولى على الاجازات والتصاريح وتقشير البطاطس فى الاماكن الغير هندسيه :)

طبعا فى اعمال من نوع تالت بس ده لا يتناسب مع البنات الملتزمات ببيوتهم :)


فى النهايه

هم ولابد منه