ليه إحنا بنحب مصر . . . . ! ! !

[عاشق الايمان]

مصر هي أمي نيلها هو دمي شمسها فـ سماري ... مش عارف ايه كده في ملامحي حتى لوني قمحي لون خيرك يا مصر

يا سلاااام ... صباح الوطنيه او مساء مش هتفرق

المهم




عاش والله الي كتب الكلمتين دول منتهى الإندماج بين المواطن المصري ومصر ، مصر أمي والنيل دمي وشكلي ولوني وكل حاجه مختلطه بمصر

بس اشمعنى مصر ؟
ما أرض الله واسعه وكلها أرض الله !!
ليه بقى مصر بالذات ؟؟
ليه حتى لو ربنا سهلها ولقينا نفسنا في حته تانيه من أرض الله الواسعه بنحس بحنين لمصر؟
وتبقى في ايدينا كل حاجه وعنينا تتملى من كل حاجه وقلبنا يفضل في مصر !!



وتلاقي يا أخي المصري على قهو في اسطانبول ، أو في جنيه في لندن ، أو تحت شمسيه في مطعم طلياني فوق الجبل
والدنيا من حواليه نضافه وزوق ولطافه وحاجه تغيظ على رأي عمنا (بيرم التونسي)
وتلاقيه برضه بيقول : بس مصر بنت الكلب وحشتني .

لو كان الوطن مجرد مكان ناكل فيه ونشرب ونتناسل على أرضه - نتجوز ونجيب عيال يعني - كان يبقى أي مكان في الدنيا أحسن من مصر
لان نص دول الكره الأرضيه على الأقل أكلها وشربها وستاتها ورجالتها كمان أحلى من مصر :)

تبقى مش المنفعه لوحدها .. أكيد في سر تاني
.. تركيا هي أمي وأي نهر من الأربعين نهر الي فيها هو دمي وشمسها فـ سماري برضه ... ومش عارف ايه كده في ملامحي حتى لوني قمحي لون خيرك يا تركيا
اه مهي تركيا بتزرع القمح فعلا مش بتستورده

بس مش ماشيه برضه ، فيه حاجه ناقصه ، مصر بنت الكلب الي في قلبي دي اعمل فيها ايه ؟

حتة الصحرا الي واقعه في ملطش للي رايح والي جاي يحتلها ، والي الفرص فيها بالقطاره والقطاره مش في ايدينا كمان
والي بقت عامله زي مقاولة الهدد كل عيل شايل منها قالب طوب وبيجري
وحتى الشعب الي لونه قمحي والي كان مالي الدنيا ضحك بقى دمه تقيل ...
ليه بقى حازه فـ نفسي كده ؟
ليه مش عارف استأصل نفسي منها أو استأصلها من نفسي ؟

مراية الحب عامية
دا صحيح
عاميه وبنت كلب كمان
مهو حبيبتك مثلا مش ممكن تكون أحلى بنت في الدنيا
الواحد مننا بيحب قرده وبيتهيأله لو غابت عن نظره هيروح فيها
والدنيا كلها واصحابه وأهله يبقوا شايفين إنها (صندل) ما عدا هو يبقى شايفها ملاك نازل من السما وماشي ع الأرض وخساره فينا إن إحنا نبص على جمالها

ويمكن تكون هي دي المشكله

إننا بنحب مصر وبنطلتش في غرامها
قبل ما نعرف إن فيه بلد تانيه اسمهااااا تركيا

بنحب القهاوي بتاعتها قبل ما نسمع عن قهاوي باريس

بنحب ترابها قبل ما نعرف ان فيه اوطان تانيه نضيفه مفيهاش تراب أصلا

وبندهول في غرام (التابعي و اخر ساعه) - مطاعم فول وطعميه مشهوره - قبل ما نعرف ان مطاعم إيطاليا فيها أكل بني ادمين
وان الفول والطعميه والمسقعه دي أصلا علف :)

وبنعشق هواها قبل ما حد يقولنا ان احنا عايشين جوه واحده من أكبر بؤر التلوث في العالم كله

وبنحب بنت الجيران أو زميلتنا في الجامعه قبل ما نفوق على الحقيقه المره إن نسبة الذكور في مصر 100%100 :)

وبنمشي في الدنيا ومصر متعلقه في دراعتنا واحنا فاخورين بيها وفراحنين وحاسيين إنها ملاك نازل من السما وماشي على الأرض وخساره في أي حد أنه يبص على جمالها

قال والناس كانت فاهمه ان حب الوطن حسابات بتحصل في العقل اتاريه طلع غرام في غرام في غرام وكل الي فاهمه منه ان لما سيرة مصر بتيجي في الكلام جسمي بيقشعر وشعر ايدي بيقف وبحس ان دمي اتحرق

يسلااااااااااام يا ولاد دا حب مصر ... حب مصر طلع فيه هرمونات اكتر من هرمونات البلوغ والمراهقه والحب الأول

وكل يوم بحبك أكتر من الي فات ، مش عقل ولا مصالح دي بس هرمونات

[سمو الأحساس]

بلدنا في القلوب متشاله

[فجر الاسلام]

اعتقد ان ده شعور كل واحد ناحية بلده
المصرى ناحية مصر
الفرنساوى ناحية فرنسا

الخ الخ

بس مصر بنت الناس الكويسة دى وحشانى

[مصطفى شاكر]

سبحان الله ،،





بالفعل مهما حدث ، ومهما قيل عنها
فهى فى القلب ، وحبنا لها لا يقل ، بل يزيد

وبحكم عملى فأنا أخالط اناس من جنسيات مختلفة ، من دول الخليج وجميع الدول العربية ،
وصدمت صراحةً عندما وجدت اكثرهم ، قد استقر فى ذهنه أن [ مصر ] من اسوأ البلدان العربية ،
ومع قناعتي الشديدة بما يذكره هؤلاء من مساوئ ..

إلا أنه لا يزيدنى كلامهم عنها .. إلا حباً لها
لأنى أعلم أن شعب مصر وأهلها ،، من أكرم - وأطيب - وأنبل - شعوب العالم
وهذا ما لم يعرفه الكثير من هذه الشعوب ..

فهذا الكرم وهذه الشهامة وهذا الصبر على جلد الزمن ، لا يعرفه ولا يقدره إلا من خالط وعاشر هذا الشعب ليلَ نهار

ورغم ما نراه وما يحدث فى مصر
من هضم للحقوق واهانة للشعب
نستشهد بما قاله [ نزار قبانى ]
/

فكلما تفعله سواء وكلما تقوله سواء
فانت كالاطفال يا حبيبي
نحبهم مهما لنا اساؤا

أخي / الفارس ،،

جزاكم الله خيراً على النقل ،، وعلى حسن الاختيار

ملحوظة / كلمة [ بنت كلب ] تكررت 3 مرات فى الموضوع
وليس لها داعى ، إلا أن كثرة التكرار تورث الالفة
واذا الفتها العين والعقل ،، الفها اللسان عياذاً بالله
دعوة للارتقاء بالفاظنا

[Muhamed]

وبحكم عملى فأنا أخالط اناس من جنسيات مختلفة ، من دول الخليج وجميع الدول العربية ،
وصدمت صراحةً عندما وجدت اكثرهم ، قد استقر فى ذهنه أن [ مصر ] من اسوأ البلدان العربية ،

اعكس الكلام عن راى الاجانب اللى من اوربا او من جنوب شرق اسيا عن الفرق بين المصرى والعربى فى كل شئ

فى العمل واسلوب الحياه

احنا كويسين بالفطره

بس مش بنعرف نظهر المعدن بتاعنا الكويس الا لما نتحط فى اختبار

وده الفرق بينا وبين الغرب

هما علطول ملتزمين وانيقين

احنا مش بنعمل كده الا بظروف معينه