ماذا يحدث فى سيناء

[Muhamed]

ما بين تجاهل غريب من الصحف القوميه ووكالالات الانباء الرسميه واهتمام كبير من قبل الصحف الحزبيه والغير حزبيه وبعض من وكالات الانباء حول ماذا يحدث فى سيناء


هل هوا احد حلقات مسلسل العلاقات الغير حميمه بين الحكومه المصريه وبدو سيناء

تفاجءت منذ بضع ايام عند متابعتى لاخر الاخبار فى مصر حول خبر بسيط يشير الى مقتل تاجر مخدارات (مهرب) من بدو سيناء وكان التفاصيل ان كان فى لجنه واقفه والمهرب كان جاى بالعربيه بسرعه وفجاه فرمل ونزل يضرب بالنار

ردت الشرطه فكان النتيجه موت المهرب و اصابه اخر

لغايه دلوقتى خبر عادى

ياما بيحصل

لكن اتفاجئ بعدها بيومين بخير تانى اكبر شويه من الاولانى بيشر الى غضب عارم فى بدو سيناء نتيجه حادث القتل وان الناس هناك بتولع فى العربيات وكوتسات العربيات

قلت عادى برضه نزع قبليه وتلاقى اللى مات من القبيله اللى عامله القلق

لكن اول الاخبار الصدمه

ان فى مجموعه من البدو محملين على 30 عربيه نقل استولوا على منطقه (احتلوا) على الحدود المصريه الاسرائيليه باستخدام الاسلحه الاليه وانسحاب قوات الامن المصرى الى معسكراتها

قلت اعيد قراه الخبر

مره اتنين تلاته

ازاى

مفوقتش من الخبر الا على خبر زيه فى اليوم التانى

ال ايه البدو حاضروا قسم شرطه كان جواه قائد عمليات قوات الامن المركزى وجنوده بداخله


يا سلام

ولا حرب الاستنزاف

طبعا بعيدا عن الاخبار الجديده حول الوصول الى حل للازمه والافراج عن العميد المحتجز والجنود

لكن الموقف ده خلانى افكر حول حال البدو فى سيناء


الاول طرحت على نفسى سؤال

هما البدو دول مصريين


الجواب من اللى قريته زمان عن بطولات البدو دول اثناء حرب الاستنزاف بيقول انهم اكيد مصريين

طب ليه يحصل كده

فكرت ودورت حوالين الاسباب اللى خلتنا نربط البدو فى سينا بعمليات تتهريب المخدرات والسلاح

هل يكون الموساد الاسرائيلى مخترقهم ممكن

بس الاكيد برضه ان عناصر المخابرات العامه مخترقاهم برضه

طيب ليه الناس دى بالتفكك ده

هنا اشارات اصابع الاتهام الى الحكومه المصريه

البدو ناس غلابه عايشين من غير اى مصدر خدمى

مفيش حاجه اسمها ميه ولا كهرباء

الحكومه تقريبا مش معتبراهم من الشعب

يمكن علشان الاماكن اللى ساكنين فيها بعيده عن اى مصدر لاى شئ

بس هل ده سبب يخلينا نهمل هذا الجزء من شعبنا

بسمع بين الحين والاخر ان قوات الجيش بتضطر تدخل فى بعض العمليات هناك

وهنا ابكى فى صدرى واقول جاء زمن قوات الجيش المصرى تتدخل لمهاجمه جزء من الشعب المصرى

من الجانى

من المجنى عليه

من يحرك اللعبه

اذا كان لديكم اجابه فانا فى انتظار الردود

[The_boss22]

مهيا المشكله لا تعليق علي الحكومه المصريه

حاصروا مركز وقائد العمليات جوه

[Muhamed]

بعد حل الموضوع

عادت النار الى اسطح مؤخرا بعد اكتشاف جثث ل3 شبان بدو مقتولين ومدفونين فى الرمله من قبل قوات الامن المركزى

طبعا ال 3 على حسب اللى حصل كانوا مهربين ومعاهم سلاح وتم التعامل معهم من قبل الامن لكن بجد موضوع كونهم يدفنوهم كده على وش الرمله من غير ميسلموا جثثهم لاهلهم يفتح باب الاحتمالات

طبعا زاد الموقف اشتعالا ان كان فى حاجه زى اجتماع بين قيادات السياسيه فى البدو ومعظمهم من الاحزاب المستقله والمعارضه وتم عرض فيديو للحظه اكتشاف الجثث واخراجها وطبعا لم افضل نقل الفيديو الى المنتدى لانهم فى النهايه جثث لبشر كما ان الفيديو يحتوى على تغسيل الجثث والكشف عن اثار التعذذيب واطلاق النار على الجسم قبل الوفاه

بالطبع من سيشاهد الفيديو ستثار ثائرته فما بالك باهالى هؤلاء ال 3

فالنتيجه كانت مظاهرات وحرق لعجلات السيارات واغلاق للطرق

ربنا يستر

المصيبه ان محدش اتحرك بعد المشكله الاولى

[Designer]

السلام عليكم ورحمة الله وبركاته

والله هو الموضوع فعلا مهم جدا
بس دايما اعرف ان البدو ليهم حكم خاص بيهم واحكام خاصه ما بينهم يعني مش بيلجؤا للشرطه في اي حاجه لانهم عندهم شيوخ القبيلة بتاعتهم وكده
وبالنسبة انك بتقول ان البدو كانوا ناس مشاركين في الحرب وكده يعني هما كويسين وكل حاجه بس في نفس الوقت كل
مكان فيه الحلو والوحش وطبعا مش البدو كلهم تجار مخدرات انا اعرف ناس كرماء جدا جدا في البدو وعلي درجة كبيرة جدا من الاحترام وفيهم صفات الكرم والطباع القديمة
يعني اقصد مش كل البدو وحشيت او تجار مخدرات
وزي ما انت عندك في بلدك مثلا او في المنطقه اللي عايش فيها انا او انت او حد هتلاقي ناس كويسين ونا اخلاقه وحشه وكذا وكذا
بس والله ربنا يهديهم ويصلح احوال الشعب كله ونتمني ان بلدنا تكون ايد واحده في كل حاجه
وشكرا علي المواضيع الهامه دي